ރަހުމަތްތެރިކަމުގެ މެޗެއް ކުޅުމަށް ގައުމީ ފުޓްބޯޅަ ޓީމު ސިންގަޕޫރަށް ފުރައިފިއެވެ.

ޖުމްލަ 23 ކުޅުންތެރިންގެ ސްކޮޑެއް ގައުމީ ޓީމުން ނެގި ނަމަވެސް މި ދަތުރުގައި އަނިޔާގެ ސަބަބުން ކެޕްޓަން އަލީ އަޝްފާގު ބައިވެރިވެފައެއް ނުވެއެވެ. އާ ކޯޗެއްގެ އިރުޝާދުގެ ދަށުން ގައުމީ ޓީމު ނުކުންނައިރު މި މެޗު ވެގެންދާނީ ގައުމީ ޓީމުގެ ކޯޗުގެ މަގާމާ އަލަށް ހަވާލުވި ކްރޮއޭޝިއާގެ ޕީޓާރ ސެގެޓްގެ ގައުމީ ޓީމު ކުޅޭ ފުރަތަމަ މެޗަށެވެ.

ސިންގަޕޫރަށް ފުރި ސްކޮޑުގައި އެންމެ ގިނައިން ހިމެނިފައި ވަނީ ނިއު ރޭޑިއަންޓް ސްޕޯޓްސް ކްލަބްގެ ކުޅުންތެރިންނެވެ. އެ ކްލަބްގެ އަށް ކުޅުންތެރިން ހިމެނޭއިރު މާޒިޔާ ސްޕޯޓްސް އެންޑް ރެކްރިއޭޝަންގެ ފަސް ކުޅުންތެރިޔަކު ހިމެނިފައިވެއެވެ. ޓީސީ ސްޕޯޓްސް ކްލަބް އަދި ކްލަބް އީގަލްސްގެ ތިން ކުޅުންތެރިން ހިމެނިފައިވާއިރު ކްލަބް ގްރީން ސްޓްރީޓްސް އިން ހިމެނިފައި ވަނީ ދެ ކުޅުންތެރިންނެވެ. ހަމައެހެންމެ ޔުނައިޓެޑް ވިކްޓްރީ އަދި ވިކްޓްރީ ސްޕޯޓްސް ކްލަބްއިން ގައުމީ ޓީމުގެ ސްކޮޑުން ފުރުސަތު ލިބުނީ ކޮންމެ ޓީމަކުން އެންމެ ކުޅުންތެރިޔަކަށެވެ.

ނިއުއިން ގައުމީ ޓީމަށް ނަގާފައިވަނީ ކެޕްޓަން އަލީ އަޝްފާގު (ދަގަނޑޭ)، އަކްރަމް އަބްދުލް ޣަނީ (އަކޫ) މުހައްމަދު އުމައިރު، ހަމްޒާ މުހައްމަދު (ހަމްޕު) އަލީ ފާސިރު (ސެންޓޭ) ހިސާމް ސަލީމް (ކޮކީ) އަދި ރިހާމް އަބްދުލް ޣަނީ (ބޮބީ) ގެ އިތުރުން ކީޕަރު މުހައްމަދު ފައިސަލްއެވެ. މާޒިޔާއިން ޓީމުގައި ހިމެނިފައިވަނީ ސަމޫހު އަލީ (ސަމުއްޓެ)، ޔަސްފާދު ހަބީބް (މުލަކޭ)، މުހައްމަދު އިރުފާނު (އިރޭ) އަދި މުޖުތާޒު މުހައްމަދު (މުޖޭ) ގެ އިތުރުން ހުސައިން ޝަރީފްއެވެ.

ހަމައެހެންމެ ޓީސީގެ އިބްރާހިމް މަހުދީ ހުސައިން (ފޭދޫ އިއްބެ) އަދި އިބްރާހިމް ވަހީދުގެ އިތުރުން އައްޒާމް އަބްދުﷲ ހިމެނުނުއިރު ކްލަބް އީގަލްސްއިން ގައުމީ ޓީމަށް ހޮވުނީ މުހައްމަދު ނާއިމް އަދު ހުސައިން ޝިފާއު މޫސާގެ އިތުރުން އަހުމަދު ނޫމާން (ހެލްމެޓް) އެވެ. ގްރީން ސްޓްރީޓްސްގެ އަސްހަދު އަލީ (އަޑުބަރޭ) އަދި އަބްދުﷲ ޔާމީން ސްކޮޑަށް ނަގާފައިވާއިރު ވިކްޓްރީގެ ހުސައިން ނިހާން އަދި ޔުނައިޓެޑް ވިކްޓްރީގެ ހަސަން ތޮލާލްއަށް ވެސް ވަނީ ގައުމީ ޓީމުން ފުރުސަތުދީފައެވެ.

މިފަހަރުގެ ގައުމީ ޓީމުން ބައެއް ސީނިއާ ކުޅުންތެރިންނަށް ފުރުސަތު ދީފައެއް ނުވެއެވެ. އެގޮތުން މުހައްމަދު އާރިފް (ބަކާ) އާއި އަހުމަދު އަބްދުﷲ (ލިލީ) އަދި ޝާފިއު މުހައްމަދު (ޝާފީ) ގެ އިތުރުން މުހައްމަދު ރަޝީދު (ހޮކޭ) އަށް ފުރުސަތު ދީފައެއް ނުވެއެވެ. ހަމައެހެންމެ ގައުމީ ޓީމުން ފަހަކަށް އައިސް ގަވާއިދުން ފުރުސަތު ހޯދަމުންދިޔަ އަހުމަދު ރިޒުވާން (ރިޒޭ ) އަދި ނާއިޒު ހަސަން (ދާދު) އަށް ވެސް ފުރުސަތު ދީފައެއް ނުވެއެވެ.

ސިންގަޕޫރާ ދެކޮޅަށް ރަހުމަތްތެރިކަމުގެ މެޗެއް ކުޅެނީ އަންނަ ހަފްތާގެ އަންގާރަ ދުވަހު ބޫޓާނާ ދެކޮޅަށް އަމިއްލަ ދަނޑުގައި ކުޅޭ އޭއެފްސީ އޭޝިއަން ކަޕް ކޮލިފައިން މެޗަށް ތައްޔާރުވުމުގެ ގޮތުންނެވެ. މިއީ ކޮލިފައިންގައި ރާއްޖެ ކުޅޭ އެންމެ ފަހު މެޗަށްވާއިރު ރާއްޖެ ހިމެނޭ ގްރޫޕުގެ ތިންވަނައިގައި އޮތީ ރާއްޖެއެވެ. އޭޝިއަން ކަޕަށް ކޮލިފައިވުމުގެ ފުރުސަތު ރާއްޖެ އަދި ބޫޓާނަށް ވެސް ވަނީ ގެއްލިފައެވެ.