ސީރިޔާއަށްދިން މިސައިލް ހަމަލާތަކުގައި އަސަދަށް ވަފާތެރި ސިފައިންތަކެއް މަރުވެއްޖެ
1 މެއި 2018 | އަންގާރަ 01:39ހަމަލާގެ ފަހަތުގައިވަނީ ކޮންބައެއްކަން މިހާތަނަށް އެނގިފައެއް ނުވޭ
ހަމަލާތައް އަރާފައިވަނީ ހަމާ އަދި ހަލަބް ޕްރޮވިންސަށްކަމަށް ސީރިޔާ އަސްކަރިއްޔާއިން ބުނޭ
ސީރިޔާގެ އަސްކަރީ މަރުކަޒުތަކަށް ދިން މިސައިލް ހަމަލާތަކުގައި މަރުވެފައިވަނީ ސީރިޔާ ސަރުކާރަށް ވަފާތެރި ސިފައިންކަމަށް ރިޕޯޓްތައް ބުނެފިއެވެ. އޭގެ ތެރޭގައި އީރާނުގެ ރައްޔިތުންވެސް ހިމެނޭކަމަށް ރިޕޯޓްތައް ބުނެއެވެ.
ސީރިޔާގެ އަސްކަރިއްޔާއިން ބުނީ ހަމަލާތައް އަރާފައިވަނީ ހަމާ އަދި ހަލަބް ޕްރޮވިންސަށްކަމަށެވެ.
ހަމަލާތަކުގައި އެއްވެސް މީހަކު ޒަޚަމްވި ކަމެއް އަސްކަރިއްޔާއިން ރިޕޯޓްކޮށްފައެއް ނުވެއެވެ.
ނަމަވެސް އިނގިރޭސިވިލާތުގައި ގާއިމްވެފައިވާ ސީރިއަން އޮބްޒަވޭޓޮރީ ފޮރ ހިއުމަން ރައިޓްސްއިން ބުނީ ހަމަލާތަކުގައި ސީރިޔާގެ ހަތަރު މީހަކާއި އެހެނިހެން ގައުމުތަކުގެ 22 މީހުން މަރުވެފައިވާއިރު އޭގެ ތެރޭގައި ގިނައީ އީރާނުގެ ރައްޔިތުން ހިމެނޭ ކަމަށެވެ.
ހަމަލާގެ ފަހަތުގައިވަނީ ކޮންބައެއްކަން މިހާތަނަށް އެނގިފައެއް ނުވެއެވެ. އިސްރާއީލުގެ އަސްކަރިއްޔާއާއި ހުޅަނގުގެ ގައުމުތަކުން ސީރިޔާގެ ތަންތަނަށް މީގެ ކުރިން ހަމަލާދީފައިވެއެވެ.
މި މަހުގެ ކުރީކޮޅު އެމެރިކާއާއި، އިނގިރޭސިވިލާތާއި، ފްރާންސުންވަނީ، ސީރިޔާގައި ކެމިކަލް ހަމަލާއެއްދިންކަމަށް ތުހުމަތުކޮށް ރައްދުގައި މިސައިލް ހަމަލާތަކެއް ދީފައެވެ.
