19 އަހަރުން ދަށުގެ ގައުމީ ބީޗް ވޮލީ ޓީމުތައް ތައިލެންޑަށް
22 މާރިޗު 2018 | ބުރާސްފަތި 11:58ރާއްޖޭގެ ދެ ޓީމުގައި ހިމެނޭ ކުޅުންތެރިންނަކީ ވެސް މައިލޯ ކަލަރސް އެވޯޑު ހާސިލުކޮށްފައިވާ ކުޅުންތެރިން
ބީޗް ވޮލީ ޓީމުތަކުގައި ހިމެނޭ ކުޅުންތެރިން ވަނީ ސްޕޯޓްސް މިނިސްޓަރާ ބައްދަލުކޮށްފައި
ތައިލެންޑުގައި ފެށުމަށް ހަމަޖެހިފައިވާ 19 އަހަރުން ދަށުގެ އޭޝިއަން ބީޗް ވޮލީ ޗެމްޕިއަންޝިޕްގައި ވާދަކުރުމަށް ރާއްޖޭގެ އަންހެން އަދި ފިރިހެން ގައުމީ ޓީމުތައް އެ ގައުމަށް ފުރައިފިއެވެ.
އަންނަ ހަފްތާގެ އާދިއްތަ ދުވަހު މި މުބާރާތް ފަށާއިރު މި މުބާރާތުގައި ވާދަކުރުމަށް ރާއްޖޭގެ އަންހެން އަދި ފިރިހެން ޓީމު ވެސް ފުރާފައި ވަނީ އިއްޔެގެ ވަގުތެއްގައެވެ. އަންހެން ޓީމުގައި ވެސް އަދި ފިރިހެން ޓީމުގައި ވެސް ދެ ކުޅުންތެރިން ހިމެނޭއިރު މި ޓީމުތަކާ އެކު ދެ އޮފިޝަލުން ވެސް ތައިލެންޑަށް ދަތުރުކުރި ކަމަށް ވޮލީބޯލް އެސޯސިއޭޝަނުން މައުލޫމާތުދެއެވެ.
މި މުބާރާތުގައި ވާދަކުރާ ރާއްޖޭގެ އަންހެން ޓީމުގައި ހިމެނެނީ ނިމިގެންދިޔަ އިންޓަ ސްކޫލް ވޮލީބޯލް މުބާރާތުގައި ބޮޑު ކާމިޔާބުތަކެއް ހޯދި ބ. ގޮއިދޫ ޓީމުގައި ހިމެނުނު ދެ ކުޅުންތެރިންނެވެ. ރާއްޖޭގެ ދެ ޓީމުގައި ހިމެނޭ ކުޅުންތެރިންނަކީ ވެސް މައިލޯ ކަލަރސް އެވޯޑު ހާސިލުކޮށްފައިވާ ކުޅުންތެރިން ކަމަށާއި އެ ކުޅުންތެރިން މިހާރު ކިޔަވަމުންދަނީ ސްކޮލާޝިޕްގެ ދަށުން ކަމަށް ވެސް ވޮލީބޯލް އެސޯސިއޭޝަނުން މައުލޫމާތުދެއެވެ.
ރާއްޖޭގެ ކުޅުންތެރިން ތައިލެންޑަށް ފުރުމުގެ ކުރިން މިނިސްޓަރ އޮފް ޔޫތު އެންޑް ސްޕޯޓްސް އިރުތިޝާމް އާދަމް ވަނީ އެ ކުޅުންތެރިންނާއި ބައްދަލުކޮށް ހިތްވަރުދެއްވާފައެވެ. މި މުބާރާތް ކުރިޔަށްދާނީ ތިން ދުވަހުގެ މުއްދަތަކަށް ކަމަށް ވޮލީބޯލް އެސޯސިއޭޝަނުން ބުނެއެވެ.
