ލީގު އަދި ނުނިމޭ، މަސައްކަތް ކުރަންޖެހޭ: ގާޑިއޯލާ

އިނގިރޭސި ޕްރިމިއާ ލީގު ނުނިމޭ ކަމަށާއި އަދިވެސް ކުރަންޖެހޭ މަސައްކަތްތައް ވަރަށް ގިނަ ކަމަށް މެންޗެސްޓާ ސިޓީގެ ކޯޗު ޕެޕް ގާޑިއޯލާ ބުނެފިއެވެ.

ކުރިޔަށް އޮތް ފަސް މެޗު އެ ޓީމު ކާމިޔާބުކޮށްފިނަމަ އެ ޓީމަށް ޕްރިމިއާ ލީގުގެ ތަށި ޔަގީންވެގެން ދާނެއެވެ. އެ ޓީމާއި ދެވަނައިގައި އޮތް ވާދަވެރި މެންޗެސްޓާ ޔުނައިޓެޑާއި ދެމެދު 16 ޕޮއިންޓުގެ ފަރަގެއް އެބައޮތެވެ. ސިޓީއިން ވަނީ މި ސީޒަނުގައި މިހާތަނަށް އެއް ތަށި ކާމިޔާބުކޮށްފައެވެ. އެގޮތުން އެ ޓީމުން ވަނީ އިނގިރޭސި ލީގު ކަޕްގެ ފައިނަލްގައި އާސެނަލް 3-0 އިން ބަލިކޮށް އެ މުބާރާތުގެ ތަށި އުފުލާލާފައެވެ. މިއީ 2016 ވަނަ އަހަރު ސިޓީގެ ކޯޗުކަމާއި ގާޑިއޯލާ ހަވާލުވިފަހުން އެ ޓީމަށް ކާމިޔާބުކުރެވުނު ފުރަތަމަ މުބާރާތެވެ.

އިނގިރޭސިވިލާތުގެ އެންމެ ބޮޑު އެއް ކުޅިވަރު ނޫސް ކަމަށްވާ ސްކައި ސްޕޯޓްސްއާ ވާހަކަ ދައްކަމުން ގާޑިއޯލާ ބުނީ ތަށި ލިބުމާއި ވަރަށް ގާތަށް އާދެވިއްޖެ ކަމަށާއި އެހެން ނަމަވެސް އެ މަސައްކަތް އަދި ނުނިމޭ ކަމަށެވެ. އޭނާ ބުނީ ތަށި ހޯދުމުގެ ހުރިހާ ވެސް ބާރެއް އޮތީ އަމިއްލަ އަތްމަތީގައި ކަމަށާއި އެއީ ވަރަށް ބޮޑަށް ސަމާލުވާންޖެހޭ ކަމެއް ކަމަށެވެ. އަދި އަމިއްލަ އަތުގައި އޮތް އެއްޗެއް ބީވެގެން ދިޔުމުގެ އެއްވެސް ފުރުސަތެއް ދޭން ބޭނުންނުވާ ކަމަށާއި އެ މަސައްކަތް ކުރިޔަށް އޮތް ފަސް މެޗުގެ ތެރޭގައި ނިންމުމަކީ އަމާޒު ކަމަށެވެ.

އެހެން ނަމަވެސް ކުރިޔަށް ހުރި މެޗުތަކުގެ ދޭތެރޭ އަރާމުކުރަން ފުރުސަތު ނުލިބޭ ކަމަށް ބުނެ ގާޑިއޯލާ ވަނީ ޝެޑިއުލްއާ މެދު ހިތްހަމަނުޖެހުން ފާޅުކޮށްފައެވެ. ސިޓީ ދެންއޮތް މެޗުގައި އަމިއްލަ ދަނޑުގައި ނުކުންނާނީ މިދިޔަ ސީޒަނުގެ ޗެމްޕިއަނުން ކަމަށްވާ ޗެލްސީއާ ދެކޮޅަށެވެ. ގާޑިއޯލާ ބުނީ ބޭނުންވަނީ ޗެލްސީގެ ތާޖު އެ ޓީމުގެ އަތުން އަތުލަން ކަމަށާއި އެ ޓީމަކީ އަދިވެސް ޕްރިމިއާ ލީގުގެ ޗެމްޕިއަނުން ކަމަށެވެ. އޭނާ ބުނީ ޗެލްސީގެ ކޯޗަކީ އަދިވެސް އެ ޓީމަށް ތަށި ހޯދައިދިން ކޮންޓޭ ކަމަށާއި އެހެންކަމުން އެ ޓީމަށް މި ސީޒަނުގައި އަދިވެސް ތަށި ކާމިޔާބުކުރެވޭނެ ކަމުގެ ޔަގީންކަން އެބައޮތް ކަމަށެވެ.

ގާޑިއޯލާ ބުނީ އޭނާގެ ޓީމަކީ ވަރަށް ޕްރޮފެޝަނަލް ޓީމެއް ކަމަށާއި އަބަދުވެސް ވިސްނަނީ ކުރިޔަށް އޮންނަ މެޗަށް ކަމަށެވެ. އަދި އޭނާ ބުނީ ކުރިޔަށް އޮތް މެޗަށް އެންމެ ބޮޑަށް އިތުބާރު ލިބެނީ އޭގެ ކުރިން ކުޅޭ މެޗު ކާމިޔާބުކުރެވުމުން ކަމަށާއި ޕްރެޝަރު އޮތަސް އެކަމަކާއި މެދު ނުވިސްނާ ކަމަށެވެ. އަދި ޗެލްސީއާ ދެކޮޅަށް ކުޅޭ މެޗަކީ ވަރަށް އުނދަގޫވާނެ މެޗެއް ކަމަށް ގަބޫލުކުރެވޭ ކަމަށް ވެސް ގާޑިއޯލާ ބުނެފައިވެއެވެ.

މި ސީޒަނުގައި ގާޑިއޯލާގެ އިރުޝާދުގެ ދަށުން ސިޓީއިން އަންނަނީ ތަފާތު މޮޅު ކުޅުމެއް ދައްކަމުންނެވެ. ޔޫރަޕުގެ ގަދަ ފަސް ލީގުގައި ކުޅޭ ޓީމުތަކުގެ ތެރެއިން އެންމެ ގިނަ ލަނޑު ޖެހި ޓީމަކީ ސިޓީއަށްވާއިރު އެ ޓީމުން ވަނީ ޗެމްޕިއަންސް ލީގުގެ ގަދަ 16 އިން ވެސް ޖާގަ ހޯދާފައެވެ. ހަމައެހެންމެ ޕްރިމިއާ ލީގުގައި ކުޅުނު 28 މެޗުން އެ ޓީމު ވަނީ 75 ޕޮއިންޓް ހަމަކޮށްފައެވެ.