ދެކުނު ޗައިނާ ކަނޑަށް އެމެރިކާ ސިފައިން ވަނުމަކީ ޗައިނާގެ ސަލާމަތާއި އިސްތިޤްލާލަށް ކުރި ނުރައްކަލެއް ކަމަށް ޗައިނާ އިން ބުނެފިއެވެ.

ދެކުނު ޗައިނާ ކަނޑުގެ ސަރަހައްދަށް އެމެރިކާގެ ކަނޑުގެ ސިފައިންގެ މަނަވަރެއް ނިމިދިޔަ ހަފްތާގައި ވަން ކަމަށް އެމެރިކާ އިން ބުނެފައިވާއިރު، މިމައްސަލައިގައި ޗައިނާ އިން ވަނީ ނުރުހުން ފާޅުކޮށްފައެވެ. އަދި އެމެރިކާގެ އެ އަމަލުގެ ސަބަބުން ޗައިނާގެ ޤައުމީ ސަލާމަތަށް ނުރައްކާވެ، ޗައިނާގެ އުޅަނދުތަކަށާއި، އެއުޅަނދުތަކުގައި ތިބި ފަޅުވެރިންނަށް ވެސް ނުރައްކާވި ކަމަށް ޗައިނާ އިން ބުނެއެވެ.

ޗައިނާގެ ޚާރިޖިއްޔާ އިން ބުނީ އެމެރިކާގެ ކަނޑުގެ ސިފައިންގެ މަނަވަރު ޔޫއެސްއެސް ހޮޕަރ ދެކުނު ޗައިނާ ކަނޑުގައި އޮންނަ ހުއަންގްޔަން އައިލެންޑްގެ 12 މޭލު ކައިރިއަށް އައި ކަމަށެވެ.

ޕެންޓަގަން އިން ބުނީ އެމެރިކާގެ އަސްކަރީ މަނަވަރު  ދަތުރުކުރީ ހުއަންގްޔަންގްގެ 12 ނޯޓިކަލް މޭލު ބޭރުން ކަމަށާއި، މިއީ ބައިނަލްއަޤްވާމީ ޤާނޫނުން ހުއްދަކުރާ ހިސާބެއް ކަމަށެވެ. އަދި އެސަރަހައްދުގައި މަޑުނުކުރާ ކަމަށާއި، އެމެރިކާގެ މަނަވަރު ބާރު ސްޕީޑްގައި އެސަރަހައްދުން ދިޔައީ ކަމަށެވެ. މިއީ އިނޮސެންޓް ޕެސެޖްގެ ގޮތުގައި ބައިނަލްއަޤްވާމީ ޤާނޫނުތަކުން ހުއްދަ ކަމެއް ކަމަށް ޕެންޓަގަ އިން ބުނެއެވެ.

ހުއަންގްޔަން އައިލެންޑަކީ ޗައިނާގެ ސަރަހައްދެއް ކަމަށް ޗައިނާ އިން ދައުވާކުރާ އިރު، އެސަރަހައްދުގެ މިލްކުވެރިކަމާ މެދު ފިލިޕީންސް އިން ވެސް ދައުވާކުރެއެވެ. ދެކުނު ޗައިނާ ކަނޑުގެ ބޮޑު ސަރަހައްދަކަށް ޗައިނާ އިން ވެރިވެގެންފައިވާއިރު، އިރުމަތީ އޭޝިއާގެ ގިނަ ޤައުމުތަކަކުން އެސަރަހައްދުގެ މިލްކުވެރިކަމާ މެދު ދައުވާކުރެއެވެ.

އެމެރިކާގެ އަސްކަރީ މަނަވަރެއް ދެކުނު ޗައިނާ ކަނޑުގެ ސަރަހައްދަށް ވަދެގެން މައްސަލަ ޖެހިފައިވާއިރު، އުތުރު ކޮރެއާއާ ދެކޮޅަށް ފިޔަވަޅު އެޅުމަށް ޗައިނާގެ އެހީތެރިކަން ހޯދުމަށް އެމެރިކާގެ ރައީސް ޑޮނަލްޑް ޓްރަމްޕް ގެންދަވަނީ މަސައްކަތް ކުރައްވަމުންނެވެ.

ދެކުނު ޗައިނާ ކަނޑުގެ ސަރަހައްދަށް ޗައިނާ އިން ވެރިވެގަނެ، އެކަނޑުގައި ފަޅުތައް ހިއްކައިގެން ރަށްތައް ބިނާކޮށް، އަސްކަރީ މަރުކަޒުތައް ބިނާކުރާ މައްސަލައިގައި އެމެރިކާ އިން ވަނީ ނުރުހުން ފާޅުކޮށްފައެވެ.