އެޑް ޝީރަން އެންގޭޖް ވެއްޖެ
23 ޖެނުއަރީ 2018 | އަންގާރަ 05:54އެޑް ޝީރަން އެންގޭޖްވީ އޭނާގެ ލޯބިވެރިޔާ ޗެރީ ސީބޯންއާ
އެޑް ޝީރަން
މަޝްހޫރު ލަވަކިޔުންތެރިޔާ އެޑްވާޑް ކްރިސްޓޮފާ ޝީރަން (އެޑް ޝީރަން) އެންގޭޖްވެއްޖެއެވެ.
އެޑް ޝީރަންގެ ލޯބިވެރިޔާ ޗެރީ ސީބޯން އާއި އެންގޭޖްވުމަށް ފަހު އިންސްޓަގްރާމަށް ލާފައިވާ ފޮޓޯއެއްގައި އޭނާ ބުނީ އެ ދެ މީހުން ތިބީ ވަރަށް އުފަލުން ކަމަށެވެ.
އެޑް ޝީރަން އާއި ޗެރީ ސީބޯންއަކީ ސްކޫލު ދައުރުން ފަށައިގެން ވަރަށް އެކުވެރިކޮށް އުޅުނު ދެ މީހުންނެވެ. އެ ދެ މީހުންގެ އެކުވެރިކަން ލޯބީގެ ގުޅުމަށް ބަދަލުކުރީ 2015 ވަނަ އަހަރުގައެވެ.
ހޮކީ ކުޅުންތެރިޔާ ޗެރީ ސީބޯންއާ ބެހޭ ގޮތުން އެޑް ޝީރަން މީގެ ކުރިން ބުނެފައި ވަނީ އެ ދެ މީހުންގެ ގުޅުން ވަރަށް ބަދަހި ކަމަށާއި ޗެރީއަކީ އޭނާގެ ހަޔާތުގައި ވަރަށް މުހިއްމު މީހެއް ކަމަށެވެ. އަދި އޭނާގެ ހަޔާތުގައި ކަންބޮޑުވާވަރުގެ ކަމެއް ނެތް ކަމަށް ވަނީ ބުނެފައެވެ.
ޚަބަރުތައް ބުނާ ގޮތުގައި އެޑް ޝީރަން އާއި ޗެރީ ސީބޯން މި އަހަރު ތެރޭގައި ކައިވެނި ކުރާނެއެވެ.
އެޑް ޝީރަންގެ މިއުޒިކް ކެރިއާގައި އޭނާ އަށް ވަނީ ގިނަ އެވޯޑްތަކެއް ލިބިފައެވެ. މިދިޔަ އަހަރަކީ ވެސް އޭނާއަށް ކާމިޔާބު އަހަރެކެވެ. މިދިޔަ އަހަރު ނިކުތް އޭނާގެ "ޝޭޕް އޮފް ޔޫ" ލަވައަށް ވަނީ ގިނަ އެވޯޑްތަކެއް ލިބިފައެވެ.
