ސިނާންގެ މައްސަލަ ކެންސަލް
މައްސަލަ ބާއްވަން ތާޥަލުކޮށްފައި އޮތީ 15.00 ބާއްވަން
ރައްޔިތުންގެ މަޖިލީހުގެ މައްޗަންގޮޅި ދެކުނު ދާއިރާގެ މެމްބަރު އަބްދުﷲ ސިނާން
ރައްޔިތުންގެ މަޖިލީހުގެ މައްޗަންގޮޅި ދެކުނު ދާއިރާގެ މެމްބަރު އަބްދުﷲ ސިނާންގެ މައްޗަށް ދައުލަތުން އުފުލި ޓެރަރިޒަމްގެ އަމަލެއް ހިންގަން އުޅުނުކަމުގެ ދައުވާގެ އަޑުއެހުން ކަންސަލްކޮށްފި އެވެ.
ސިނާންގެ މައްޗަށް އުފުލާފައިވާ މި ދައުވާގެ އަޑުއެހުން ބޭއްވުމަށް ތާވަލުކޮށްފައި އޮތީ ހޯމަ ދުވަހުގެ މެންދުރު ފަހު ބޭއްވި 15.00ގައި ބޭއްވުމަށެވެ. އެހެން ނަމަވެސް އެ މައްސަލައިގެ އަޑުއެހުން ކެންސަލްކޮށްފައިވާކަން ކޯޓުން އަންގާފައިވަނީ ޝަރީއަތް ފެށުމަށް ހަމަ ޖެހިފައި އޮތް ގަޑި ފަހަނައަޅާ ދިޔަ ފަހުންނެވެ.
ސިނާންގެ މައްޗަށް އުފުލާފައިވާ ޓެރަރިޒަމްގެ އަމަލެއް ހިންގަން އުޅުނުކަމުގެ ދައުވާއާ ގުޅިގެން ބުރާސްފަތި ދުވަހު މެންދުރު ފަހު ބޭއްވި އިބްތިދާއީ އަޑުއެހުމުގައި ދައުލަތުން އުފުލި ދައުވާގައި ބުނެފައިވަނީ މިދިޔަ އަހަރުން ފެށިގެން ސިނާން, އިތުރު ބަޔަކާ ބައިވެރިވެގެން ރައްޔިތުންގެ މަޖިލީހުގެ ތެރެއިން ގާނޫނާ ހިލާފަށް ވެރިކަން ވައްޓާލުމަށްޓަކައި ރިޝްވަތު ހިފާފައިވާ ކަމަށެވެ. ގާނޫނު އަސާސީން ދައުލަތް ހިންގުމަށް ވަކިވަކި ބާރުތައް ލިބިދީ އުފައްދާފައިވާ މުވައްސަސާތަކުގެ ހިންގުމުގެ ނިޒާމުތަކަށް ބުރޫއަރައި، ގައުމީ ސަލާމަތާއި ރައްޔިތުންގެ ރައްކާތެރިކަމާ ގުޅިފައިވާ މަސްލަހަތުތަކެއް ގެއްލޭ ގޮތަށް ސުޕްރީމް ކޯޓުން އަމުރެއް ސިނާން ނެރުވާފައިވާ ކަމަށް ވެސް ދައުލަތުން އިއްވި ދައުވާގައި ބުނެފައިވެ އެވެ. އޭގެ އިތުރުން ގާނޫނީ އުސޫލުތަކުގެ ބޭރުން ކުރީގެ ޕޮލިސް ކޮމިޝަނަރ އަހްމަދު އަރީފް މެދުވެރިކޮށް ދުރާލާ ރާވައިގެން ފުލުހުންގެ ތެރެއިން ބަޔަލުކު ލައްވައި ފުލުހުންގެ ޑިއުޓީގައި އުޅުނު އިތުރު ފުލުހުންނާއި ކުރިމަތިލައި، ގައުމުގެ ހަމަ ނުޖެހުން ނަގާލަން މަސައްކަތްކޮށް ގާނޫނު އަސާސީއާއި ގާނޫނުތަކާއި އުސޫލުތަކުގެ ބޭރުން، ގާނޫނީ ގޮތުން އުފެދިފައިވާ ސަރުކާރު ގާނޫނާ ހިލާފަށް ވައްޓާލަން މަސައްކަތްކޮށް، ދައުލަތަށާއި ސަރުކާރަށް ނޭދެވޭ ނުފޫޒު ފޯރުވައި، އާންމުންގެ ސަލާމަތައް ނުރައްކާތެރިވާ ފަދަ ހާލަތެއް މެދުވެރިކުރުވާފައިވާ ކަމަށް ވެސް ސިނާންގެ މައްޗަށް ތުހްމަތުކޮށްފައިވެ އެވެ.
މި މައްސަލައިގައި ބޭއްވުމަށް ހަމަ ޖެހިފައި އޮތީ ޝަރީއަތުގެ ކުރިން ހުށަހަޅާ ހުށަހެޅުންތައް ހުށަހެޅުމަށް ފަހު އެކަމާމެދު ވާހަކަ ދެއްކުމެވެ. ސިނާންގެ މައްޗަށް އުފުލާފައިވާ މި ދައުވާއާ ގުޅިގެން އޭނާ ހުންނެވީ ޝަރީއަތް ނިމެންދެން ބަންދުގައި އެވެ.
