ރިޔާސީ ބަޔާނުން ސަރުކާރުގެ ޤާނޫނީ ހައިސިއްޔަތު ނެތްކަން ބޭޒާރުވެއްޖެ: އަދާލަތު
25 ފެބުރުއަރީ 2018 | އާދީއްތަ 09:33ހިސާބުތައް ވިދާޅުވެފައި ވަނީ އޮޅުވާލުމަށް ކަމަށް ބުނެފައިވޭ
މަޖިލިސް ހުޅުވުމަށް މީގެކުރިން ބޭއްވި ޖަލްސާއަކަށް ރައީސް ޔާމީން ވަޑައިގަންނަވަނީ
ރައްޔިތުންގެ މަޖިލިސް މިއަހަރަށް ހުޅުވުމަށް ބޭއްވި ޖަލްސާގައި ރައީސް އަބްދުﷲ ޔާމީން ދެއްވެވި ރިޔާސީ ބަޔާނުން ސަރުކާރުގެ ނުކުޅެދުންތެރިކަމާއި ގާނޫނީ ހައިސިއްޔަތު ގެއްލިފައިވާކަން ހާމަވެ، އިތުރަށް ބޭޒާރުވެގެން ހިނގައްޖެ ކަމަށް އަދާލަތު ޕާޓީން ބުނެފިއެވެ.
ރިޔާސީ ބަޔާނާ ގުޅިގެން އަދާލަތު ޕާޓީން އާދީއްތަ ދުވަހު ނެރުނު ބަޔާނެއްގައި ބުނެފައި ވަނީ މިދިޔަ އަހަރު ނިމުނުއިރު ދައުލަތުގެ ރަސްމީ ރިޒާވުގައި 586 މިލިއަން ޑޮލަރު ހުރި ކަމަށް ވަރަށް ފަހުރުވެރިކަމާއެކު ރައީސް ވިދާޅުވިއިރު، އެ އަދަދަކީ 2014 ވަނަ އަހަރު ނިމުނު އިރު ރަސްމީ ރިޒާވުގައި ހުރި އަދަދަށް ވުރެ 29 މިލިއަން ޑޮލަރު މަދު އަދަދެއް ކަމަށެވެ. އަދި 2015 އަހަރާއި 2016 ވަނަ އަހަރު ރަސްމީ ރިޒާވް ވަރަށް ބޮޑުތަން ދަށަށް ގޮސްފައިވުމަކީ ދެބަސްނުވެވޭނެ ހަގީގަތެއް ކަމަށްވެސް އެ ބަޔާނުގައި ބުނެފައިވެއެވެ.
"...އާމްދަނީގެ ގޮތުގައި ދައުލަތަށް މިއަހަރުގެ 22.4 ބިލިއަން ރުފިޔާ ލިބޭނެ ކަމަށް އަންދާޒާކޮށްފައިވާއިރު ވޭތުވެދިޔަ އަހަރުތަކުގައި އާމްދަނީ ހޯދިފައި ވަނީ ބަޖެޓުގައި އަންދާޒާކޮށްފައިވާ އަދަދަށް ވުރެ އެތައް ތަނެއް މެދުކަން ވެސް ފާހަގަކުރަން ޖެހެއެވެ،" އަދާލަތުގެ ބަޔާނުގައިވެއެވެ.
އެ ބަޔާނުގައި އިތުރަށް ބުނެފައި ވަނީ ސަރުކާރުގެ ބޮޑެތި މަޝްރޫއުތައް ނުފެށި ހަމައެކަނި ކަރުދާހުގައި އެ މަޝްރޫތަކުގެ ވާހަކަތައް ލިޔެވިފައިވާތީ އެކަމުގެ ފާޑުކިޔުން އަމާޒުކޮށްފައިވެއެވެ. އެގޮތުން އައިހެވަން މަޝްރޫއުގެ ފީސިބިލިޓީ ސްޓަޑީ އާއި މާސްޓާ ޕްލޭން ނިމިފައިވާކަމަށް ބުނެފައިވާއިރު، އެ މަޝްރޫއު ނުފެށި އޮތުމަކީ ވަޒީރުން ނުކުޅެދިފައިވާ ކަމުގެ ހެއްކެއް ކަމަށް އަދާލަތުގެ ބަޔާނުގައި ބުނެފައިވެއެވެ.
ސަރުކާރުން އިއުލާން ކުރި ބޮޑެތި މަޝްރޫއުތަކުގެ ތެރޭގައި ހިމެނޭ ތިލަފުށީގައި ތަރައްޤީ ކުރާނެކަމަށް ބުނި ބައިނަލްއަޤުވާމީ ބަނދަރުގެ މަޝްރޫއު އާއި ރާއްޖެއިން ތެޔޮ ހޯދުމުގެ މަޝްރޫޢު ނާކާމިޔާބުވެފައިވާތީ އެކަމަށްވެސް އަދާލަތުން ފާޑުކިޔާފައިވެއެވެ.
ރިޔާސީ ބަޔާނުގައި ރައީސް ދެއްކެވި ވާހަކަފުޅުތަކަށް ރައްދު ދިނުމަށް އަދާލަތުން ނެރުނު ބަޔާނުގައި ބުނެފައިވާ ގޮތުގައި ރާއްޖެއަކީ ރައްޔިތުންނަށް ރައްކާތެރިކަން ލިބިގެންވާ ގައުމެއް ކަމަށް ރައީސް ވިދާޅެފައި ވަނީ އެމަނިކުފާނުގެ ވެރިކަމުގެ ފުރަތަމަ ހަތަރު އަހަރު ތެރޭގައި 26 މީހަކު އަނިޔާވެރި ގޮތަކަށް މަރާލާފައިވަނިކޮށެވެ.
ރިޔާސީ އިންތިހާބުގައި ރައީސް ޔާމީން ވައުދުވެވަޑައިގެންނެވި ކަންތައްތައް ފުރިހަމަ ނުކުރެވޭ ކަމަށާއި މަސްވެރިންނަށް ވައުދުވެވަޑައިގެންނެވި ބެޔަސް ނުބެޔަސްގެ ވައުދު ފުއްދިފައި ނުވާއިރު، ހިޔާގެ ނަމުގައި އިއުލާންކޮށްފައިވާ މަޝްރޫއަކީ ބިލާހަކަށް ވެގެންދާނެ މަޝްރޫއެއް ކަމަށްވެސް އަދާލަތުން ބުނެފައިވެއެވެ.
ލީޑާޝިޕުން ދީނީ ގިނަ އިލްމުވެރިން ފެނިގެންދާ އަދާލަތުގެ ބަޔާން ނިންމާލަމުން ބުނެފައި ވަނީ ރައީސް ޔާމީން މިއަހަރު ދެއްވި ރިޔާސީ ބަޔާނަކީ ފަހުގެ ތާރީހުގައި ދިން އެންމެ ކުރު އެއް ރިޔާސީ ބަޔާން ކަމަށާއި ރައީސް ދެއްކެވި ވާހަކަފުޅުތަކާއި ނުދައްކަވާ ދޫކޮށްލެއްވި ކަންތައްތަކުން އެނގިގެން ދަނީ ވެރިކަމުގެ ގާނޫނީ ހައިސިއްޔަތު ގެއްލިވައިވާ މިންވަރު ކަމަށެވެ.
