ފިލިޕީންސްގެ ވެރިރަށް މެނީލާ ވެފައި މިވަނީ ދުނިޔޭގައި ނިސްބަތުން ޓީނޭޖް އުމުރުގެ ގިނަ ކުދިން މަންމައިންނަށްވާ އެއް ސިޓީގެ ގޮތުގައެވެ. އެހެންކަމުން ބައެއް މީހުން ކިޔާ އުޅެނީ ވެސް "ބޭބީ ފެކްޓަރީ" އެވެ.

މެނީލާގައި ހުންނަ ޑރ. ޖޯސް ފަބެއްލާ މެމޯރިއަލް ހޮސްޕިލުން ބުނީ ކޮންމެ 12 މިނެޓަކުން ކުއްޖަކު އުފަންވާ ކަމަށާއި އޭގެ ތެރެއިން ވިހާ ގިނަ މީހުންނަކީ 13 އަހަރާއި 19 އަހަރާ ދެމެދުގެ މީހުން ކަމަށެވެ. އަދި އޭގެ ތެރެއިން ބައެއް މީހުންނަކީ އުމުރުން 13 އަހަރުގެ އަންހެން ކުދިން ކަމަށް ވެސް އެ ހޮސްޕިޓަލުން ބުނެއެވެ.

ޒުވާނުން ޅަ އުމުރުގައި ކުދިން ހޯދަމުންދާއިރު، އުމުރުން 23 އަހަރުގެ ބައެއް ޒުވާނުން ހަތަރު ކުދިންނަށް ވުރެ ވެސް ގިނަ ކުދިން ހޯދަމުންދާ ކަމަށް ރިޕޯޓްތައް ބުނެއެވެ. ރިޕޯޓްތައް ބުނާ ގޮތުގައި ބައެއް ޒުވާނުން ކައިވެންޏަކާ ނުލައި ރައްޓެހިވެގެން އުޅޭ ކުއްޖާއާ އެކު ގުޅުން ހިންގުމުން ބަނޑުބޮޑުވުމުން އިންނަން މަޖުބޫރު ވަނީއެވެ. އެގޮތުން ޅަ އުމުރުގައި ދަރިން ހޯދަނީ ގަސްތުގައި ނޫން ކަމަށާއި ދިރިއުޅެނީ ވެސް ވަރަށް ހާލުގައި ކަމަށް ވެސް ޒުވާން ބައެއް މައިން ބުނެއެވެ.  

ފިލިޕީންސްގެ އާބާދީ 86 ޕަސެންޓް ކްރިސްޓިއަނުންނަށް ވިޔަސް އެބޯޝަން ހެދުމަކީ އެގައުމުގައި މުޅިން މަނާ ކަމެކެވެ. އެބޯޝަން ހެދުމާއި އެފަދަ ބޭހެއް ވިއްކާކަން ސާބިތުވެއްޖެ ނަމަ ހަ އަހަރުގެ ޖަލު ހުކުމެއް އާދެއެވެ.

އޭޝިއާގެ ގައުމުތަކުގެ ތެރެއިން ޕިލިޕީންސް ވެފައި ވަނީ ވޭތުވެދިޔަ 20 އަހަރުގެ ތެރޭގައި ޓީނޭޖް އަންހެން ކުދިން އެންމެ ގިނައިން ވިހައި ނުވަތަ ބަލިވެއިން ގައުމުގެ ގޮތުގައެވެ.

ޓީނޭޖް އުމުރުގެ ގިނަ އަދަދެއްގެ ޒުވާނުން ޅައުމުރުގައި ކުދިން ހޯދަމުންދާތީ އެކުދިން ކިޔެވުމަށް ނޭދެވޭ އަސަރުތައްކޮށް ހައި ސްކޫލް ނިންމުމުގެ ފުރުސަތު ގެއްލިގެންދެއެވެ. އަދި އެކަމުގެ ސަބަބުން ފިލިޕީންސްގެ އިގްތިސާދަށް ވެސް ނޭދެވޭ އަސަރުތައް ކުރަމުންދާ ކަމަށް ވެސް ރިޕޯޓްތައް ބުނެއެވެ.