އެމްއެންޔޫ އިން ފުރަތަމަ ފަހަރަށް ޕީއެޗްޑީ ހާސިލްކުރި ދެ ފަރާތް ދަސްވެނިވިއްޖެއެވެ.
މޯލްޑިވްސް ނޭޝަނަލް ޔުނިވަރސިޓީ (އެމްއެންޔޫ)ގެ ދަސްވެނިވުމުގެ ރަސްމިއްޔާތުގައި ޕީއެޗްޑީ ހާސިކޮށްފައި ވަނީ ސުނައިނާ ރަޝީދާއި އާއިޝަތު އަލީއެވެ. މި ދެ ފަރާތް ވެސް ޕީއެޗްޑީ ހާސިލްކޮށްފައި ވަނީ ތައުލީމީ ދާއިރާއިންނެވެ.
އެގޮތުން ސުނައިނާ ތީސިސް ލިޔެފައި ވަނީ ޓީޗަރުން ތަމްރީނު ކުރަމުން އަންނަ ގޮތާ ދިމާވާ ގޮންޖެހުންތަކާ ގުޅޭ ގޮތުންނެވެ. އަދި ކުރިމަގުގައި އެ ތަމްރީނުތައް ރާވައި ހިންގާނެ ގޮތްތަކާ ބެހޭ ގޮތުން ވެސް މައުލޫމާތު ހިމަނާފައި ވެއެވެ. އާއިޝަތުގެ ތީސިސް ނުވަތަ ރިސަރޗް ރިޕޯޓް ހާއްސަކޮށްފައި ވަނީ ރާއްޖޭގެ ތައުލީމީ ސިޔާސަތުތަކާ ގުޅޭ ގޮތުންނެވެ.
ހޯމަ ދުވަހުގެ ރޭ ދަރުބާރުގޭގައި ބޭއްވި ދަސްވެނިވުމުގެ ރަސްމިއްޔާތުގައި ތަފާތު އެކި ކޯސްތަކުން 290 ދަރިވަރުން ސެޓްފިކެޓް ހާސިލްކޮށްފައިވެއެވެ.