އިޓާލިއަން ސެރީގައި ފިއޮރެންޓީނާއާ ދެކޮޅަށް ކުޅުނު މެޗުން ބަލިވެ ތަށި ހޯދުމަށް ނަޕޯލީއިން ދެކެމުން އައި ހުވަފެން ބިލާހަކަށް ވެއްޖެއެވެ.

ރަށުން ބޭރުގައި ފިއޮރެންޓީނާއާ ދެކޮޅަށް ކުޅުނު މެޗުން ނަޕޯލީ ބަލިވީ 3-0 ގެ ނަތީޖާއަކުންނެވެ. މި ދެ ޓީމު ސީޒަނުގެ ކުރީކޮޅު ނަޕޯލީގެ ދަނޑުގައި ކުޅުނު މެޗު ނިމިފައިވަނީ އެއްވެސް ޓީމަކަށް ލަނޑެއް ނުޖެހި އެއްވަރުވެގެންނެވެ. މި މެޗާއި ނަޕޯލީއިން ކުރިމަތިލީ މި މެޗު ކާމިޔާބުކުރުމުގެ އުއްމީދުގައި ކަމަށްވާއިރު ތަށި ކާމިޔާބުކުރުމުގެ ކުޑަވެސް ފުރުސަތެއް އެ ޓީމަށް އޮތީ މި މެޗަށް ނުކުތްއިރު ހުރިހާ މެޗެއް ކާމިޔާބުކޮށްގެންނެވެ. ދެ ޓީމުން ވެސް މި މެޗަށް ނެރެފައިވަނީ ވަރުގަދަ ފުރަތަމަ އެގާރައެކެވެ.

ފުރަތަމަ ހާފު ފެށިގެން ދެ ޓީމުގެ ފަރާތުން ވެސް ހަމަހަމަ ކުޅުމެއް ފެނިގެންދިޔައިރު ދެ ޓީމުން ވެސް ވަނީ ލަނޑު ޖެހުމަށް ފުރުސަތުތައް އުފެއްދުމަށް މަސައްކަތްކޮށްފައެވެ. އެހެން ނަމަވެސް މެޗުގައި ނަޕޯލީއަށް ކުރިމަތިވި އެންމެ ބޮޑު ގޮންޖެހުމަކީ އެ ޓީމުގެ ޑިފެންޑަރު ކަލިޑޫ ކުލިބާލީއަށް މެޗުގެ އަށްވަނަ މިނެޓުގައި ރަތް ކާޑު ދައްކައި ދަނޑުން ފޮނުވާލުމެވެ. މި ރަތް ކާޑު ދެއްކީ ވީޑިއޯ އެސިސްޓަންޓް ރެފްރީ (ވީއޭއާރް) ގެ މަޝްވަރާއާއެކުއެވެ. 10 ކުޅުންތެރިންނާއެކު ކުޅެމުންދިޔަ ނަޕޯލީ ކޮޅަށް ފިއޮރެންޓީނާގެ ފުރަތަމަ ލަނޑު ޖެހީ މެޗުގެ 34 ވަނަ މިނެޓުގައެވެ. މި ލަނޑު އެ ޓީމަށް ޖަހައިދިނީ ޖިއޮވާނީ ސިމިއޯނޭއެވެ.

އެއް ލަނޑުގެ ލީޑެއްގައި އޮވެ ފިއޮރެންޓީނާއިން ފުރަތަމަ ހާފު ނިންމާލިއިރު އެ ޓީމުން ވަނީ ދެވަނަ ހާފުގައި ވެސް މޮޅު ކުޅުމެއް ދައްކައި ނަޕޯލީގެ ގޯލާއި އަމާޒުކޮށް ގިނަ ހަމަލާތަކެއް ފޮނުވާލާފައެވެ. އެ ޓީމުގެ ދެވަނަ ލަނޑު މެޗުގެ 62 ވަނަ މިނެޓުގައި ވެސް ޖަހައިދިނީ ޖިއޮވާނީއެވެ. ނަޕޯލީގެ ފަރާތުން ދެވަނަ ހާފުގައި ދަށް ކުޅުމެއް ފެނިގެންދިޔައިރު ޖިއޮވާނީ ވަނީ މެޗުގެ އިތުރު ވަގުތުގެ ތެރޭގައި ލަނޑެއް ޖަހާ އޭނާގެ ހެޓްރިކް މި މެޗުގައި ފުރިހަމަކޮށްފައެވެ.

ސެރީއޭގައި ކުޅުނު އެހެން މެޗުތަކަށް ބަލާލާއިރު އޭސީ މިލާން ވަނީ ރަށުން ބޭރުގައި 2-1 އިން ބޮލޯންޔާ ބަލިކޮށްފައެވެ. ލާޒިއޯ ވެސް ވަނީ 1-0 އިން ޓޮރީނޯ ބަލިކޮށްފައެވެ. އުދިނޭޒީ އަދި ބެނެވެންޓޯ ކުޅުނު މެޗު 3-3 އިން އެއްވަރުވިއިރު އެޓްލާންޓާ ވަނީ އަމިއްލަ ދަނޑުގައި 3-1 އިން ޖެނޯއާ ބަލިކޮށްފައެވެ.

ސެރީއޭގެ ތަށި ހޯދުމަށް ނަޕޯލީއިން ކުރަމުން އައި އުއްމީދުތައް އެއްކޮށް ފުނޑުފުނޑުވެގެން ގޮސްފައިވާއިރު އެ ޓީމަށް ތަށި ލިބެން އޮތް ހަމައެކަނި މަގަކީ ޔުވެންޓަސް ދެން ކުޅޭ ހުރިހާ މެޗަކުން ބަލިވެ، ނަޕޯލީ ކުޅޭ ހުރިހާ މެޗެއް ކާމިޔާބުކޮށްގެންނެވެ.

ސެރީއޭގެ ޕޮއިންޓް ތާވަލުގެ އެއްވަނައިގައި ކުޅުނު 35 މެޗުން ލިބުނު 88 ޕޮއިންޓާއެކު ޔުވެންޓަސް އޮތްއިރު ނަޕޯލީ އޮތީނ 84 ޕޮއިންޓާއެކު ތާވަލުގެ ދެވަނައިގައެވެ. ތިންވަނައިގައި 70 ޕޮއިންޓާއެކު ރޯމާ އޮތްއިރު ހަތަރު ވަނައިގައި ހަމަ އެއަދަދަށް ޕޮއިންޓް ހޯދައިގެން އޮތީ ލާޒިއޯއެވެ. ރޯމާއަށް ލަނޑުގެ ތަފާތުން ކުރި ލިބޭއިރު ފަސް ވަނައިގައި އޮތީ އިންޓަ މިލާންއެވެ.