ނޯޔާ އެނބުރި އަންނަން މާ ގިނަ ދުވަސްތަކެއް ނެތް

ބަޔާން މިއުނިކްއަށް ކުޅެމުން އަންނަ ޖަރުމަނުގެ އެއް ނަމްބަރު ކީޕަރު މެނުއެލް ނޯޔާ އަނިޔާއިން ސަލާމަތްވެ އެނބުރި އަންނަން މާ ގިނަ ދުވަހެއް ނެތް ކަމަށް އޭނާ ބުނެފިއެވެ.

ނޯޔާއަށް އަނިޔާވީ މިދިޔަ އަހަރުގެ ސެޕްޓެމްބަރު މަހުގެ ތެރޭގައެވެ. ބަޔާންގެ ފަރިތަކުރުންތަކުގެ ތެރެއިން އޭނާގެ ފަޔަށް ލިބުނު އަނިޔާއަކާ ގުޅިގެން ނޯޔާ ވަނީ ފައިގެ ސާޖަރީއެއް ވެސް ފުރިހަމަކޮށްފައެވެ. ނޯޔާގެ ފައިގެ ކައްޓަށް ގެއްލުން ވެފައިވާ ކަމަށް ބަޔާންގެ ޑޮކްޓަރުން ބުނިއިރު މިދިޔަ ސީޒަނުގެ ގިނަ މެޗުތަކެއް ވެސް އޭނާގޭ ފަޔަށް ލިބުނު އަނިޔާއަކާ ގުޅިގެން ގެއްލުނެވެ. މި އަނިޔާގެ ސަބަބުން މިދިޔަ ސެޕްޓެމްބަރު މަހުގެ ފަހުން އޭނާ އެއްވެސް މެޗެއް ކުޅެފައެއް ނުވެއެވެ.

ބަޔާންގެ އޮފިޝަލް ޓީވީ ޗެނަލާ ވާހަކަ ދައްކަމުން ނޯޔާ ބުނީ އޭނާގެ ފަޔަށް މިހާރު އެއްވެސް ވަރަކަށް ތަދުނުވާ ކަމަށާއި ދުވުމުގެ ތަމްރީނުތަކެއް ވެސް ފުރިހަމަކޮށްފައިވާ ކަމަށެވެ. އެގޮތުން ދުވުމުގެ ތަމްރީނުތައް ފުރިހަމަކުރެވުމަކީ އަނިޔާ އިން އެނބުރި އާދެވޭނެ ކަމުގެ ފެހި ސިގްނަލެއް ކަމަށާއި ސްކޭންތަކެއް އަދިވެސް ފުރިހަމަކުރަން ޖެހޭ ކަމަށެވެ. ސްކޭންތަކަށް ފަހު ކުރިޔަށް އަޅަން ޖެހޭ ފިޔަވަޅު އެނގިގެންދާނެ ކަމަށާއި ހުރިހާ ކަމެއް ވެސް ކުރިޔަށް ގެންދަނީ ވަރަށް ފަރުވާތެރިކަމާ އެކު ކަމަށް ނޯޔާ ބުނެފައި ވެއެވެ. ނޯޔާ ބުނީ ހުރިހާ ކަމެއް ވެސް ރަނގަޅަށް ދާނަމަ އަންނަ ހަފްތާގެ ތެރޭގައި ފަރިތަކުރުންތަކަށް ނުކުމެވޭނެ ކަމަށް ޑޮކްޓަރުން ބުނެފައިވާ ކަމަށެވެ.

އަނިޔާ ރަނގަޅުވަމުންދާ ނަމަވެސް އެއްވެސް ހާލެއްގައި ކުޅުމުގެ ތެރެއަށް އާދެވޭނެ ދުވަހެއް ޔަގީންކޮށް ބުނަން ނޭނގޭ ކަމަށް ނޯޔާ ބުނެފައިވެއެވެ. އޭނާ ބުނީ ކަންކަން އަވަސްކޮށްލައިފި ނަމަ ލިބޭ ގެއްލުން މާ ބޮޑުވާނެ ކަމަށާއި އޭނާގެ ކެރިއަރު ނިމުމަކީ ވެސް އެކަށީގެންވާ ކަމެއް ކަމަށެވެ. ނޯޔާ ބުނީ ކަންކަން ރޭވުމެއްގެ ދަށުން ކުރިޔަށް ގެންދަނީ އެ ސަބަބަށްޓަކައި ކަމަށާއި ހުރިހާ ކަމެއް ވެސް ކުރަމުންދަނީ ފިޔަވަޅަކަށް ފަހު ފިޔަވަޅެއް ކަމަށެވެ.

ނޯޔާ ބުނީ ފުލް ފިޓްނެސްއަށް ވަރަށް އަވަހަށް އާދެވޭނެ ކަމަށް ގަބޫލުކުރާ ކަމަށާއި މިވަގުތު ގޯސްކޮށް އެއްވެސް ކަމެއް ނުދާ ކަމަށެވެ. ކުޅުމާ ދުރުގައި ގިނަ ދުވަހު ހުންނަން ޖެހުމަކީ ވަރަށް ދެރަވާ ކަމެއް ކަމަށާއި އެއްވެސް އެތުލީޓަކަށް އަނިޔާއިން ސަލާމަތްވުމަށް ކުރާ މަސައްކަތަކީ ފަސޭހަ މަސައްކަތެއް ނޫން ކަމަށް ނޯޔާ ބުނެފައި ވެއެވެ.

އެ ޓީމުގެ ކޯޗު ޔޯކިމް ލޯ ބުނެފައި ވަނީ ނޯޔާ ވޯލްޑް ކަޕްގައި ކުޅެން ބޭނުންވާ ނަމަ ސީޒަނުގެ ކޮންމެ ވެސް ހިސާބަކުން ފެންނަންޖެހޭ ކަމަށެވެ. ޖަރުމަނުގެ ގައުމީ ޓީމުގައި ނޯޔާގެ މަގާމު މިހާރު ފުރަމުން އަންނަނީ ބާސެލޯނާގެ ކީޕަރު މާކް އެންޑަރ ޓާސްޓީޖެންއެވެ.