އާދަމް އާރިފު ބެއްލެވި ދެ ފަނޑިޔާރުންގެ މައްސަލަ އެހެން ގާޒީއަކާ ހަވާލުކޮށްފި
އާދަމް އާރިފް އެ މައްސަލަ ބެއްލެވުމާ ދެކޮޅަށް ގިނަ ބަޔަކު ވާހަކަ ދެއްކި
ކްރިމިނަލް ކޯޓު ހިންގުމާ ހަވާލުވެ ހުންނެވި ގާޒީ އާދަމް އާރިފު:- އޭނާ ބެއްލެވި މައްސަލަ ވަނީ އެހެން ގާަޒީ އަކާ ހަވާލުކޮށްފައި | ސަން އޮންލައިން
ކްރިމިނަލް ކޯޓު ހިންގުމާ ހަވާލުވެ ހުންނެވި ގާޒީ އާދަމް އާރިފު ބައްލަވަމުން ގެންދެވި ރައީސް މައުމޫނު އަބްދުލް ގައްޔޫމާއި އުއްތަމަ ފަނޑިޔާރު އަބްދުﷲ ސައީދާއި ސުޕްރީމް ކޯޓުގެ ފަނޑިޔާރު އަލީ ހަމީދުގެ މައްޗަށް އުފުލާފައިވާ ދައުވާގެ މައްސަލަ އެހެން ގާޒީއަކާ ހަވާލު ކުރައްވައިފި އެވެ.
އަދުލު އިންސާފު ގާއިމު ކުރަން އެޅުމުގެ ކުށުގެ މި ދައުވާގެ މައްސަލަ މިހާރު ބައްލަވަމުން ގެންދަވަނީ އެ ކޯޓަށް އައްޔަން ކުރެއްވި ހަސަން ނަޖީބެވެ.
އަންގާރަ ދުވަހު ބޭއްވި އިބްތިދާއީ އަޑުއެހުމުގައި މައްސަލަ ކުރިން ބައްލަވަމުން ގެންދެވި ގާޒީ ބަދަލުވެފައިވާތީ އެކަން ދިފާއީ ވަކީލުން ފާހަގަ ކުރެއްވުމުން ގާޒީ ނަޖީބު ވިދާޅުވީ އެ މައްސަލައި އޭނާއާ ހަވާލުކުރީ އެ މައްސަލަ ކުރިން ބެއްލެވި ގާޒީ އާދަމް އާރިފު ބައްލަވާ މައްސަލަތައް މާ ގިނަވުމުން ކަމަށެވެ. އެހެން ނަމަވެސް ދިފާއީ ވަކީލުން ވިދާޅުވީ ޖިނާޢީ އިޖްރާއަތުގެ ގާނޫނުގެ ދަށުން ގާޒީ ބަދަލުކުރެވޭނެ ހާލަތްތަކެއް ކަނޑައަޅާފައިވާ ކަމަށާއި އެއީ އެފަދަ ހާލަތެއް ނޫން ކަމަށެވެ.
ޖިނާއީ އިޖްރާއަތުގެ ގާނޫނުގައި 152 ވަނަ މާއްދާގައި ބުނެފައިވާ ގޮތުން މައްސަލަ ބައްލަވާ ފަނޑިޔާރަކު ބަދަލުކުރެވޭނީ ޝަރީއަތް ހިނގަމުން ދަނިކޮށް ނުވަތަ ޝަރީއަތުގެ އަޑުއެހުމެއް ނިމި ހުކުމް އިއްވަންވެފައި ވަނިކޮށް ފަނޑިޔާރު ބަލިވެއްޖެ ނުވަތަ މަރުވެއްޖެ ނަމަ ނުވަތަ ފަނޑިޔާރެއްގެ ދައުރު ހަމަވެއްޖެ ނަމަ ނުވަތަ އެ ޝަރީއަތް ފެށުމުގެ ކުރިން މެދުވެރިވެރިވެފައިނުވާ ނުވަތަ އެނގިފައިނުވާ އެ ފަނޑިޔާރެއްގެ މަސްލަހަތު ފުށުއަރާ، ކަމެއް މެދުވެރިވެރިވުމުގެ ސަބަބުން އެ ޝަރީއަތް ހިންގުމަށް އެ ފަނޑިޔާރެއް ނުކުޅެދިއްޖެނަމަ އެ މައްސަލައަކަށް ހާއްސަކުރެވިފައިވާ ފަނޑިޔާރަކު ބަދަލުކުރެވިދާނެ ކަމަށެވެ. ނަމަވެސް އެ މާއްދާގެ ވާހަކަ ދިފާއީ ވަކީލުން ވިދާޅުވުމުން ގާޒީ ނަޖީބު ވިދާޅުވީ މައްސަލައިން ތަނާޒުލުވެވަޑައިގަތީ ނޫން ކަމަށެވެ.
ދެ ފަނޑިޔާރުންގެ މައްސަލައިން ގާޒީ އާދަމް އާރިފު ވަކިވެފައިމިވަނީ އޭނާ ސުޕްރީމް ކޯޓުގެ ފަނޑިޔާރުންނާ ދެކޮޅަށް ދެއްވި ބަޔާނެއް ލީކްވެފައިވަނިކޮށެވެ. އެ ބަޔާނުގައި އާދަމް އާރިފު ވިދާޅުވެފައިވަނީ އެކެއް ފެބްރުއަރީގެ އަމުރާ ގުޅިގެން އުއްތަމަ ފަނޑިޔާރު އަބްދުﷲ ސަޢީދާއި ފަނޑިޔާރު އަލީ ހަމީދު އޭނާއަށް ގުޅާ ކްރިމިނަލް ކޯޓުން ބައެއް މީހުން ހައްޔަރުކުރުމަށް ނެރެފައިވާ އަމުރުތައް ބާތިލް ކުރުމަށް އެންގި ކަމަށާއި އެގޮތައް އަންގާފައިވަނީ އެ ދެ ފަނޑިޔާރުންގެ އަމިއްލަ މަންފާއެއް ނުވަތަ ފައިދާއެއް އޮވެގެން ކަމަށް ބެލުމުގެ ފުރުސަތު އެބަ އޮތް ކަމަށެވެ. އެ ބަޔާންތައް ލީކްވުމާއެކު ގިނަ ބަޔަކު ވަނީ އެ ފަނޑިޔާރުންނާ ދެކޮޅަށް ހުށަހެޅިފައިވާ އެއްވެސް މައްސަލައެއް ބެލުމަށް އާދަމް އާރިފު އިންނެވުމަށް ފާޑު ކިޔާފަ އެވެ.
