ކޮރަޕްޝަންގެ 3 ވަނަ މައްސަލައެއްގައި އިސްރާއީލް ފުލުހުން އެޤައުމުގެ ބޮޑުވަޒީރު ބެންޖަމިން ނަތަންޔާހޫއާއި ސުވާލުކޮށްފިއެވެ. 

ބޮޑުވަޒީރުގެ އޮފީހުން ރަސްމީކޮށް މިކަމުގައި އެއްޗެއް ބުނެފައިނުވިނަމަވެސް، އިސްރާއީލް ފުލުހުން ބޮޑުވަޒީރުގެ ރަސްމީ ގެކޮޅަށް ދިޔަ މަންޒަރު ފެނިފައިވާ ކަމަށް ރޮއިޓަރޒްއިން ބުނެއެވެ. އަދި އެގެކޮޅަށް ފުލުހުން ދިޔައިރު، ވެރިރަށް ތެލްއަވީވްގައި ހުންނަ ފުލުހުންގެ މަރުކަޒަކަށް ވަޑައިގެން ބޮޑުވަޒީރުގެ އަނބިކަނބަލުން ސާރާ ނަތަންޔާހޫ ވެސް ބަޔާނެއް ދެއްވާފައިވާ ކަމަށް ރިޕޯޓްތައް ބުނެއެވެ.

މިފަހަރު ނަތަންޔާހޫ އާއި ސުވާލު ކުރެވެނީ އިސްރާއީލުގައި މުވާޞަލާތީ ޚިދުމަތްދޭ ކުންފުންޏަކަށް ފައިދާވާ ގޮތަށް ކަންތައްތަކެއް ކޮށްދެއްވުމުގެ ތުހުމަތުގައެވެ. ނަތަންޔާހޫގެ މައްޗަށް ކުރެވޭ ތުހުމަތުތަކުގައިވަނީ އިސްރާއީލުގެ މުވާޞަލާތީ ޚިދުމަތްދޭ ކުންފުންޏަކުން ކޮންޓްރޯލްކުރާ ނޫހަކުން، ނަތަންޔާހޫގެ ޚަބަރުތަކަށް އިސްކަންދީ، އެމަނިކުފާނަށް 'ރަނގަޅު ކަވަރޭޖެއް' ދިނުމުގެ ބަދަލެއްގެ ގޮތުގައި، އެކުންފުންޏަށް ފައިދާ ވާގޮތަށް ޓެލެކޮމް ރެގިއުލޭޓަރީ އޮތޯރިޓީއިން ކަންތައްތަކެއް ކޮށްދެއްވާފައިވާ ކަމަށެވެ. 

މިމައްސަލައިގައި ހިމެނޭ ބެޒެގް ޓެލެކޮމްގެ ވެރިޔާ ޝައުލް އެލޮވިޗް މިހާރު ވެސް ހުރީ ފުލުހުންގެ ބަންދުގައެވެ. އެހެން ނަމަވެސް ނަތަންޔާހޫ ވިދާޅުވަމުން ގެންދަވަނީ އެމަނިކުފާނު ކުށެއް ނުކުރައްވާ ކަމަށެވެ. ފުލުހުން ކުރަމުންދާ ތަހުޤީގުގައި އިސްރާއީލުގެ ކޮމިއުނިކޭޝަންސް މިނިސްޓްރީގެ ކުރީގެ ޑިރެކްޓަރ ޖެނެރަލް ޝްލޯމޯ ފިލްބަރވެސް ހައްޔަރު ކޮށްފައިވާއިރު، ނަތަންޔާހޫ އާއި ދެކޮޅަށް އޭނާ ހެކިބަސް ދޭނެ ކަމަށް ދައުލަތުގެ ވަކީލުން ވަނީ ބުނެފައެވެ.

ކޮރަޕްޝަންގެ 2 މައްސަލައެއްގެ ތަހުޤީޤުކޮށް، ދައުވާ ކުރުމަށް އިސްރާއީލުގެ ބަންޑާރަ ނައިބުގެ އޮފީހަށް ފުލުހުން މިހާރު ވަނީ ފޮނުވާފައެވެ. އެހެން ނަމަވެސް އެމައްސަލައިގައި ދައުވާކުރުމާއި ގުޅޭ ގޮތުން ގޮތެއް ނިންމުމަށް ދުވަސްތަކެއް ނަގާނެ ކަމަށް ބެލެވެއެވެ. 

4 ދައުރެއްގެ މަތިން އިސްރާއީލުގެ ބޮޑުވަޒީރުކަން ކުރައްވާފައިވާ ނަތަންޔާހޫ ވަނީ އަންނަ އަހަރު ފަހުކޮޅު ބާއްވާ އާއްމު އިންތިޚާބުގައި ވާދަކުރައްވައި، 5 ވަނަ ދައުރަކަށް ބޮޑުވަޒީރުގެ މަޤާމަށް ކުރިމަތިލައްވާނެ ކަމަށް ވިދާޅުވެފައެވެ.