ކޭންސް ރެޑްކާޕެޓްގައި ފުރަތަމަ ފަހަރަށް ކަންގަނާ

މިއަހަރުގެ މޭމަހުގެ 8 އިން 19 ވަނަ ދުވަހާއި ހަމައަށް ބާއްވާ ކޭންސް ފިލްމް ފެސްޓިވަލްގައި ބޮލީވުޑްގެ ތަރި ކަންގަނާ ރަނާވަތު ރެޑްކާޕެޓްގައި ފެންނާނެއެވެ. ކަންގަނާ ފެނިގެން ދާނީ ބްރޭންޑް އެންބެސެޑަރެއްގެ ގޮތުގައެވެ. އޭނާ ފެނިގެންދާނީ ކްލޯއީ ގޯޓްލީބްގެ ޑިޒައިންތަކުންނެވެ.

މީގެ އިތުރުން މިފަހަރުގެ ކޭންސް ފިލްމު ފެސްޓިވަލްގައި އިންޑިއާގެ ސިނަމާތަކުގެ ރެޕްރެޒެންޓޭޓިވްއަކީ ވެސް ކަންގަނާއެވެ. ކުރިއަށް އޮތް އަހަރުގެ ތެރޭގައި ފެށުމަށް ހަމަޖައްސާ ފިލްމާއި ޑޮކިއުމެންޓްރީތަކާއި ގުޅޭ މައުލޫމާތު ވެސް ހާމަކުރުމަށް ހަމަޖެހިފައިވާ ކޭންސް ފިލްމު ފެސްޓިވަލްގެ ޖޫރީ ރައީސަކީ އޮސްޓްރޭލިއާގެ ބަތަލާ ކޭޓް ބްލެންޝެޓެވެ.

މިއީ ކަންގަނާ ކޭންސް ފިލްމު ފެސްޓިވަލްގެ ރެޑް ކާޕެޓުގައި ހިނގާ ފުރަތަމަ ފަހަރެވެ.

މިއަހަރު ބާއްވާ ކޭންސް ފިލްމު ފެސްޓިވަލްގައި ކަންގަނާ ރެޑްކާޕެޓްގައި ހިނގާއިރު މިއަހަރަކީ އޭނާއަށް އުފާވެރި އަހަރެކެވެ. އެގޮތުން އެމެރިކާގެ ކުރީގެ ފަސްޓްލޭޑީ މިޝެލް އޮބާމާ އަދި މަޝްހޫރު އަންހެން ޝަހުސިއްޔަތެއް ކަމަށްވާ އޮޕްރާ ވިންފްރީއާއި އެކީގައި އެއް ސްޓޭޖަކުން ޕާފޯމް ކުރަން އޭނާއަށް ވަނީ ލިބިފައެވެ. ކަންގަނާއަށް އެ ފުރުސަތު ލިބުނީ އިންޑިއާ އަށް މިނިވަންކަން ހޯދައި ދިން މަހާތުމާ ގާންދީގެ ސިޔާސަތުތަކާއި އޭނާގެ ގެންގުޅުނު އުސޫލްތައް ދިރުވުމާ ގުޅޭ ގޮތުން ބާއްވާ ސަމިޓް ކަމަށްވާ ގާންދީ ގޯޒް ގްލޯބަލްގައެވެ. މި ސަމިޓް އޮންނާނީ އަންނަ އޮގަސްޓް މަހުގެ 18-19 އަށް އެމެރިކާގެ ނިއު ޖާޒީގައެވެ.

ބޮލީވުޑްގެ ފިލްމުތަކުގެ ތެރެއިން ކަންގަނާ މިހާރު މަސައްކަތް ކުރަމުން އަންނަނީ މަނިކާނިކާ އާއި މެންޓަލްހޭ ކިޔާގެ މަސައްކަތެވެ. ތެލުގޫ ޑައިރެކްޓަރ ރާޖާ ކްރިޝްނާ ޖަގަލްމޫޑީ ޑައިރެކްޓް ކުރާ މަނިކާނިކާ ގައި އޭނާގެ އިތުރުން ފެނިގެންދަނީ އަންކިތާ ލޮކަންޑޭއާއި ސޯނޫ ސޫދު، އަތުލް ކުލްކާނީ އަދި ޖިޝޫ ސެންގުޕްތާއެވެ. ކުރިން މަނިކާނިކާ ރިލީޒް ކުރުމަށް ހަމަޖެހިފައި އޮތީ މިމަހުގެ 27 ގައެވެ. އެހެން ނަމަވެސް ފަހުން އެ ފިލްމު ވަނީ އޮގަސްޓަށް ލަސްކޮށްލާފައެވެ. ކަންގަނާ ބުނެފައިވަނީ އޭނާ މި ފިލްމުން ފެނިގެންދާނީ އެކި "ޝޭޑް" ތަކުންނެވެ.