ތިޔަ ލޯތްބާ ދުރަށްގެ ޕޯސްޓަރ ރިލީޒްކޮށްފި

އަންނަ އެޕްރީލް މަހުގެ 21 ގައި ނެރޭ ދިވެހި ފިލްމު "ތިޔަ ލޯތްބާ ދުރަށް" ގެ ޕޯސްޓަރ ރިލީޒް ކޮށްފިއެވެ.

ރޭ ބޭއްވި ހަފުލާއެއްގައި ފިލްމުގެ ޕޯސްޓަރު ރިލީޒްކޮށްފައިވަނީ ފިލްމީ ތަރި ޔޫސުފް ޝަފީއު (ޔޫއްޕެ) އެވެ. ފިލްމުގެ ޕްރޮމޯޝަނަލް ލަވައެއް އަދި ޓީޒާ ޓްރެއިލާއެއް މިހާރުވަނީ ރިލީޒްކޮށްފައެވެ. އަދި ފިލްމުގެ ބޮޑުބައެއް ވަނީ ނިންމާލާފައެވެ.

ތިޔަ ލޯތްބާ ދުރަށްގެ ޕޯސްޓަރ

އާންމުކޮށްފައިވާ މި ފިލްމުގެ ޕްރޮމޯޝަނަލް ލަވައިގެ މިއުޒިކް ހަދައި، ލަވަ ކިޔާފައިވަނީ އިބްރާހިމް ނިފާރް (ތިއްތި) އެވެ. ޅެން ހަދާފައި ވަނީ އިސްމާއިލް މުބާރިކެވެ.

މި ފިލްމުގެ ހުރިހާ މަންޒަރެއް ޝޫޓްކޮށްފައި ވަނީ ސްރީލަންކާގައެވެ. މި ފިލްމަކީ ތިނެސްކަން ލޯބީގެ ވާހަކައެއްގެ މައްޗަށް ބިނާކޮށް އުފައްދާފައިވާ ފިލްމެކެވެ.

މި ފިލްމުގެ ކާސްޓުންގެ ތެރޭގައި ހިމެނެނީ އަހުމަދު އަޒްމީލް (އަޒޭ)، މަލީހާ ވަހީދު (މަލް) އަދި އަހުމަދު އަމަން (ޓޮމް)ގެ އިތުރުން މަރިޔަމް ޝަހްޒާއެވެ. މި ފިލްމުގެ ވާހަކަ ލިޔެ، ފިލްމު ޑައިރެކްޓް ކޮށްފައިވަނީ މަރިޔަމް މޫސާއެވެ. "ތިޔަ ލޯތްބާއި ދުރަށް" އަކީ މަރިޔަމް މޫސާގެ ފުރަތަމަ ފީޗާ ފިލްމެވެ. މަރިޔަމް މޫސާ ލިޔެފައިވާ ވާހަކަތަކުގެ ތެރޭގައި "ހިތު ވިންދު"، "ސަޒާ"، "ސިއްރު" އަދި "ހިތުގެ އެދުން" ފަދަ މަގްބޫލު ދިވެހި ވާހަކަތައް ހިމެނެއެވެ.

މިއީ މަރިޔަމް މޫސާގެ ފިރިމީހާ އަދި ކުރީގެ ޑައިރެކްޓަރ ހުސައިން އާދިލްގެ ޕްރޮޑަކްޝަން ހައުސް އިން އުފައްދާ ފިލްމެކެވެ. ޕްރޮޑިއުސް ކުރަނީ ޓެކްނޯ މީޑިއާ އިންނެވެ. މި ފިލްމުގައި ހިމެނެނީ ހަތަރު ލަވައެވެ.