ފުލުހުންތަކެއް މުޒާހަރާގެ ބައިވެރިނާ ގުޅިގެން، އަޑުއުފުލާ މަންޒަރު ފެންނަ ވީޑިއޯއެއް!
މުޒާހަރާގެ ބައިވެރިންނާ ފުލުހުން ގުޅުނީ ބުރާސްފަރި ދުވަހުގެ ރޭ
މުޒާހަރާގެ ބައިވެރިންނާ ގުޅުނު ފުލުހަކު، ރަޔަޓް ފުލުހުންނާ ވާހަކަ ދައްކަނީ
ސުޕްރީމް ކޯޓުން ބުރާސްފަތި ދުވަހުގެ ރޭ ނެރުނު އަމުރާ އެކު، މުޒާހަރާގެ ބައިވެރިންނާ ފުލުހުންތަކެއް ގުޅުނު މަންޒަރު ފެންނަ ވީޑީއޯއެއް ރާއްޖެއެމްވީ އަށް ލިބިއްޖެއެވެ.
އެ ވީޑިއޯ އިން ފެންނަނީ ފުލުހުންތަކެއް މުޒާހަރާތަކުގެ ބައިވެރިންނާ އެކު ގޮސް، ޝިލްޑުތައް ހިފައިގެން ތިބި ރަޔަޓް ފުލުހުންނާ ދިމާލަށް ދާތަނެވެ. ވީޑިއޯ އިން ފެންނަ ގޮތުން މުޒާހަރާގެ ބައިވެރިންނާ ގުޅިގެން އުޅުނީ ދެ ފުލުހެކެވެ. އެ ދެ ފުލުހުން ވެގެން ރަޔަޓް ފުލުހުންނާ ވާހަކަތަކެއް ދައްކަން މަސައްކަތް ކުރި ވަގުތު މުޒާހަރާގެ ބައިވެރިން އުފާފާޅު ކުރުމުގެ ގޮތުން އެތަނުން އެކަކު އުރާލާ މަންޒަރު ވެސް ފެނިގެންދެއެވެ.
ބެލެވޭ ގޮތުގައި އެ ވީޑިއޯއަކީ ބުރާސްފަތި ދުވަހުގެ ރޭ ނަގާފައިވާ ވީޑިއޯއެކެވެ. ފުލުހުންތަކެއް މުޒާހަރާގެ ބައިވެރިންނާ ގުޅުނީ ޗީބޯ ސަރަހައްދުން ކަމަށްވެއެވެ.
އިދިކޮޅު ބައެއް އިސްބޭފުޅުން ވިދާޅުވާ ގޮތުގައި ފުލުހުންތަކެއް މުޒާހަރާގެ ބައިވެރިންނާ ގުޅިފައި ވަނީ ބޮޑުތަކުރުފާނު މަގު، ޓަސްކަލޫސާ ކައިރިންނެވެ. އަދި ސުޕްރީމް ކޯޓުގެ އަމުރު ދެމެހެއްޓުމަށް ފުލުހުންތަކެއް މަސައްކަތް ކުރަމުންދިޔަ ނަމަވެސް، ފުލުހުންގެ އިސްބޭފުޅުން އެކަމަށް ދަނީ ހުރަސްއަޅަމުންނެވެ. އަދި ބައެއް ފުލުހުން ހައްޔަރު ކުރި ކަމުގެ އަޑުތަކެއް ވެސް ވަނީ ފެތުރިފައެވެ.
މީގެ އިތުރުން ހުކުރު ދުވަހު ހަވީރު އެއްވުން ރޫޅާލުމަށް ބައެއް ފުލުހުން ބާރުގެ ބޭނުންކުރަމުން ގެންދިޔައިރު އެކަމާ ދެކޮޅަށް ވެސް ބައެއް ފުލުހުން ހިތްހަމަނުޖެހިގެން އުޅުނު މަންޒަރު ފެނުނެވެ.
