ވަގުތީގޮތުން ސަރުކާރަށް ޚަރުދުކުރާނެ ބަޖެޓެއް ފާސްކޮށް ސަރުކާރު އަލުން ހިނގައިގަތުމުގެ ފުރުސަތު ދިނުމަށް އެމެރިކާގެ ގާނޫނުހަދާ މަޖިލީހުގެ މަތިގެ، ސެނޭޓްގައި ރިޕަބްލިކަން ޕާޓީއާއި ޑެމޮކްރެޓިކް ޕާޓީން އެއްބަސްވުމަކަށް އަތުވެއްޖެއެވެ.

ޑެމޮކްރެޓިކް ޕާޓީގެ ޗަކް ޝޫމަރ ވިދާޅުވީ އިމިގްރޭޝަން ގާނޫނާ ބެހޭގޮތުން ރިޕަބްލިކަންއާއެކު ވާހަކަދައްކަމުންދާއިރު އެ މަނިކުފާނުގެ ޕާޓީން" ސަރުކާރު އަލުން ހުޅުވުމަށް ވޯޓް ދޭނެ" ކަމަށެވެ.

ޑެމޮކްރޭޓުންދަނީ ޒުވާން ރެފިއުޖީން ޑީޕޯޓްކޮށްލުން ހުއްޓުވޭނެ ގާނޫނެއް ފާސްްކުރުމަށް މަސައްކަތްކުރަމުންނެވެ.

ޝޫމަރ ވިދާޅުވީ ތިން ދުވަސްވަންދެން ސަރުކާރު ހުއްޓުމަކަށް އައިސްފައި އޮތް އޮތުން މަދު ގަޑިއިރުކޮޅެއްގެ ތެރޭ ނިމުމަކަށް ގެނެވޭނެ ކަމަށެވެ.

މިދިޔަ ހުކުރު ދުވަހުގެ ރޭ މެންދަމު 12:00 އާއި ހަމަޔަށް ބަޖެޓެއް ފާސްނުވުމުން އެމެރިކާގެ ސަރުކާރު ވަނީ ރަސްމީކޮށް ބަންދުވެފައެވެ.

ހަފްތާ ބަންދުގައި ސެނެޓުގައި ގިނަ މަޝްވަރާތަކެއް ޑިމޮކްރެޓުންނާއި ރިޕަބްލިކަން ޕާޓީއިން ކޮށްފައިވެއެވެ. އެހެން ނަމަވެސް އެމެރިކާގެ އިމިގްރޭޝަން ޤާނޫނުތަކަށް ކުރީގެ ރައީސް ބަރަކް އޮބާމާ ގެންނެވި އިސްލާހުތަކަށް ގެންނެވި ބަދަލުތައް ދެމެހެއްޓުމަށް ޑިމޮކްޓިކް ޕާޓީއިން އެދޭ އެދުމަށް އިޖާބަ ދިނުމަށް ޓްރަމްޕް އެއްބަސްވެވަޑައިނުގަތުމުން، ވައިޓް ހައުސްއިން ހުށަހެޅި ބަޖެޓަށް ޑިމޮކްރެޓިކް ޕާޓީއިން ވޯޓު ދީފައެއް ނުވެއެވެ.

ވަގުތީ ގޮތުން ސަރުކާރު ހިންގަން ބޭނުންވާ ބަޖެޓް ފާސްކުރުމަށް ސެނެޓްގެ 100 މެމްބަރުންގެ ތެރެއިން 60 މެމްބަރުންގެ ވޯޓު ބޭނުންވާއިރު، ލިބިފައިވަނީ 51 ވޯޓެވެ.

ސެނެޓުގައި ވެރިކަންކުރާ ރިޕަބްލިކަން ޕާޓީއަށް މެޖޯރިޓީ ލިބިފައި އޮތަސް، އެޕާޓީއަށް ލިބިފައިވަނީ 51 ގޮނޑިކަމުން ޑިމޮކްރެޓުންގެ ތާޢިދު މިފަދަ ކަންކަމަށް ބޭނުންވެއެވެ.