ޕްރިމިއާ ލީގު: ފެލައިނީގެ ލަނޑުން ޔުނައިޓެޑް ފަހުވަގުތު މޮޅުވެއްޖެ

އިނގިރޭސި ޕްރިމިއާ ލީގުގައި އާސެނަލްއާ ދެކޮޅަށް ކުޅުނު މެޗުގައި މަރުއާން ފެލައީނީ ފަހު ވަގުތު ކާމިޔާބުކުރި ލަނޑުން މެންޗެސްޓާ ޔުނައިޓެޑް މޮޅުވެއްޖެއެވެ.

އަމިއްލަ ދަނޑު ކަމަށްވާ އޯލްޑް ޓްރެފޯޑްގައި އާސެނަލްއާ ދެކޮޅަށް ކުޅުނު މެޗުން ޔުނައިޓެޑް މޮޅުވީ 2-1 ގެ ނަތީޖާއަކުންނެވެ. މި ދެ ޓީމު ސީޒަނުގެ ކުރީކޮޅު އާސެނަލްގެ ދަނޑުގައި ކުޅުނު މެޗު ވެސް 3-1 އިން ކާމިޔާބުކުރީ ޔުނައިޓެޑްއެވެ. މި މެޗާއި އާސެނަލް ކުރިމަތިލިއިރު އެ ޓީމު މިއަހަރުގެ ތެރޭގައި ރަށުން ބޭރުގައި ކުޅުނު އެއްވެސް މެޗަކުން މޮޅުވެފައެއް ނުވެއެވެ. މި މެޗާއި ޔުނައިޓެޑްއިން ކުރިމަތިލީ ގަދަ ހަތަރެއްގެ ޖާގައެއް ކަށަވަރުކުރުމުގެ އުއްމީދުގައި ކަމަށްވާއިރު އެ ޓީމުން ނެރެފައިވަނީ ވަރުގަދަ ފުރަތަމަ އެގާރައެކެވެ. އެހެން ނަމަވެސް އާސެނަލްގެ ފަރާތުން މި މެޗަށް ނެރުނު ފުރަތަމަ އެގާރައިން ގިނަ ބަދަލުތަކެއް ވަނީ ފެނިގެންގޮސްފައެވެ.

ފުރަތަމަ ހާފު ފެށިގެން ދެ ޓީމުގެ ފަރާތުން ވެސް ހަމަހަމަ ކުޅުމެއް ފެނިގެންދިޔައިރު ދެ ޓީމުން ވެސް ވަނީ ލަނޑު ޖެހުމަށް ރަނގަޅު ފުރުސަތުތަކެއް ތަނަވަސްކޮށްފައެވެ. އެގޮތުން މެޗުގެ ފުރަތަމަ ލަނޑު ޖަހާ ލީޑު ނަގާފައިވަނީ މެންޗެސްޓާ ޔުނައިޓެޑްއިންނެވެ. މެޗުގެ 16 ވަނަ މިނެޓުގައި އެ ޓީމަށް މި ލަނޑު ޖަހައިދިނީ ފްރާންސްގެ މިޑްފީލްޑަރު ޕައުލް ޕޮގްބާއެވެ. މި ލަނޑަށްފަހު އާސެނަލްއިން އެ ޓީމުގެ ކުޅުން ރަނގަޅުކޮށް ހަމަލާ އުފެއްދުމަށް މަސައްކަތްކޮށްފައިވެއެވެ. މި ހާފުގެ ފަހުވަގުތުކޮޅުގެ ތެރޭގައި އޭޝްލީ ޔަންގް ފޮނުވާލި ހަމަލާއެއް އާސެނަލްގެ ގޯލުގެ ދަނޑިއަށް އަމާޒުވެފައިވެއެވެ.

އެއް ލަނޑުގެ ލީޑެއްގައި އޮވެ ޔުނައިޓެޑްއިން ފުރަތަމަ ހާފު ނިންމާލިއިރު ދެވަނަ ހާފުގައި އާސެނަލްއިން ވަނީ އެ ޓީމުގެ ކުޅުން ރަނގަޅުކޮށްފައެވެ. އެގޮތުން މެޗުގެ 51 ވަނަ މިނެޓުގައި އެ ޓީމުން ވަނީ މެޗުގެ ނަތީޖާ ހަމަހަމަކޮށްފައެވެ. މި ލަނޑު އެ ޓީމަށް ޖަހައިދިނީ ޔުނައިޓެޑް ދޫކޮށް އެ ޓީމާއި ގުޅުނު ހެންރިކް މިޚްތަރިޔާންއެވެ. މި ލަނޑަށްފަހު ދެ ޓީމަށް ވެސް ލަނޑު ޖެހުމަށް ރަނގަޅު ފުރުސަތުތައް ލިބިގެންދިޔައިރު މި މެޗުން ޔުނައިޓެޑް މޮޅުވި ލަނޑު މެޗުގެ ފުރިހަމަ ވަގުތު ހަމަވެގެން ރެފްރީ ކުޅެން ދެއްކި އިތުރު ވަގުތުގެ ތެރޭގައި ޖަހައިދިނީ ބަދަލު ކުޅުންތެރިޔެއްގެ ގޮތުގައި ކުޅެން އެރި މަރުއާން ފެލައިނީއެވެ.

މި މެޗުގައި ޖެހި ލަނޑާއެކު މިޚްތަރިޔާން ވެގެންގޮސްފައިވަނީ އެއް ސީޒަނެއްގައި ޔުނައިޓެޑަށް ކުޅެ، އެ ޓީމާއި ދެކޮޅަށް ލަނޑު ވެސް ޖެހި ފުރަތަމަ ކުޅުންތެރިޔާއަށެވެ. ހަމައެހެންމެ މިއަހަރުގެ ތެރޭގައި ރަށުން ބޭރުގައި ކުޅުނު އެއްވެސް މެޗަކުން އާސެނަލް މޮޅުނުވުމުގެ ސިލްސިލާއަށް މި މެޗަކީ އިތުރުވެގެންދިޔަ ބޮޅެކެވެ. މިއީ 1996 ވަނަ އަހަރުގެ ފަހުން ޖެހިޖެހިގެން މިހާ ގިނަ މެޗުން އެ ޓީމު ބަލިވި ފުރަތަމަ ފަހަރެވެ.

ޕްރިމިއާ ލީގުގެ ޕޮއިންޓް ތާވަލުގައި ޔުނައިޓެޑް އޮތީ ކުޅުނު 35 މެޗުން ލިބުނު 77 ޕޮއިންޓާއެކު ތާވަލުގެ ދެވަނައިގައެވެ. އާސެނަލް އޮތީ 57 ޕޮއިންޓާއެކު ތާވަލުގެ ހަވަނައިގައެވެ.