މާލެއަތޮޅު ގުޅި ކައިރީން ދެ ލޯންޗެއް ޖެހި ހިނގި އެކްސިޑެންޓުގައި ގެއްލިގެން ހޯދަމުންދާ ލޯންޗުގެ ކެޕްޓަން ކަނޑުއަޑީގައި މަރުވެފައި އޮއްވާ ފެނިއްޖެއެވެ.
ކ. ގުޅީގެ ހުޅަނގުން ހަ މޭލު ބޭރުން ހިނގި އެ އެކްސިޑެންޓުގައި ގެއްލިގެން ހޯދަމުންދަނިކޮށް މަރުވެފައި އޮއްވާ ފެނުނީ ދ. ކުޑަހުވަދޫ، ކިސްވާ، މުޙައްމަދު އަޙުމަދު، 37، އެވެ.
އެމްއެންޑީއެފްގެ އިންފޮމޭޝަން އޮފިސަރު ކެޕްޓަން އިބްރާހީމް އާޒިމް ވިދާޅުވީ އަހުމަދުގެ ހަށިގަނޑު ފެނުނީ 45 މީޓަރު އަޑިން ކަަމަށެވެ. އޭނާ ފެނުނީ ކޯސްޓުގާޑުގެ ޑައިވަރުންނަށް ކަމަށާއި އޭނާގެ ހަށިގަނޑު ފެނުނު ސަރަހައްދުން ލޯންޗުގެ ހުންގާނު ވެސް ފެނިފައިވާ ކަމަށް އާޒިމް ވިދާޅުވިއެވެ.
އެކްސިޑެންޓުވި ދެ ލޯންޗުގެ ތެރެއިން އެއް ލޯންޗުގެ ކެޕްޓަންކަން ކުރަމުންދިޔަ އަހުމަދުގެ ހަށިގަނޑު މާލެ ގެނެސްފައި ވަނީ ހުކުރު ދުވަހު ހެނދުނުއެވެ.
ކ. އިތާފުށި ރިސޯޓުގެ ދެ ލޯންޗެއް ޖެހި ބުރާސްފަތި ދުވަހުގެ ރޭ ހިނގި އެ އެކްސިޑެންޓުގައި އަނިޔާވި ބިދޭސީއަކަށް ފަރުވާދެމުންދަނިކޮށް ވަނީ މަރުވެފައެވެ. އެކްސިޑެންޓުގައި އަށް މީހަކަށް އަނިޔާވެގެން އޭޑީކޭ ހޮސްޕިޓަލަށް ގެންގޮސްފައިވެއެވެ.
