ސްޕެނިޝް ލަލީގާގައި ޑިޕޯޓިވޯ އަލާވޭސްއާ ދެކޮޅަށް ކުޅުނު މެޗުން ބާސެލޯނާ ހަނި ގޮތަކަށް މޮޅުވެއްޖެއެވެ.

އަމިއްލަ ދަނޑުގައި ކުޅުނު މި މެޗުން ބާސާ މޮޅުވީ ފަހަތުން އަރައި 2-1 ގެ ނަތީޖާއަކުންނެވެ. މިމެޗުގައި ބާސާއާ އަލަށް ގުޅުނު ބްރެޒިލްގެ މިޑްފީލްޑަރު ފިލިޕޭ ކުޓީނިއޯ ވަނީ ފުރަތަމަ އެގާރައިގައި ހިމެނިގެން ކުޅެފައެވެ. މި ދެ ޓީމު ސީޒަނުގެ ކުރީކޮޅު ކުޅުނު މެޗު 2-0 އިން ކާމިޔާބުކުރީ ބާސާއެވެ. މި މެޗާއި ބާސާއިން ކުރިމަތިލީ މި ސީޒަނުގެ ލަލީގާގައި ކުޅުނު އެއްވެސް މެޗަކުން ބަލިނުވުމުގެ ރެކޯޑާއެކުއެވެ.

ފުރަތަމަ ހާފު ފެށިގެން ބާސާގެ ފަރާތުން ރަނގަޅު ކުޅުމެއް ފެނިގެން ދިޔައިރު ލޫކަސް ޑިންޔޭ ވަނީ ލަނޑު ޖެހުމާއި ގާތަށް ގޮސްފައެވެ. އެހެން ނަމަވެސް އޭނާ ފޮނުވާލި ހަމަލާ ދިޔައީ ގޯލު ދަނޑި ކައިރިން ބޭރަށެވެ. އަލާވޭސް އަށް މެޗުގެ ފުރަތަމަ ލަނޑު ޖަހައި ލީޑު ނަގައިދިނީ ޖޯން ގިޑެޓީއެވެ. މި ލަނޑަށް ފަހުވެސް އަލަވޭސްއިން ވަނީ ބާސާގެ ގޯލަށް ނުރައްކާ ކޮށްފައެވެ. އެހެން ނަމަވެސް އެ ޓީމުން އުފެއްދި ހަމަލާތަކުގެ ހުރަހަކަށް ވެގެންދިޔައީ މި ސީޒަނުގައި ތަފާތު މޮޅު ކުޅުމެއް ދައްކަމުން އަންނަ ޖަރުމަނުގެ ކީޕަރު މާކް އެންޑަރ ޓަރ ސްޓީޖެންއެވެ. މެޗުގެ 43 ވަނަ މިނެޓުގައި މެސީ ފޮނުވާލީ ހިލޭ ޖެހުމެއް އަލަވޭސްގެ ގޯލުގެ ދަނޑިއަށް އަމާޒުވެފައިވެއެވެ.

އެއް ލަނޑުގެ ލީޑެއްގައި އޮވެ އަލާވޭސްއިން ފުރަތަމަ ހާފު ނިންމާލިއިރު ބާސާއިން ދެވަނަ ހާފަށް ނުކުތީ ނަތީޖާ ބަދަލުކޮށްލުމުގެ އުއްމީދުގައެވެ. މި ހާފުގައި ބާސާގެ ކުޅުން ވަރުގަދަ ކުރުމުގެ ނަތީޖާއެއްގެ ގޮތުން އެ ޓީމުން ވަނީ އަލަވޭސްއަށް އެޓޭކް ކުރުމުގު ހުރިހާ ދޮރެއް ބަންދުކޮށްފައެވެ. ތަކުރާރުކޮށް ބާސާއިން އުފައްދަމުން ދިޔަ ހަމަލާތަކުގެ ނަތީޖާއަކަށް ވެގެންދިޔައީ މެޗުގެ 72 ވަނަ މިނެޓުގައި އަންދްރޭސް އިނިއެސްޓާ ތަނަވަސްކޮށްދިން ފުރުސަތަކުން ލުއިސް ސުއަރޭޒް ލަނޑެއް ޖަހައިދީ ނަތީޖާ ހަމަހަމަކޮށްދިނުމެވެ. ބާސާއަށް މި މެޗުން ތިން ޕޮއިންޓް ކަށަވަރުވެގެންދިޔައީ 84 ވަނަ މިނެޓުގައި ހިލޭ ޖެހުމަކުން މެސީ ކާމިޔާބުކޮށްދިން ލަނޑާއެކުއެވެ. މި ލަނޑަށް ފަހު އަލާވޭސްއިން އެ ޓީމުގެ ކުޅުން ރަނގަޅުކުރިއިރު އެ ޓީމަށް ނަތީޖާ ހަމަހަމަކުރެވިފައެއް ނުވެއެވެ.

މި މެޗުން މޮޅުވުމާއެކު ބާސާއިން ވަނީ މި ސީޒަނުގެ ލަލީގާގައި ބަލިނުވުމުގެ ރެކޯޑު ދަމަހައްޓާފައެވެ. ހަމައެހެންމެ ޕެޕް ގާޑިއޯލާ ބާސާއަށް އިރުޝާދުދިންއިރު 21 މެޗުން ބަލިނުވެ ހެދި ރެކޯޑާއި އެ ޓީމުގެ ކޯޗުގެ މަގާމުގައި މިވަގުތު ހުރި އާނެސްޓޯ ވަލްވާޑޭ ވަނީ އަރާ ހަމަކޮށްފައެވެ.

މި މެޗުން މޮޅުވުމަށްފަހު ވާހަކަ ދައްކަމުން ބާސާގެ ކޯޗު ވަލްވާޑޭ ބުނީ މެޗުން މޮޅުވީ ކުޅުންތެރިންގެ ހިތްވަރުން ކަމަށާއި މި މެޗުން މޮޅުވުމަކީ ސީޒަނުގެ ބާކީ ބަޔަށް އެޅުނު ރަނަގަޅު ފިޔަވަޅެއް ކަމަށެވެ. އޭނާ ވަނީ އިނިއެސްޓާއަށް ވަރަށް ބޮޑަށް ތައުރީފުކޮށްފައެވެ. އެގޮތުން އިނިއެސްޓާއަކީ ޓީމުގައި ހުރި ތަފާތު ކުޅުންތެރިޔެއް ކަމަށާއި އޭނާއަކީ "މާސްޓަރ" އެއްގެ ގޮތުގައި ވަލްވާޑޭ ވަނީ ސިފަކޮށްފައެވެ. ހަމައެހެންމެ ފިލިޕޭ ކުޓީނިއޯގެ ފުރަތަމަ މެޗާއި މެދު ވެސް ވަރަށް ހިތްހަމަޖެހޭ ކަމަށް އޭނާ ބުނެފައިވެއެވެ.

ސްޕެނިޝް ލަލީގާގެ ޕޮއިންޓް ތާވަލްގެ އެއްވަނައިގައިވާ ބާސެލޯނާ އަށް ވަނީ 21 މެޗުން 57 ޕޮއިންޓް ލިބިފައެވެ. ތާވަލްގެ ދެވަނައިގައިވާ އެތުލެޓިކޯ މެޑްރިޑަށް 46 ޕޮއިންޓް ލިބިފައިވާއިރު، ތިންވަނައިގައިވާ ވެލެންސިއާ އަށް ލިބިފައިވަނީ 40 ޕޮއިންޓެވެ. ތާވަލުގެ ހަތަރުވަނައިގައިވާ ރެއާލް މެޑްރިޑަށް ލިބިފައިވަނީ 38 ޕޮއިންޓެވެ.