ދިގު އިންތިޒާރަކަށް ފަހު ޖަސްޓިން ޓިމްބަލޭކްގެ އާ އަލްބަމް ފެބްރުއަރީ 2 ގައި ރިލީޒް ކުރަނީ

ދިގު އިންތިޒާރަކަށް ފަހު ހޮލީވުޑްގެ މަޝްހޫރު ލަވަކިޔުންތެރިޔާ ޖަސްޓިން ޓިމްބަލޭކް އާ އަލްބަމް ރިލީޒްކުރާ ދުވަސް އިއުލާންކޮށްފިއެވެ.

އޭނާގެ އެންމެ ފަހު އަލްބަމް "ދަ 20/20 އެކްސްޕީރިއަންސް - ޓޫ އޮފް ޓޫ" ރިލީޒްކުރިތާ ހަތަރު އަހަރު ފަހުން ޖަސްޓިންގެ އާ އަލްބަމެއް ރިލީޒް ކުރަން ތައްޔާރު ވަމުންދާކަން އިއުލާން ކޮށްފައި ވަނީ އަންގާރަ ދުވަހުވެ.

ފެބްރުއަރީ 2 ގައި "މޭން އޮފް ދަ ވުޑްސް" ރިލީޒްކުރާ ކަން އިއުލާން ކޮށްފައި ވަނީ ޓްވިޓާގައި އެއް މިނިޓްގެ ވީޑިއޯއެއް މެދުވެރިކޮށެވެ.

މި އަލްބަމްގެ "އިންސްޕިރޭޝަން" އަކީ އޭނާގެ ދަރިފުޅާއި އަންހެނުންނާއި އާއިލާކަން ފާހަގަކޮށް މިއީ ވަރަށް "ޕަރސަނަލް" އަލްބަމެއްކަން، ގްރެމީ އެވޯޑްގެ އިތުރުން އެހެނިހެން ގިނަ އެވޯޑްތަކެއް ކާމިޔާބު ކޮށްފައިވާ ޖަސްޓިން ބުންޏެވެ.

ވީޑިއޯގައި އެކި މަންޒަރު ފެނިގެންދާއިރު، އޭނާގެ އަންހެނުން، މަޝްހޫރު އެކްޓްރެސް ޖެސިކާ ބީލް އާއި އެމީހުންގެ ދަރިފުޅު، ދެ އަހަރުގެ ސިލަސް ވެސް ފެނިގެންދެއެވެ.

"މޭން އޮފް ދަ ވުޑްސް" ގައި ޖަސްޓިންއާ އެކު މަސައްކަތް ކޮށްފައިވާ އާޓިސްޓުންގެ ތެރޭގައި ފެރެލް، އެލީޝާ ކީސް، ޓިމްބަލޭންޑް އަދި ނެޕްޓިއުން ހިމެނެއެވެ.

"މޭން އޮފް ދަ ވުޑްސް" ރިލީޒްކުރާތާ ދެ ދުވަސް ފަހުން، ފެބްރުއަރީ 4 ގައި ޖަސްޓިން ސުޕަރބޯލް ހާފްޓައިމް ޝޯވގައި ޕަރފޯމް ކުރާނެވެ.

ނުވަދިހައިގެ އަހަރުތަކުގައި ފުރަތަމަ ފެނިގެން ދިޔަ ޖަސްޓިން ޓިމްބަލޭކް މަޝްހޫރު ވެފައި ވަނީ އެމެރިކާގެ ފިރިހެން ބޭންޑެއް ކަމަށްވާ "އެންސިންކް"ގެ މައި ލަވަކިޔުންތެރިޔާގެ ގޮތުގައެވެ. އެއަށް ފަހު ކާމިޔާބު ސޯލޯ ކެރިއަރަކަށް ފަހު ޖަސްޓިން ވަނީ މިއުޒިކް ދުނިޔެއިން ބްރޭކެއް ނެގުމަށް ފަހު އެކްޓް ކުރުމަށް ފޯކަސް ކޮށްފައެވެ. އެ ގޮތުން އޭނާ ވަނީ ވިއްސަކަ ފިލްމްގައި ހަރަކާތްތެރިވެފައެވެ. އޭގެ ތެރެއިން "ފްރެންޑްސް ވިތު ބެލެނެފިޓްސް" އާއި، "ދަ ސޯޝަލް ނެޓްވޯކް" "އިން ޓައިމް"، "ދަ ލަވް ގްރޫ"، " ދަ އޯޕެން ރޯޑް" އަދި "އަލްފާ ޑޯގް" ފާހަގަކޮށްލެވެއެވެ. އަދި އެނިމޭޓެޑް ފިލްމްތައް ކަމަށްވާ "ޔޯގީ ބެއާ" އާއި "ޝްރެކް ދަ ތާޑް" އަދި "ޓްރޯލްސް" ގެ ކެރެކްޓާތަކަށް އަޑު އަޅާފައި ވެއެވެ. "މޭން އޮފް ދަ ވުޑްސް' އަކީ މި ބްރޭކަށް ފަހު ޖަސްޓިން ރިލީޒްކުރާ ފުރަތަމަ އަލްބަމެވެ.