ދުނިޔޭގެ ތައްޓަށް ކުޅޭ ފުޓްބޯޅަ މުބާރާތުގެ ޗެމްޕިއަން ޓީމަށް ދޭ ޝަރަފްވެރި ޓްރޮފީ (ވޯލްޑް ކަޕް ތަށި) ރާއްޖެއަށް ޖޫން މަހުގެ 24 ވަނަ ދުވަހު އަންނާނެއެވެ. އެއީ ރާއްޖޭގެ ތާރީޚުގައި މި އަގުބޮޑު ޓްރޮފީ ރާއްޖެއަށް ޒިޔާރަތް ކުރާ ފުރަތަމަ ފަހަރެވެ. ފުޓްބޯޅައަށް ދެވި ހިފާފައިވާ ދިވެހި ރައްޔިތުންނަށް އެ ތަށި ހަމަ ލޮލުން ބަލާލުމުގެ ފުރުސަތު ލިބިގެން ދިއުމަކީ ވަރަށް ބޮޑު އުފަލެކެވެ. ރާއްޖެ އަށް މި ޓްރޮފީ ކުރާ ޒިޔާރަތުގައި ދަތުރު ފެށީ ހުސްވި އަހަރުގެ ސެޕްޓެމްބަރު މަހުގައެވެ. 2017 ވަނަ އަހަރުގެ ސެޕްޓެމްބަރުން ޑިސެމްބަރު މަހުގެ ދެމެދުގައި ފުރަތަމަ ދަތުރު ކުރީ މި އަހަރުގެ ވޯލްޑްކަޕް އޮންނަ ރަޝިއާގެ 15 ސިޓީ އަކަށެވެ. އޭގެ ފަހުން ދުނިޔޭގެ 50 ގައުމަކަށް މި ތަށި ކުރާ ދަތުރު ފެށިއެވެ. ދަތުރު ނިންމާލާނީ ވޯލްޑްކަޕް ފެށެން 1 މަސް ދުވަހަށް ވުމުން އެނބުރި ރަޝިއާ އަށް ދިއުމާއި ހަމައިންނެވެ. މިފަހަރުގެ ޓުއަރ ނިމޭނީ މޮސްކޯ އިންނެވެ. އެއީ ޖޫން މަހުގެ 14 ވަނަ ދުވަހުއެވެ.

ތިރީގައި މި ބަލާލަނީ ވޯރލްޑްކަޕް ޓްރޮފީއާ ބެހޭ ގޮތުން އާއްމު ގޮތެއްގައި އެނގެން ޝައުގުވެރިވެދާނެ 10 ސުވާލެއްގެ ޖަވާބަށެވެ.

ޓުއަރގައި އަންނަނީ އަސްލު ތަށިތަ؟

ޓުއަރގައި ގައުމަތަކަށް ގެންދަނީ އަސްލު ޓްރޮފީއެވެ.

ތަށީގައި އަތް ލެވޭނެތަ؟

ވޯލްޑްކަޕް ތަށީގައި އާއްމުން އަތްލުމަކީ މަނާ ކަމެކެވެ. ތަށީގައި އަތްލެވޭނީ ޗެމްޕިއަން ޓީމަށާއި، ގައުމުތަކުގެ ވެރިންނަށެވެ.

އެއީ ރަނުން ހަދާފައިވާ އެއްޗެއްތަ؟

ޓްރޮފީ ހަދާފައިވަނީ 18 ކެރެޓް ރަނުންނެވެ. ޓްރޮފީގައި 5 ކިލޯގެ ރަން އެކުލެވެއެވެ.

ޓްރޮފީގެ ބޮޑުމިނަކީ ކޮބާ؟

ފީފާ ވޯލްޑް ކަޕް ޓްރޮފީގެ އުސްމިނުގައި 36.8 ސެންޓިމީޓަރު ހުރެއެވެ. ޖުމްލަ ބަރުދަނުގައި 6142 ގުރާމް ހުރެއެވެ. ތަށީގެ ފުލުގެ އެންމެ ފުޅާ ދިމާލުގައި ހުންނަނީ 13 ސެންޓިމީޓަރެވެ. 1974 ވަނަ އަހަރުން ފެށިގެން ތަށި ހޯދި ގައުމާއި ޓްރޮފީ ލިބުނު އަހަރު އެނގޭ ގޮތައް ޓްރޮފީގެ ފުލުގައި ކަނޑާ ނަގާފައި ހުރެއެވެ.

ޓްރޮފީ އުފެއްދީ ކާކު؟

ވޯލްޑް ކަޕް ގައި މިހާރު ބޭނުން ކުރާ ޓްރޮފީ އުފެއްދީ އިޓަލީގެ ރައްޔިތެއް ކަމަށްވާ ސިލްވިއޯ ގަޒަނިގާ އެވެ. އޭނާ އަކީ ފުޓްބޯޅަ އަށް މާ ބޮޑު ޝައުގުވެރި ކަމެއް ބަހައްޓާ މީހެއް ނޫން ކަމަށް އޭނާ ބުނެފައިވެއެވެ.

ޓްރޮފީގެ އަގަކީ ކިހާ ވަރެއް؟

ޓްރޮފީ އުފެއްދި އިރު އޭގެ އަގު ކަމަށް ވަނީ ފަންސާސް ހާސް ޑޮލަރެވެ. އެކަމަކު މިހާރު އޭގެ އަގު 10 މިލިއަން ޑޮލަރަށް އަރާނެ ކަމަށް ލަފާ ކުރެވެއެވެ.

ވޯލްޑް ކަޕް ޓްރޮފީ ފުރަތަމަ ކުރި ދަތުރަކީ ކޮބާ؟

ވޯލްޑް ކަޕް ޓްރޮފީގެ ތާރީހުގައި ފުރަތަމަ ދަތުރު ކުރީ 1930 ވަނަ އަހަރު ކޮންޓި ވާރޑީ ނަމަކަށް ކިޔާ ބޯޓެއްގައި އުރުގުއޭ އަށެވެ.

ޓްރޮފީ ވަގައް ނެގިތަ؟

ދެވަނަ ބޮޑު ހަނގުރާމަ ފެށުނު އިރު ޓްރޮފީ ހުރީ އިޓަލީގެ ބެލުމުގެ ދަށުގައެވެ. އެއީ 1938 ވަނަ އަހަރު ތަށި ލިބުނު ގައުމުގެ ހައިސިއްޔަތުންނެވެ. ހަނގުރާމަ އާއި ނާޒީންގެ ދުއްތުރާ އޮތްލެއް ބޮޑުކަމުން އިޓަލީ އަކީ މިފަދަ އަގު ބޮޑު ތައްޓެއް ބަހައްޓަށް އެކަށީގެންވާ މާހައުލެއް އޮތް ތަނެއް ނޫން ކަން އިޓަލީގެ ފުޓްބޯޅަ ފެޑެރޭޝަންގެ ރައީސް އޮޓޮރީނޯ ބަރައްސީ އަށް ވިސްނި ޓްރޮފީ ފޮރުވާފައި ހުރި ބެންކުގެ ހަރުގަނޑުން ނަގައިގެން ގެނެސް ބޫޓުލާ ފޮއްޓަކަށް ޓްރޮފީ ލުމަށްފަހު އޭނާގެ ނިދާ އެނދު ތަންދޮށަށްލާ ޓްރޮފީ ފޮރުވިއެވެ. ބޭނުމަކީ ތަށި ވަގައް ނަގައިފި ކަން ދެއްކުމާއެކު ނާޒީންގެ އަތްދަށުން ޓްރޮފީ ސަލާމަތް ކުރުމެވެ. އެފަހަރު ތަށި ވަގައް ނެގުމުން ސަލާމަތް ކުރެވުނީ މި އުކުޅުންނެވެ.

1966 ވަނަ އަހަރު އިނގިރޭސި ވިލާތުގައި އޮތް ވޯލްޑް ކަޕް ފެށެން އެންމެ 4 މަސް ދުވަހަށް ވެފައި ވަނިކޮށް ވޯލްޑްކަޕް ތަށި ވަގަށް ނެގިއެވެ. ތަށި ވަގައް ނެގީ، ވެސްޓްމިންސްޓަރ ސެންޓްރަލް ހޯލްގައި އާއްމުންނަށް ތަށި ދައްކާލުމަށް ބަހައްޓަފައި ހުއްޓައެވެ. އޭރު ތަށި ބަލަހައްޓަން 24 ގަޑީއިރު ފޯރި މަރަމުން ދިޔައެވެ. ތަށި ވަގައް ނެގުމާއެކު އިނގިރޭސި ވިލާތުގެ ހުރިހާ ފުލުހުން ވަގު ހޯދަން ނެރުނެވެ.

މުބާރާތް ފެށެން ވާއިރަށް ތަށި ނުހޯދިދާނެ ކަމަށް ބަލާ ތަށީގެ ނަކަލެއް ހެދުމަށް އިނގިރޭސި ވިލާތުން އެއާއެކު މަސައްކަތް ފެށިއެވެ. ނަސީބަކުން ނޫސް ކަރުދާސް ގަނޑަކަށްލާ އޮޅާލާފައި މީހެއްގެ ގޭގެ ބަގީޗާ ތެރޭގައި ތަށި ފޮރުވާފައި އޮއްވާ ކުއްތާ އަކަށް ތަށި ފެނިގެން އެ ކުއްތާ ވެރިމީހާގެ ސަމާލު ކަމަށް ގެނައެވެ. އެހިސާބުން ކަމާ ބެހޭ ފަރާތައް ތަށި ހަވާލު ކުރީއެވެ. ތަށި ހޯދުމުގެ އިނާމަކަށް ކުއްތާ އަށް އަހަރު ދުވަހުގެ ޑޯގް ފުޑް ލިބުނެވެ.

އިނގިރޭސިވިލާތުން ތަށި ވަގަށް ނަގާފައިވަނިކޮށް ދެ ވަނަ ފަހަރަށް އަނެއްކާވެސް ތަށި ވަގައް ނެގިއެވެ. އެއީ ވޯލްޑްކަޕް ތަށި (ޖޫލްސް ރިމެޓް ކަޕް) 1970 ވަނަ އަހަރު ބްރެޒިލް އަށް މިލްކު ވުމާ ގުޅިގެން ބްރެޒިލް އަށް ތަށި އެކީ ލިބުމުން ގެންގޮސް ބްރެޒިލްގެ ފުޓްބޯޅަ ކޮންފަޑަރޭޝަންގެ މައި އިދާރާގައި ބަހައްޓާފައި ހުއްޓާ ބަޔަކު ތަށި ވަގައް ނެގީއެވެ. ވަގަށް ނެގި ކަމުގެ ތުހުމަތުގައި 4 މީހެއްގެ މައްޗަށް ޣައިރު ހާޒިރުގައި ޝަރީއަތް ހިންގި އެވެ. އެކަމަކު ތައްޓެއް ނުފެނެއެވެ. ބެލެވޭ ގޮތުގައި ތަށި ވިރުވާލައިގެން ރަންކޮޅުގެ ބޭނުން ކޮށްލީއެވެ.

ޓްރޮފީ ކާމިޔާބު ކުރާ ގައުމަށް ޓްރޮފީ ލިބޭތަ؟

މިހާރު މި ބޭނުން ކުރާ ޓްރޮފީގެ ކުރިން ބޭނުން ކުރި ޖޫލްސް ރިމެޓް ޓްރޮފީ ބްރެޒިލް އަށް މިލްކް ވީ އިރު ފީފާގެ ގަވައިދު އޮންނަ ގޮތުން ޖެހިޖެހިގެން 3 ފަހަރު ޓްރޮފީ ލިބޭ ގައުމަކަށް ދާއިމީ ގޮތެއްގައި ޓްރޮފީ ދާއިމީ ގޮތެއްގައި ލިބެއެވެ. އަދި 2006 ވަނަ އަހަރުގެ ކުރިން ތަށި ހުންނަނީ ދެން އަންނަ މުބާރާތަކާ ހަމަ އަށް ތަށި ކާމިޔާބު ކުރާ ގައުމެއްގައެވެ. މިހާރު މި ބޭނުންކުރާ ޓްރޮފީގެ އޮރިޖިނަލް ޗެމްޕިއަން ޓީމަށް ގައުމަށް ގެންދާކަށް ނުލިބެއެވެ. މިހާރު ފީފާގެ ގަވައިދު އޮންނަ ގޮތުން ތަށި ކާމިޔާބު ކުރާ ގައުމަށް ގެންދަން ދެނީ ރިހިން ހަދާ ރަން ޕްލޭޓް ކޮށްފައި ހުންނަ ތައްޓެކެވެ.

ޓްރޮފީ ބަހައްޓާފައި ހުންނަނީ ކޮންތާކު؟

އަސްލު ތަށި ހުންނަނީ ޒިއުރިކްގެ ފުޓްބޯޅަ މިޔުޒިއަމް ގައެވެ. ތަށި އެތަނުން ނެރެނީ ކޮކާ ކޯލާ އާ ގުޅިގެން ފީފާ އިން ކުރިއަށް ގެންދާ ދަތުރަށާއި، ވޯލްޑްކަޕް މުބާރާތުގެ ފައިނަލް މެޗުގައި ދަނޑުގައި ބެހެއްޓުމަށެވެ.