މިލީ ބޮބީ ބްރައުންގެ މުސާރަ ބޮޑުކޮށްފި

ސްޓްރޭންޖަރ ތިންގްސްގެ ޗައިލްޑް ތަރި މިލީ ބޮބީ ބްރައުންގެ މުސާރަ ބޮޑުކޮށްފި ކަމަށް މީޑިއާ ރިޕޯޓްތައް ބުނެފިއެވެ.

ނެޓްފްލިކްސް އޮރިޖިނަލް ސީރީޒް ސްޓްރޭންޖަރ ތިންގްސްގެ ތަރި މިލީ ބޮބީ ބްރައުންގެ މުސާރަ ބޮޑުކޮށްފައިވަނީ އެ ސީރީޒްގެ ތިންވަނަ ސީޒަންއަށެވެ.

މުނިފޫހިފިލުވުމުގެ ދާއިރާތަކުގެ ޚަބަރުތައް ފަތުރާ ނޫހެއް ކަމަށްވާ ޓީއެމްޒީން ރިޕޯޓް ކޮށްފައިވާގޮތުގައި މިލީ ތިންވަނަ ސީޒަންގެ މުސާރަ ބޮޑު ކޮށްފައިވަނީ ފުރަތަމަ ދެ ސީޒަނުގައި އޭނާއަށް އޮތް ތަރުހީބު ބޮޑުވުމުގެ ސަބަބުންނެވެ. މީގެ ކުރިން އޭނާ ތިންވަނަ ސީޒަންގެ އެޕިސޯޑަކަށް ކަނޑައަޅާފައި އޮތީ 250 ހާސް ޑޮލަރު ކަމަށާއި އެހެން ނަމަވެސް މިހާރު އެޕިސޯޑަކަށް 350 ހާސް ޑޮލަރަށް ބޮޑު ކޮށްފައިވާ ކަމަށް އެ ނޫހުން ވަނީ ރިޕޯޓު ކޮށްފައެވެ. މި ސީޒަނުގައި ހިމެނެނީ ނުވަ އެޕިސޯޑެވެ. އެހެން ކަމުން އޭނާއަށް ތިންވަނަ ސީޒަނުގައި ޖުމްލަ 3.15 މިލިއަން ޑޮލަރު ލިބޭނެއެވެ.

ސްޓްރޭންޖަރ ތިންގްސް އަކީ އެމެރިކާގެ "ސައިންސް ފިކްޝަން" ބިރުވެރި ސީރީޒްއެކެވެ. ދަ ޑަފާ ބްރަދާސް ޑައިރެކްޓް ކޮށްފައިވާ މި ސީރީޒްގެ ފުރަތަމަ ސީޒަން ދައްކާފައިވަނީ 2016 ވަނަ އަހަރުގެ ޖުލައިމަހުގައެވެ.

މި ސީރީޒްގައި މިލީގެ އިތުރުން ފެނިގެންދާ ބައެއް ތަރިންގެ ތެރޭގައި ވިނޯނާ ރައިޑާ، ޑޭވިށް ހާބަރ، ފިން ވޮލްފް ހާޑް ހިމެނެއެވެ.މި ސީރީޒްގެ ދެވަނަ ސީޒަން މިދިޔަ އަހަރު އޮކްޓޯބަރު މަހުގެ 27ގައި ދައްކަން ފަށާފައިވާއިރު ކުރިއަށް އޮތް ތިންވަނަ ސީޒަން ދައްކަން ފަށާނީ އަންނަ އަހަރުގައެވެ. ދަ ޑަފާ ބްރަދާސް ބުނެފައިވަނީ މި ސީރީޒް ނިންމާލާނީ ހަތަރުވަނަ ނުވަތަ ފަސްވަނަ ސީޒަނާއި އެކީގައިކަމަށެވެ.