ޒުވާނުނަށް ޚާއްސަ ކޮށްގެން "އެއްލަކިން މަށަށް ލައިސެންސް"ގެ ނަމުގައި ޓްރާންސްޕޯޓް އޮތޯރިޓީން ކުރިއަށް ގެންދާ ޕްރޮގްރާމްގެ މުއްދަތު އަންނަ ބުރާސްފަތި ދުވަހުގެ ނިޔަލަށް އިތުރުކޮށްފިއެވެ.

އިކޮނިމިކް މިނިސްޓްރީން ބުނީ ލައިސެންސް ޕްރޮގްރާމްގެ މުއްދަތު އަންނަ ބުރާސްފަތި ދުވަހުގެ ނިޔަލަށް އިތުރުކޮށްފައިވާ ކަމަށެވެ. އަދި ދުވާލަކު 200 މީހުންނަން ޙިދުމަތް ދިނުމަށް ނިންމާފައިވާ ކަމަށް އެމިސްޓްރީން ބުންޏެއެވެ.

އެހެންކަމުން އަންގާރަ ދުވަހުން ފެށިގެން ކޮންމެ ދުވަހެއްގެ ހަވީރު 4:00 އިން 5:00 އަށް 200 ޓޯކަން ނަމްބަރު ޝޯޝަލް ސެންޓަރުން ދޫކުރުމަށް ވަނީ ހަމަޖެހިފައެވެ.

މިދިޔަ ހުކުރު ދުވަހު ފެށި "އެއް ލަކިން މަށަށް ލައިސަންސް" ޕްރޮގްރާމް ކުރިން ކުރިއަށް ގެންދަން ނިންމާފައި ވަނީ ހޯމަ ދުވަހުގެ ރޭގެ ނިޔަލަށެވެ. މިހާތަނަން މި ޕްރޮގްރާމްގައި 30000 އަށް ވުރެ ގިނަ މީހުން ބައިވެރިއިރު، 746 މީހުންނަށް ވަނީ ލައިސެންސް ދީފައެވެ.

މި ޕްރޮގްރާމްގައި ސައިކަލާއި ކާރުގެ އިތުރުން ޕިކަޕްގެ ލައިސަންސް ވެސް ނެގެއެވެ. ހަތަރު ފުރޮޅުލީ އުޅަނދުފަހަރުގެ ލައިސަންސް ދޫކުރުމަށް ޑްރައިވިން ޓެސްޓް ވެސް ހަދަނީ ހުރަވީ ބިލްޑިންގާއި ހުކުރު މިސްކިތާއި ދޭތެރޭގައެވެ. އެހެންކަމުން އެ ސަރަހައްދަށް ހިދުމަތް ހޯދަން ދާ މީހުންނަން އެ ސަރަހައްދުގެ ޖާގައިގެ ދަތިތަކާ ވެސް ވަނީ ކުރިމަތިވެފައެވެ.

މި ޕްރޮގްރާމުގައި ލައިސެންސް ހޯދުމަށް ފުރަންޖެހޭ ފޯމުގައި އެމީހެއްގެ އިންސްޓަގްރާމް އެކައުންޓް ނަމާއި ވައިބަރ ނަންބަރާއި ފޭސްބުކް ނަން އަދި ވަޓްސްއެޕް ނަންބަރު ޖަހަންޖެހެއެވެ. މިކަމާ ގުޅިގެން އާންމުންގެ ވަރަށް ބޮޑު ފާޑުކިޔުމެއް ވަނީ އަމާޒުވެފައެވެ. އެގޮތުން އެއީ މިފަހަރު އޮންނަ ރިޔާސީ އިންތިޚާބަށް ސަރުކާރުން ތައްޔާރުވަނީތޯ ވަނީ ސުވާލު އުފައްދާފައެވެ.