ނޫސްވެރިޔާ އަހުމަދު ރިލްވާން އަބްދުﷲ ވަގަށް ނެގި ކަމުގެ ދައުވާ ލިބޭ މުހައްމަދު ނޫރައްދީން ހުޅުމާލޭގައި ރަތް ކުލައިގެ ކާރެއް ދުއްވި ކަމަށް ބުނެ އޭނާއާއެކު އެއްވިޔަފާރީގައި މަސައްކަތް ކުރި އޭނާގެ ދެ ރައްޓެއްސަކު ކުރިމިނަލް ކޯޓުގައި ހެކި ބަސް ދީފި އެވެ.  

ގަދަކަމުން ރިލްވާން ފޮރުވާފައިވާ ކަމަށް ބުނެ ދައުލަތުން ތިން މީހެއްގެ މައްޗަށް ޓެރަރިޒަމްގެ ދައުވާ ކޮށްފައިވާއިރު އޭގެ ތެރެއިން ޝަރީއަތް ހިނގަނީ ގ.ހިލްޓަން، އާލިފް ރައޫފާއި ގދ. ވާދޫ، ކަރަންކާގޭ، މުހައްމަދު ނޫރައްދީންގެ މައްޗަށެވެ. މި މައްސަލައިގައި ހުޅުދޫ އަތިރިއާގޭ، މުހައްމަދު ސުއައިދުގެ މައްޗަށް ވެސް އެ ދައުވާ ކޮށްފައިވެ އެވެ. އެހެން ނަމަވެސް ސުއައިދު ރާއްޖޭގައި ނެތް ކަމަށާއި އޭނާ ރާއްޖެއިން ބޭރުގައި މަރުވެފައިވާ ކަމަށް ބެލެވޭ ކަމަށް ދައުލަތުން މީގެ ކުރިން ކޯޓްގައި ވަނީ ބުނެފައެވެ .އެހެން ކަމުން މި މައްސަލާގެ ޝަރީއަތް ކުރިއަށް ގެންދަނީ އޭނާ ނުހިމަނަ އެވެ.  

މި މައްސަލާގައި ހޯމަ ދުވަހު ބޭއްވި އަޑުއެހުމުގައި ނޫރައްދީނާއެކު ހުޅުމާލޭގައި ވޯޓާ ސްޕޯޓްސްގެ ވިޔަފާރީގައި ހަރަކާތްތެރިވި ދެ މީހަކު ހެކިބަސްދީފައިވެ އެވެ. އޭގެ ތެރެއިން ފުރަތަމަ ހެކިބަސްދިން މީހާ ބުނީ ރިލްވާން ގެއްލުނު ދުވަސްވަރު ރަތް ކުލައިގެ ކާރެއް ނޫރައްދީން ހުޅުމާލޭގައި ދުއްވި ކަމަށެވެ. އަދި  ބުނީ އެއީ އާލިފްގެ ކާރެއް ކަމަށް އޭނާ ގާތު ނޫރައްދީން ބުނި ކަމަށެވެ. އެހެން ނަމަވެސް އެ ކާރު ހުޅުމާލޭގައި ގެންގުޅުނު ދުވަސްވަރު ނޫރައްދީނާ އެކު އާލިފް އުޅެނިކޮށް ފެނިފައިނުވާ ކަމަށް އެނާ ވަނީ ބުނެފަ އެވެ. އޭގެ އިތުރުން ރިލްވާން ގެއްލުނު ރޭ ނޫރައްދީން އުޅުނީ ކިހިނެތްތޯ ދައުވާ ލިބޭ ދެ މީހުންގެ ދިފާއީ ވަކީލު އެހުމުން އޭނާ ބުނީ އެރޭ 8 އިން ފެށިގެން މެންދަމު 3 ޖަހަންދެން ނޫރައްދީން އުޅުނީ ސައިކަލުގައި އޭނާއާ އެއްކޮށް ކަމަށެވެ. މެންދަމު 3 ޖަހާކަން ހާއިރު ނޫރައްދީން ގެއަށް ގެންދިޔައީ ވެސް ސައިކަލުގައި އޭނާ ކަމަށާއި އެރޭ އެއްވެސް ވަރަކަށް ކާރު ބޭނުން ނުކުރާ ކަމަށް ބުންޏެވެ. ހަމަ އެހެންމެ އެރޭ ކާރު އޮތީ އާންމުކޮށް މަގުމަތީގައި އެ ކާރު ބާއްވާ ތަނުގައި ޕާކް ކޮށްފައި ކަމަށް ވެސް އޭނާ ބުންޏެވެ.  

މި އަޑުއެހުމުގައި ދެވަނަ އަށް ވެސް ހެކިބަސްދިން ނޫރައްދީނާ އެކު ވިޔަފާރީގައި މަސައްކަތް ކުރި އަނެއް މީހާ ވެސް ބުނީ ރިލްވާން ގެއްލުނު ދުވަސްވަރު ނޫރައްދީން ރަތް ކުލައިގެ ކާރެއް ހުޅުމާލޭގައި ގެންގުޅުނު ކަމަށެވެ. އެކަމަކު އޭނާ ބުނީ އެ ކާރުގެ އަސްލު ވެރިފަރާތަކީ ކާކުކަން އޭނާ އަށް ނޭނގޭ ކަމަށެވެ. ހެކިބަސް ދިން ނޫރައްދީންގެ ދެ ރައްޓެހިން ވެސް ބުނީ އެކާރު ބޭނުން ކުރަމުން ގެންދިޔައީ އެ ދުވަސްވަރު ޓޫރިސްޓުން އުފުލަން ކަމަށެވެ.  

ރިލްވާން ވަގަށް ނަގައިގެން ގެންދިޔަ ރަތްކުލައިގެ ކާރު އޮގަސްޓް، 2014 ގައި މާލެއިން ހުޅުމާލެ އަށް ގެންގޮސް އަދި ހަމަ އެ މަހު އަނބުރާ އެ ކާރު މާލެ ގެނެސްފައިވާ ކަމަށް ދައުލަތުން ކޮށްފައިވާ ދައުވާގައި ބުނެފައިވެ އެވެ. އެ ކާރު ގެންގޮސް އަދި އަދި އަނބުރާ ގެނައީ ވެސް އެއް ދޯންޏެއްގައި ކަމަށްވިއަސް ކާރު ގެނައި ވަގުތާއި ގެންދިޔަ ވަގުތު ހުރީ ދެ ކައްޕި އެއް ކަމަށް ދައުލަތުން ބުނެ އެވެ. އެހެންވެ އެ ދެ ކައްޕި ވަކި ވަކިން ވަނީ ކޯޓަށް ހާޒިރުކޮށް ހެކިބަސް ނަގާފަ އެވެ.  

ރަތް ކުލައިގެ ކާރެއް ހުޅުމާލެ އަށް ގެންދިއުމަށް ފަހު މާލެ އަނބުރާ ގެނައި ކަމަށް އެ ދެ މީހުން ބުންޏެވެ. ނަމަވެސް ދެ މީހުންވެސް ބުނީ އެއީ ކާކުގެ ކާރެއް ކަމެއް ބުނަންނ ނޭނގޭ ކަމަށާއި ނަމަވެސް އެއީ ޕްރައިވެޓް ކާރެއް ކަން ޔަގީނުން ވެސް ބުނަން އެނގޭ ކަމަށެވެ. އެ ކާރު ގެންދިޔަ ވަގުތު ހުރި ކައްޕި އެ ކާރު ގެނައި ވަގުތު ދޯނީގައި ނެތުމުން ދެ މީހުނަށް ވެސް އެއީ އެއްކާރެއް ކަމަށް ބުނެދޭން ނޭނގޭ ކަމަށް ވެސް ވަނީ ބުނެފަ އެވެ.  

ދޯނީގައި ކާރު ގެންދިޔަ އިރުއާއި އަނބުރާ ގެނައިއިރު ދޯނީގެ ކައްޕިއަށް ހުރި ދެ މީހުން ގާތުން ވެސް ވަނީ ޝަރީއަތުގައި ދައުވާލިބޭ އާލިފާއި ނޫރައްދީން ދެއްކުމަށް ފަހު، އެކަމުގައި ހަރަކާތްތެރިވަނިކޮށް އެ މީހުން އެތަނުން ފެނުންތޯ އަހާފަ އެވެ. ނަމަވެސް ދެ މީހުން ވެސް ބުނީ ދައުވާލިބޭ ދެ މީހުންގެ ތެރެއިން އެކަކު ވެސް އެކަމުގައި ހަރަކާތްތެރިވެފައި ނެތް ކަމަށެވެ.

މީގެކުރިން ބޭއްވި އަޑުއެހުމުގައި ރިލްވާންގެ ބޭބެ މޫސާ ރިލްވާންގެ ހެކިބަސް ނަގަން ދައުލަތާއި ދިފާއީ ވަކީލާ ދެމެދު ޚިޔާލު ތަފާތުވުމުން އެ މައްސަލަ ބައްލަވާ ގާޒީ އާދަމް އާރިފް ނިންމަވާފައިވަނީ އެކަމާ މެދު މިއަދު ގޮތެއް ނިންމުމަށެވެ. އެކަމަކު މި އަޑުއެހުމުގައި ގާޒީ އާރިފް ވިދާޅުވި ގޮތުގައި އެކަމުގައި ގޮތެއް ނިންމަވާނީ ދެ ފަރާތުން މިހާރު ހުށަހަޅާފައި ތިބި ހުރިހާ ހެކިންގެ ހެކިބަސް ނަގައި ނިންމުމަށް ފަހު އެވެ.