6 ފަހަރު ޖައްވަށް ގޮސް، ހަނދުގައި ހިނގި އެސްޓްރޮނޯޓް ޖޯން ޔަންގް މަރުވެއްޖެ
މަރުވީ ނިއުމޯނިއާގައި
ޔަންގް ވަނީ ހަނދުގައި ހިނގާފައި
ހަ ފަހަރެއްގެ މަތިން ޖައްވަށް ގޮސް، ހަނދުގައި ހިނގާފައިވާ ނާސާގެ އެސްޓްރޮނޯޓް ޖޯން ޔަންގް ހުކުރު ދުވަހު މަރުވެއްޖެއެވެ.
ހޮނިހިރު ދުވަހު ނާސާއިން ބުނީ އުމުރުން 87 އަހަރުގައި ޖޯން ޔަންގް މަރުވީ ނިއުމޯނިއާ ޖެހިގެންކަމަށެވެ. ޔަންގްވަނީ ނާސާގެ ޖެމަނައި، އެޕޯލޯ އަދި ސްޕޭސް ޝަޓްލް ޕްރޮގްރާމްތަކުގައި ޖައްވަށް ގޮސްފައެވެ. އޭނާއަކީ 3 ޕްރޮގްރާމްގައި ޖައްވަށް ދިޔަ ހަމައެކަނި އެސްޓްރޮނޯޓެވެ.
1962ވަނަ އަހަރު ޔަންގް ނާސާއާއި ގުޅުމަށްފަހު އެންމެ ފުރަތަމަ ޖައްވަށް ގޮސްފައިވަނީ 1965ވަނަ އަހަރު ޖެމަނައި 3 ގައެވެ. އެފަހަރު ޖައްވަށް ދިޔައިރު ނާސާއަށް ނާންގައި، ސްޕޭސްސޫޓްގެ ތެރޭގައި ފޮރުވައިގެން ޔަންގްވަނީ ކޯންޑް ބީފް ސޭންޑްވިޗެއް ޖައްވަށް ގެންގޮސްފައެވެ.
ޖޯން ޔަންގްގެ ނާސާގެ ރަސްމީ ފޮޓޯއެއް
ޔަންގް ވަނީ ދެފަހަރު ހަނދަށް ދިޔަ ދަތުރުތަކުގައި ބައިވެރިވެފައެވެ. ފުރަތަމަ ދަތުރުގައި 1969ވަނަ އަހަރު އެޕޯލޯ 10ގެ ފަޅުވެރިންނާއިއެކު ހަނދުގެ ވަށައިގެން އޯބިޓްކުރިއެވެ. އެއީ އެއަހަރު ފުރަތަމަ ފަހަރަށް އިންސާނުން ހަނދަށް ދިޔަ ދަތުރަށް ތައްޔާރުވުމަށް ކުރި ދަތުރެކެވެ. އަދި އޭގެ ފަހުގައި 1972ވަނަ އަހަރު އެޕޯލޯ 16 ގައި ހަނދަށް ޖައްސައި، ހަނދުގައި ހިނގާފައިވެއެވެ.
ޖައްވަށް ފޮނުވާލި އެންމެ ފުރަތަމަ ސްޕޭސް ޝަޓްލްގައިވެސް 1981ވަނަ އަހަރު ކޮމާންޑަރެއްގެ ހައިސިއްޔަތުން ޔަންގް ވަނީ ޖައްވަށް ގޮސްފައެވެ.
ޖޯން މަރުވުމާއެކު ނާސާއިންނާއި މުޅި އެމެރިކާއިން ގެންދަނީ ހިތާމަ ފާޅުކުރަމުންނެވެ. ޚާއްސަކޮށް ނާސާގެ އެސްޓްރޮނޯޓުންނާއި ޖޯން ޔަންގް ކުރިން ޕައިލެޓެއްގެ ގޮތުގައި މަސައްކަތްކުރި އެމެރިކާގެ ނޭވީއިން ވަނީ ހިތާމަފާޅުކޮށްފައެވެ.
