މައާފަށް އެދޭނީ މައްސަލަ ކޯޓުން ނިމުމުން:ސަންގު ޓީވީ
9 އެޕްރީލު 2018 | ހޯމަ 04:12ޖޫރިމަނާ ކޮށްފައިވަނީ 1 ލައްކަ ރުފިޔާއިން
ސަންގު ޓީވީގެ މެނޭޖިން ޑިރެކްޓަރު އިބްރާހިމް ވަހީދު (އަސްވާޑް)
ސަންގު ޓީވީ އެއްލައްކަ ރުފިޔާ އިން ޖޫރިމަނާކޮށް މާފަށް އެދެން އެންގި ނަމަވެސް މައާފަށް އެދޭނީ ޖޫރިމަނާ ކުރި މައްސަލަ ކޯޓުން ނިމޭ ގޮތުގެ މަތިން ކަމަށް ސަންގު ޓީވީން ބުނެފިއެވެ.
ބްރޯޑްކާސްޓް ކޮމިޝަނުން ސަންގު ޓީވީ އެއް ލައްކަ ރުފިޔާއިން ޖުރިމާނާކޮށްފައި މިވަނީ މިދިޔަ ޑިސެމްބަރު މަހުގެ އަށް ވަނަ ދުވަހުގެ ރޭ މުސްތަފާ ދެއްކެވި ވާހަކަތަކެއް ވަގުތުން ގެނެސްދެމުން ދަނިކޮށް ރައީސް އަބްދުﷲ ޔާމީންގެ އަބުރުފުޅަށް ހުތުރުވާ ގޮތަށް މުސްތަފާ "އަވަގުރާނަ ގޮވި" ކަމަށް ބުނެއެވެ.
މާފަށް އެދޭނީ އެ މައްސަލާގައި ޝަރީއަތުން ގޮތެއް ނިންމުމުންކަން ހާމަކުރީ ހޮނިހިރު ދުވަހު ރޭ އެ ސްޓޭޝަންގެ އަށެއްގެ ޙަބަރުގެ ތެރެއިން ސަންގު ޓީވީގެ މެނޭޖިން ޑިރެކްޓަރު އިބްރާހިމް ވަހީދު (އަސްވާޑް) އެވެ.
އަސްވާޑް ވިދާޅުވީ އެ ސްޓޭޝަން އެއް ލައްކަ ރުފިޔާ އިން ޖޫރިމަނާކުރުމަކީ ބަލައިގަންނަ ނިންމުމެއް ނޫން ކަމަށެވެ. އެކަމަކު މި މައްސަލަ ކޯޓަށް ހުށަހެޅެން އޮތީ ޖޫރިމަނާ ފައިސާ ދެއްކުމަށްފަހު ކަމަށްވާތީ ޖޫރިމަނާ ފައިސާ ކޮމިޝަނަށް ދެއްކުމަށްފަހު ކޯޓަށް ހުށަހަޅައިގެން ކޯޓުން ނިންމާ ގޮތެއްގެ މަތިން ނޫން ގޮތަކަށް މައާފަށް ނޭދޭނެ ކަމަށް އަސްވާޑް ވިދާޅުވި އެވެ.
މިމައްސަލާގައި ކޯޓުން ގޮތެއް ނުނިންމަނީސް މައާފަށް އެދިއްޖެނަމަ އަސްވާޑް ވިދާޅުވީ ސަންގު ޓީވީއަށް އިއާދަނުކުރެވޭ ވަރުގެ ބޮޑު ގެއްލުމެއް ލިބިދާނެ ކަމަށެވެ.
މިއީ އަބުރުގެ ގާނޫނުގެ ދަށުން ސަންގުޓީވީ ޖޫރިމާނާ ކުރި ފުރަތަމަ ފަހަރެވެ.
