ރޭވުމުންގެ ހުރިހާ އެޑިޓިންއެއް ނިމިއްޖެ، މިމަހު 20 ގައި ސެންސަރު ބޯޑަށް ފޮނުވާނެ: އަމްޖޭ
ޓިކެޓް ވިއްކަން ފަށާފައިވަނީ މިމަހުގެ 15 އިން ފެށިގެން
ރޭވުމުންގެ ޕޯސްޓަރ
މިމަހުގެ 24 ވަނަ ދުވަހު ރިލީޒްކުރަން ހަމަޖެހިފައިވާ އަމްޖަދު އިބްރާހިމް (އަމްޖޭ)ގެ ފިލްމު ރޭވުމުންގެ ހުރިހާ އެޑިޓިންއެއް ނިމިއްޖެ ކަމަށާއި މިމަހުގެ 20 ގައި ސެންސަރުބޯޑަށް ފިލްމު ލާނެކަމަށް އަމްޖޭ ބުނެފިއެވެ.
ރޭވުމުންގެ ޓިކެޓް އޮލިމްޕަހުން ވިއްކަން ފަށާފައިވަނީ މިދިޔަ ބުރާސްފަތި ދުވަހުން ފެށިގެންނެވެ.
ރޭވުމުންގެ ލީޑް ރޯލުން ފެނިގެން ދާނީ މުހައްމަދު މަނިކާއި އަލަށް ތައާރަފުވާ ނާޖިފާ އެވެ. މީގެ އިތުރުން މަރިޔަމް ޝަކީލާ (ޝަކިއްތަ)، މުހައްމަދު ޝާޒް (ތަޖޫބެ)، ފައުޒިއްޔާ ހަސަން އަދި ހަސަން މަނިކު (ރޯނު) މި ފިލްމުން ފެނިގެންދާނެއެވެ. މިއީ އަމްޖޭގެ އަމިއްލަ ވާހަކައަކަށް ހަދާފައިވާ ފިލްމެކެވެ. ފިލްމު ކެމެރާ ކޮށްފައިވަނީ މުހައްމަދު އަބޫބަކުރު (މާއެނބޫ) އެވެ.
ފިލްމު ޕްރޮޑިއުސް ކޮށްފައިވަނީ ޖޭޒް އެންޓަޓެއިންމެންޓުން ނެވެ. ބަޔަކު ރާވައިގެން ހިނގާ ކަންތައްތަކެއް ދައްކުވައިދޭ މި ލޯބީގެ މި ބިރުވެރި ފިލްމުން ވެގެންދަނީ ބެލުންތެރިން ސިއްސުވައިލާނެ ވަރުގެ ފިސާރި ފިލްމަކަށް ކަމަށް އަމްޖޭ ބުނެ އެވެ.
