ބީއެމްއެލް 'ވައު ކިޑްޒް ރަން' ކާމިޔާބުކަމާއެކު ނިންމާލައިފި

ބޭންކް އޮފް މޯލްޑިވްސް އާއި ޓޯޓަލް ފިޓްނަސް ގްރޫޕް (ޓީއެފްޖީ) އާ ގުޅިގެން ކޮންމެ އަހަރަކު ބާއްވަމުން އަންނަ ބީއެމްއެލް 'ވައު ކިޑްޒް ރަން'ގެ މިއަހަރުގެ ދުވުން ކާމިޔާބު ކަމާއެކު މިއަދު ނިންމާލައިފިއެވެ.

މި ދުވުމުގައި ތިން އުމުރުފުރާއަކުން 900 ކުދިންނާއި އެކުދިންގެ ބެލެނިވެރިންނާއެކު ޖުމްލަ 1800 ބައިވެރިން މި ދުވުމުގައި މިއަހަރު ބައިވެރިވެފައިވެއެވެ. މި އުމުރުފުރާތަކުގެ ތެރެއިން ތިން އަހަރާއި ފަސް އަހަރާއި ދެމެދުގެ ކުދިންގެ ދުވުން ފަށާފައިވަނީ ބީއެމްއެލްގެ މަޖީދީ މަގު ބްރާންޗް ކުރިމަތިންނެވެ. ހަމައެހެންމެ ފަސް އަހަރާއި ހަތް އަހަރުގެ ކުދިންނާއި ހަތް އަހަރާއި ނުވަ އަހަރުގެ ކުދިންގެ ދުވުން ފަށާފައިވަނީ މަޖީދީމަގު އާޓިފިޝަލް ބީޗް ކުރިމަތިންނެވެ.

ދުވުމުގައި ބައިވެރި ކުދިންނަށް މެޑަލް ހަވާލުކޮށްފައިވަނީ ކޮންމެ ކުއްޖަކުވެސް ދުވުން ނިންމި ވަގުތު ސޯޝަލް ސެންޓަރު ކުރިމަތިންނެވެ. ދުވުމުގައި ބައިވެރިވި ކުދިންނަށް މެޑަލް ހަވާލުކޮށްދެއްވީ ބޭންކް އޮފް މޯލްޑިވްސްއާއި ޓީއެފްޖީގެ އިސްވެރިންނެވެ.

ބޭންކް އޮފް މޯލްޑިވްސްއިން ތަޢާރަފްކުރި ފަންޑް ރެއިޒިން ޕްލެޓްފޯމް މެދުވެރިކޮން ދުވުމުގައި ބައިވެރިވި ކުދިން ހޯދި ފައިސާ، މި ދުވުން ނިންމުމުގެ ރަސްމިއްޔާތުގައި އެކުދިން ވަނީ ކެއަރ ސޮސައިޓީއާއި ހަވާލުކޮށްފައެވެ. މި ފައިސާ ކެއަރ ސޮސައިޓީއާއި ހަވާލުކޮށްދެއްވީ ދުވުމުގައި ބައިވެރިވި ކުދިންނާއި ބީއެމްއެލް ސީއީއޯ އަދި މެނޭޖިންގ ޑިރެކްޓަރ އެންޑްރޫ ހީލީއެވެ. ބީއެމްއެލްއިން ހުޅުވާލި މި ފަންޑްރެއިޒިން ޕްލެޓްފޯމް މެދުވެރިކޮށް އެކުދިން ވަނީ 130800 ރުފިޔާ ހޯދާފައެވެ.

ހަމައެހެންމެ މި ފައިސާގެ އިތުރުން ދުވުމުގައި ބައިވެރިވުމަށް ޓީއެފްޖީގައި ރަޖިސްޓްރީ ކުރި ކުދިންގެ ރެޖިސްޓްރޭޝަން ފީގެ 15 އިންސައްތަ ގެ ގޮތުގައި ލިބުނު 30،150 ރުފިޔާވެސް ޓީއެފްޖީއިން ވަނީ ކެއަރ ސޮސައިޓީއަށް ހަދިޔާކޮށްފައެވެ.

މި ދުވުން މެދުވެރިކޮށް ލިބުނު ފައިސާ ކެއަރ ސޮސައިޓީއާއި ހަވާލުކޮށްދެއްވީ ބީއެމްއެލްގެ ސީއީއޯ އެންޑްރޫ ހީލީގެ އިތުރުން ދުވުމުގައި ބައިވެރިވި ބައެއް ކުދިންނެވެ.