މިދިޔަ އަންގާރަ ދުވަހު މެކްސިކޯގެ ފުލުހުން ހައްޔަރުކުރި އުމުރުން 17 އަހަރުގެ ޔުނިވާސިޓީ ދަރިވަރެއްކަމަށްވާ މާކޯ އެންޓޯނިއޯ ގެއްލުނު މައްސަލައިގައި މެކްސިކޯ ސިޓީގައީ މުޒާހަރާކޮށްފިއެވެ.
އޭނާ އަނބުރާ ގެނެސްދިނުމަށް ގޮވާލައި ސިޓީ ސެންޓްރަލް އެވެނިއުގައި އެތައް ސަތޭކަ ބަޔަކު މުޒާހަރާކޮށްފައި ވާއިރު ދަތުރުފަތުވަނީ މެދުކެނޑިފައެވެ.
ދަރިވަރު ހައްޔަރުކޮށްފައިވަނީ މަގުމަތީގައި ފޮޓޯ ނަގަން ހުއްޓައި ނަމަވެސް އޭނާގެ މައްޗަށް ވަނީ ކެމެރާއެއް ވަގަށްނެގުމުގެ ތުހުމަތުކޮށްފައެވެ.
އޭނާ ހައްޔަރުކުރުމުގައި ބައިވެރިވި ދެ ފުލުހުން މިހާރުވަނީ ހައްޔަރުކުރެވިފައެވެ.
ގެއްލުނު ދަރިވަރު ފެނުމަށް އެދި ނަސާރާ ފައްޅިތަކުގައި ދުއާ ކުރާ އަޑުވެސް އިވިފައިވެއެވެ.
މާކޯ އެންޓޯނިއޯ ސަންޗޭޒްގެ އާއިލާއިން ސިފަކުރާ ގޮތުގައި އޭނާއަކީ ކުރެހުމާއި ދާރުލްއާސާރުތަކަށް ލޯބިކުރާ ބަސްއަހާ ކުއްޖެކެވެ.
އާއިލާއިން ބުނިގޮތުގައި އޭނާ އުޅުނީ އޭނާގެ އެކުވެރި އެހެން ކުއްޖެއްގެ ކެމެރާއަކުން ފާރެއްގައި ހުރި ޝައުގުވެރި ގްރެފިޓީއެއް ފޮޓޯ ނަގަންށެވެ.
އޭނާ ފިލަން ދުވި ނަމަވެސް ފުލުހުން ވަނީ އޭނާ ހިފައި ފުލުހުންގެ ވޭން ތެރެއަށް ލާފައިކަމަށް އާއިލާއިންވަނީ ބުނެފައެވެ.
މެކްސިކޯ ސިޓީގެ ސަރުކާރުގެ ހިއުމަން ރައިޓްސް ކޮމިޝަނުން ބުނީ އެ ފިރެހެން ކުއްޖާއަށް ވީގޮތެއް ތަހުގީގުކުރުމަށް އަންގާފައިވާނެ ކަމަށެވެ.
ކޮމިޝަނުން ބުނީ ސިޓީގެ ޗީފް ޕްރޮސިކިއުޓަރަށްވެސް އެ މައްސަލަ ގަދަކަމުން މީހުން ވަގަށްނެގުމުގެ މައްސަލައެއްގެ ގޮތުގައި ތަހުގީގުކުރުމަށް އަންގާފައިވާކަމަށެވެ.
