ޓީސީ ބަލިކޮށް، ނިއު އިން ލީގުގެ ފެށުން ރަނގަޅު ކޮށްފި

އެސްޓީއޯ މާލޭ ލީގުގައި ޓީސީ ސްޕޯޓްސް ކްލަބުގެ މައްޗަށް ކުރި ހޯދައި، ނިއު ރޭޑިއަންޓް ސްޕޯޓްސް ކްލަބުން ލީގުގެ ފެށުން ރަނގަޅު ކޮށްފި އެވެ.

މާލޭ ލީގުގައި މިދެޓީމް ކުޅުނު ފުރަތަމަ މެޗުގައި ޓީސީ ސްޕޯޓްސް ކްލަބުގެ މައްޗަށް ނިއުރޭޑިއަންޓް ކުރި ހޯދީ 3-0 ންނެވެ.

ވާދަވެރި ކުޅުމެއް ފެނިގެންދިޔަ މިމެޗުގެ ފުރަތަމަ ހާފް ނިމެން ދެ މިނިޓަށް ވެފައިވަނިކޮށް ނިއު އަށް ކުރި ހޯދައިދިނީ މިސީޒަނަށް ނިއު އާ ގުޅުނު މިޑްފީލްޑަރު މުޙައްމަދު އުމައިރު އެވެ. އުމައިރުގެ މިލަނޑަކީ، ނިއު އަށް ކުޅޭ އަފްޣާނިސްތާނުގެ ޑިފެންޑަރު ހާރޫން އަމީރީ ބޮލުން ޖައްސާލި ބޯޅަ އަކުން އުމައިރު ކާމިޔާބު ކުރި ލަނޑެކެވެ.

މިނަތީޖާގައި އޮވެ މެޗުގެ ފުރަތަމަ ހާފްގެ ކުޅުން ނިމުނުއިރު، ދެވަނަ ހާފްގައި ނިއުރޭޑިއަންޓަށް ކުޅޭ ސްޕެއިންގެ ޑިފެންޑަރު ޖޯޖް ގޮތޯރް އަށް ކުރި ފައުކަލާއި ގުޅިގެން ޓީސީގެ އަހުމަދު ރިލްވާން (ބެން) އަށް ދެއްކި ރަތް ކާޑާއެކު މެޗުގެ ފަހު 17 މިނިޓު ޓީސީ އިން ފުރިހަމަ ކުރީ 10 ކުޅުންތެރިންނާއެކުގައެވެ.

ޓީސީ އިން އެއް ކުޅުންތެރިޔަކު މަދުން ކުޅުމުގެ ފައިދާ ނަގައި، ނިއު އިން މެޗުގެ ފަހުބައިގައި ދެ ލަނޑު ޖެހިއިރު، 85 ވަނަ މިނިޓުގައި އެޓީމަށް ލީޑު ފުޅާކޮށްދިނީ ހަމްޒާ މުޙައްމަދު (ހަމްޕު) އެވެ.

މެޗު ނިމެން މިނިޓަކަށް ވެފައިވަނިކޮށް ނިއުގެ ފަހު ލަނޑު ޖަހައިދިނީ އަމީރީ އެވެ.

އެސްޓީއޯ މާލޭ ލީގުގައި ހޯމަ ދުވަހުގެރޭ ކްލަބް ވެލެންސިއާގެ މައްޗަށް ޔުނައިޓެޑް ވިކްޓްރީ ކުރިހޯދީވެސް 3-0 ންނެވެ.

މިމެޗުގައި ފެނިގެންދިޔަ ތިން ލަނޑުވެސް ޔުނައިޓެޑް ވިކްޓްރީ އިން ޖެހީ މެޗުގެ ފަހު ހާފުގައެވެ.

ޔުނައިޓެޑް ވިކްޓްރީގެ ފުރަތަމަ ލަނޑު މެޗުގެ 60 ވަނަ މިނިޓުގައި ޖަހައިދިނީ ޓްރިނިޑާޑް އެންޑް ޓޮބޭގޯގެ ފޯވާޑް ކޯޑެލް ސެމުއެލް އެވެ.

72 ވަނަ މިނިޓުގައި ލިބުނު ހިލޭ ޖެހުމަކުން ޔުނައިޓެޑް ވިކްޓްރީ އަށް ލީޑު ފުޅާ ކޮށްދިނީވެސް ސެމުއެލް އެވެ.

ޔުނައިޓެޑް ވިކްޓްރީގެ ފަހު ލަނޑު، 79 ވަނަ މިނިޓުގައި ޖަހައިދިނީ އަލީ ހައިޝަމް (ޗުމްޕު) އެވެ.

މެޗު ނިމެން އަށް މިނިޓަށް ވެފައިވަނިކޮށް ވެލެންސިއާ އަށް ސުން ކަނޑުވާލަން ރަނގަޅު ފުރުޞަތެއް ލިބި ބޭކާރުވި އެވެ. ޔުނައިޓެޑް ވިކްޓްރީގެ ޕެނަލްޓީ އޭރިއާ ތެރެއިން ޑިފެންޑަރު އަލީ ޝަރީފް ކުރި ފައުލަކާއި ގުޅިގެން ވެލެންސިއާ އަށް ޕެނަލްޓީ އެއް ލިބުނު ނަމަވެސް، ވެލެންސިޔާގެ ސަރްގީ ޑްރީގާ ފޮނުވާލި ޕެނަލްޓީ، ޔުނައިޓެޑް ވިކްޓްރީގެ ގޯލްކީޕަރު ތޮލާލް ހަސަން ވަނީ ދިފާއުކޮށްފައެވެ.

މާލޭ ލީގުގައި އާދީއްތަ ދުވަހު ހަވީރު ކުޅުނު ފުރަތަމަ މެޗުގައި ވިކްޓްރީ ސްޕޯޓްސް ކްލަބުގެ މައްޗަށް ކްލަބް އީގަލްސް ކުރި ހޯދާފައިވަނީ 4-1 ންނެވެ. އަދި އާދީއްތަ ދުވަހުގެރޭ މާޒިޔާ ސްޕޯޓްސް އެންޑް ރެކްރިއޭޝަން ކްލަބާއި ކްލަބް ގްރީން ސްޓްރީޓް ބައްދަލުކުރި ލީގުގެ ދެވަނަ މެޗު ނިމިފައިވަނީ 2-2 ން އެއްވަރު ވެގެންނެވެ.

އަށް ޓީމުގެ މެދުގައި ކުޅޭ އެސްޓީއޯ މާލޭ ލީގުގައި މިހާތަނަށް ހަތަރު މެޗު ކުޅެފައިވާއިރު، ކްލަބް އީގަލްސް އާއި ނިއުރޭޑިއަންޓް ސްޕޯޓްސް ކްލަބް އަދި ޔުނައިޓެޑް ވިކްޓްރީ އަށް ވަނީ ތިން ޕޮއިންޓް ލިބިފައެވެ. މާޒިޔާ ސްޕޯޓްސް އެންޑް ރެކްރިއޭޝަން ކްލަބާއި، ގްރީން ސްޓްރީޓަށް އެއް ޕޮއިންޓް ލިބިފައިވާއިރު، ވިކްޓްރީ ސްޕޯޓްސް ކްލަބާއި، ޓިސީ ސްޕޯޓްސް ކްލަބް އަދި ކްލަބް ވެލެންސިއާ އަށް ޕޮއިންޓެއް ލިބިފައެއްނުވެއެވެ.

މާލޭ ލީގުގައި މެޗެއް ދެން ކުޅޭނީ އަންނަ ހުކުރު ދުވަހު އެވެ. ހުކުރު ދުވަހު ހަވީރު ކުޅޭ މެޗުގައި ބައްދަލު ކުރާނީ ވިކްޓްރީ ސްޕޯޓްސް ކްލަބާއި ޔުނައިޓެޑް ވިކްޓްރީ އެވެ. ހުކުރު ދުވަހުގެރޭ ކުޅޭ މެޗުގައި ބައްދަލު ކުރާނީ ނިއުރޭޑިއަންޓް ސްޕޯޓްސް ކްލަބާއި މާޒިޔާ ސްޕޯޓްސް އެންޑް ރެކްރިއޭޝަން ކްލަބެވެ.