އެޕްރީލް މަހުގެ 21 ގައި ނެރޭ ދިވެހި ފިލްމު ތިޔަ ލޯތްބާއި ދުރަށް ޕްރިމިއާ ކުރާގޮތަށް ހަމަޖެހިފައިވަނީ އޮލިމްޕަހުގައި ކަމަށް ފިލްމުގެ ޑައިރެކްޓަރ އަދި ވާހަކަލިޔުންތެރިޔާ މަރިޔަމް މޫސާ(މަރީ) ބުނެފިއެވެ.
މަރީ ބުނީ އޮލިމްޕަހުގައި ފިލްމު ޕްރިމިއާ ކުރާއިރު ހުޅުމާލޭ ޝްވެކްގައިވެސް ހަމަ އެރޭ ފިލްމު އަޅުވާނެކަމަށެވެ.
މި ފިލްމުގެ ހުރިހާ މަންޒަރެއް ޝޫޓްކޮށްފައިވަނީ ސްރީލަންކާގައެވެ. މި ފިލްމަކީ ތިނެސްކަން ލޯބީގެ ވާހަކައެއްގެ މައްޗަށް ބިނާކޮށް އުފައްދާފައިވާ ފިލްމެކެވެ. މި ފިލްމުގެ ކާސްޓުންގެ ތެރޭގައި ހިމެނެނީ އަހުމަދު އަޒްމީލް(އަޒޭ)، މަލީހާ ވަހީދު(މަލް) އަދި އަހުމަދު އަމަން (ޓޮމް)އަދި މަރިޔަމް ޝަހްޒާ އެވެ. ފިލްމުގެ ކެމެރާމަން އަކީ އަލީ ރަޝީދު (ގޮޅާ އައްޔަ) އެވެ. ފިލްމުގެ އެސިސްޓަންޓް ޑައިރެކްޓަރުގެ އިތުރުން ފިލްމުގެ ޓެކްނިކަލް މަސައްކަތް ކުރަނީ ވެސް އޭނާއެވެ.
ކުރީގެ ލަވަކިޔުންތެރިޔާ އަލީ ރަމީޒުގެ ދެ ލަވައެއް ހިމަނައިގެން އުފައްދާފައިވާ މި ފިލްމަކީ މަރީގެ ފުރަތަމަ ފީޗާ ފިލްމެވެ. ފިލްމު ޕްރޮޑިއުސް ކުރަނީ ޓެކްނޯ މީޑިއާ އިންނެވެ. މި ފިލްމުގައި ހިމެނެނީ ހަތަރު ލަވައެވެ.
