ސަވާދީއްތަ ދަތުރަކީ ހުރިހާ ގޮތަކުން ވެސް ކާމިޔާބު ދަތުރެއް ކަމަށް, އެ ދަތުރު އިންތިޒާމްކުރި މޯލްޑިވްސް އިންޓަގްރޭޓެޑް ޓޫޒިރަމް ޑިވެލޮޕްމަންޓް ކޯޕަރޭޝަނުން ބުނެފިއެވެ.

މުޅި ދުނިޔެއަށް ހުޅުވާލައިގެން މި މަހުގެ 5 ވަނަ ދުވަހު ފެށި މި ދަތުރުގައި 9 ޔޮޓެއް ބައިވެރިވެ 7 ޔޮޓެއް ވަނީ ދަތުރު ފުރިހަމަކޮށްފައެވެ. ދަތުރު ފެށީ މި މަހުގެ 5 ވަނަ ދުވަހުއެވެ. ދަތުރު ނިންމާލާފައިވަނީ މި މަހުގެ 20 ވަނަ ދުވަހުއެވެ.

ދަތުރު ނިންމާލުމަށްޓަކައި ބޭއްވި ގާލާ ނައިޓް ބާއްވާފައިވަނީ ފަރި އައިލެންޑްގެ ފަރި މެރީނާ ވިލެޖްގައެވެ. ގާލާ ނައިޓްގައި ވާހަކަދައްކަވަމުން އެމްއައިޓީޑީސީގެ މެނޭޖިންގ ޑިރެކްޓަރ މުހައްމަދު ރާއިދު ވިދާޅުވީ, މި ދަތުރަކީ ފަތުރުވެރިކަމުގެ ޕްރޮޑަކްޓްތައް ޑައިވަރސިފައިކޮށް އެ ކަންކަން ދަސްކޮށް ފުޅާ ކުރުމަށް ލިބިގެންދިޔަ ފުރުސަތެއް ކަމަށެވެ.

ގާލާ ނައިޓްގެ މެހެމާނެއްގެ ގޮތުގައި ބައިވެރިވެވަޑައިގެންނެނީ ހެރިޓޭޖް މިނިސްޓަރ ޔުމްނާ މައުމޫނެވެ. މިނިސްޓަރ ޔުމްނާ ވަނީ ފަތުރުވެރިކަން ޑައިވަރސިފައިކޮށް އޭގެ ފައިދާ އާންމުންނަށް ލިބޭނެ ގޮތް ހެދުމަށް ގޮވާލައްވާފައެވެ.

މި ރަސްމިއްޔާތުގައި ލަންކާގެ ޔޫތު މިނިސްޓަރ ނަމާލް ރާޖަޕަކްސަ ވެސް ބައިވެރިވެވަޑައިގެންނެވިއެވެ. މީގެ އިތުރުން ޓުއަރިޒަމް މިނިސްޓަރ ޑރ. އަބްދުﷲ މައުސޫމާއި ރައީސް އޮފީހުގެ މިނިސްޓަރ ޑރ. މުސްތަފާ ލުތުފީ ބައިވެރިވެވަޑައިގެންނެވިއެވެ. ގާލާ ނައިޓްގައި ވަނީ ދަތުރުގައި ބައިވެރި ޔޮޓްތަކަށް ލިޔުން ހަވާލުކޮށްފައެވެ. އަދި ދަތުރުގެ ބައިވެރިންގެ ޝަރަފުގައި ޖާފަތެއް ބާއްވާފައިވެއެވެ.

ސަވާދީއްތަ ދަތުރުގެ ކާމިޔާބާއެކު، އެމްއައިޓީޑީސީން ވަނީ ދެން އޮންނަ ދަތުރުގެ އެއްބަސްވުމުގައި ސޮއިކޮށްފައެވެ. ދެން އޮންނަ ދަތުރެއް އޮތީ, ބައިނަލްއަގުވާމީ ކަނޑު ހުރަސްކޮށް ކުރާ ދަތުރެކެވެ. އެއީ ރާއްޖެއިން ފެށިގެން ސްރީލަންކާގެ ކޮލަމްބޯ ޕޯޓާއި ހަމައަށް ކުރެވޭ ދަތުރެކެވެ. މިކަމަށްޓަކައި އެމްއައިޓީޑީސީން ވަނީ އިންޓަރނޭޝަނަލް ވެންޗަރ ގްރޫޕާއެކު އެމްއޯޔޫއެއްގައި ސޮއިކޮށްފައެވެ.

މީގެ އިތުރުން ދެން އޮންނަ ދަތުރު 2023ގައި ބާއްވަން ނިންމާފައިވާ އިރު، އޭގައި ބައިވެރިވުމުގެ ފުރުސަތު މިހާރު ވަނީ މުޅި ދުނިޔެއަށް ހުޅުވާލާފައެވެ.