ނިމާލް އާއި ޖުމަލް ފުރަތަމަ ފަހަރަށް ފިލްމަކުން ފެންނަނީ

ދަރިފުޅާއި އެކު ފުރަތަމަ ފަހަރަށް ފިލްމަކުން ފެންނާނެކަމަށް މަޝްހޫރު ޑައިރެކްޓަރ އަދި ފިލްމީ ތަރި އަހުމަދު ނިމާލް ބުނެފިއެވެ.

ނިމާލްގެ ފޭސްބުކްގައި އާންމު ކޮށްފައިވާ ޕޯސްޓެއްގައި ބުނެފައިވަނީ އޭނާ އާއި ދަރިފުޅު ޖުމަލް އެކީގައި ފެނިގެންދާ ފިލްމު މިހާރު ފައިނަލް ވެފައިވާކަމަށާއި ފިލްމުގެ ޝޮޓްތައް ނަގާނީ ރާއްޖެއާއި ސްރީ ލަންކާގައި ކަމަށެވެ. ޖުމަލް އެންމެ ފަހުން ފެނިގެން ގޮސްފައިވަނީ ޑާކްރެއިން އެންޓަޓައިންމަންޓުގެ ފިލްމެއް ކަމަށްވާ ވަކިން ލޯބިން އިންނެވެ.

ކާމިޔާބު ފިލްމުތަކެއް ކުޅެފައިވާ ނިމާލް، އޭނާގެ ދަރިފުޅާއެކީ ފިލްމަކުން ފެނިގެންދާނެ ކަމަށް އިއުލާން ކޮށްފައިވާއިރު ފިލްމީ ދާއިރާ އަށް ޖުމަލް ނެރުނީވެސް އޭނާއެވެ. އެއީ 2014 ވަނަ އަހަރު ނެރުނު ފިލްމު "އަނިޔާ" އެވެ. ޖުމަލް އަށް ވަނީ އެ ފިލްމުން އެ ފަހަރު އެންމެ މޮޅު އާ އެކްޓަރުގެ އެވޯޑު ލިބިފައެވެ. މިފަހަރުގެ ދިވެހި ފިލްމު އެވޯޑްސްގައި ޖުމަލް އަށް ވަނީ ޑާކް ރެއިން އެންޓަޓައިންމަންޓްގެ "ވާށޭ މަށާއެކީ" ގައި އޭނާ ކުޅުނު ބައިން ހޯދި އެންމެ މޮޅު އެކްޓަރުގެ އެވޯޑުވެސް ލިބިފައެވެ.

މި އެވޯޑްތަކާއި ގުޅިގެން ދަރިފުޅު ހޯދަމުން އަންނަ ކާމިޔާބީތަކަށް ވަރަށް ފަހުރުވެރިވާ ކަމަށް ނިމާލް ބުނެފައިވެ އެވެ.އަދި ޖުމަލް ބުނެފައިވަނީ އޭނާ އަށް އެ ހިސާބަށް އާދެވުނީ ނިމާލްގެ ދަރިއަކަށް ވުމުންކަމަށާއި ފިލްމީ ދާއިރާ އިން ކުރިއަށް ދާން މުޅި އާއިލާ އިން ލިބޭ އެއްބާރުލުމަށް ޝުކުރު ވަނީ އަދާކޮށްފައެވެ.