ކޮންމެ ނަތީޖާއެއް ނުކުތަސް ވިސްނާނީ ރަނގަޅު ކަންކަމަށް: ބޫޓާން ކޯޗު
26 މާރިޗު 2018 | ހޯމަ 12:26އެ ޓީމަށް އޭޝިއަން ކަޕަށް ކޮލިފައިވުމުގެ ފުރުސަތު އެއްކޮށް ވަނީ ގެއްލިފައި
ބޫޓާންގެ ކޯޗު ޓްރެވަރ މޯރގަން
އޭއެފްސީ އޭޝިއަން ކަޕް ކޮލިފައިންގެ ފަހު މެޗުގައި މާދަމާ ރާއްޖެއާ ދެކޮޅަށް ކުޅޭ މެޗުގައި ކޮންމެ ނަތީޖާއެއް ނުކުން ކަމުގައި ވިޔަސް ވިސްނާނީ މެޗުން ފެންނަ ރަނގަޅު ކަން ކަމަށް ކަމަށް ބޫޓާންގެ ކޯޗު ޓްރެވަރ މޯރގަން ބުނެފިއެވެ.
މާދަމާގެ މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަމުން ޓްރެވަރ ބުނީ މާދަމާގެ މެޗަކީ ވަރަށް ރަނގަޅު ޓެސްޓަކަށް ވާނެ މެޗެއް ކަމަށާއި ކޮންމެ ނަތީޖާއެއް ނުކުން ކަމުގައި ވިޔަސް ވިސްނާނީ މެޗުން ފެންނަ ރަނގަޅު ކަން ކަމަށް ކަމަށެވެ. އޭނާ ބުނީ މިހާރު އަންނަނީ ޓީމުގެ ކުޅުންތެރިންނާއި އެ ކުޅުންތެރިންގެ ފެންވަރު ދަސްކުރަމުން ކަމަށާއި ވާދަވެރި މެޗެއް ކުޅުމުގެ ފުރުސަތު ލިބުމަކީ ވަރަށް ހިތްހަމަޖެހޭ ކަމެއް ކަމަށެވެ.
ޓްރެވަރ ބުނީ ނަތީޖާއާ މެދު ވެސް ވިސްނާނެ ކަމަށާއި އެހެން ނަމަވެސް ނަތީޖާއަށް ވުރެ ބޮޑަށް ވިސްނާނީ ޓީމުގެ ފަރާތުން ފެންނަ ކުޅުމަށް ކަމަށެވެ. އޭނާ ބުނީ މިއީ ޓީމުގެ ފެންވަރު އަގުވަޒަންކޮށްލަން ލިބޭ ވަރަށް ރަނގަޅު ފުރުސަތެއް ކަމަށެވެ.
މާދާމާގެ މެޗަށް ބޫޓާން ނުކުންނައިރު އެ ޓީމަށް އޭޝިއަން ކަޕަށް ކޮލިފައިވުމުގެ ފުރުސަތު އެއްކޮށް ވަނީ ގެއްލިފައެވެ. ކޮލިފައިންގެ ގްރޫޕްގައި ކުޅުނު ހުރިހާ މެޗަކުން ބޫޓާން ބަލިވެފައިވާއިރު ރާއްޖެއާ ދެކޮޅަށް އަމިއްލަ ގައުމުގައި ކުޅުނު މެޗުން ބޫޓާން ބަލިވީ 2-0 ގެ ނަތީޖާއަކުންނެވެ.
