އަނެއްކާ ވެސް ގައުމީ ޓީމަށް ކުޅެން ޔާޔާ ޓޫރޭ ނިންމައިފި

ގައުމީ ޓީމަށް ކުޅުން ހުއްޓާލަން ނިންމި ނިންމުން އަނބުރާ ގެންގޮސް އަލުން އަނބުރާ ގައުމީ ޓީމަށް ކުޅެން މެންޗެސްޓާ ސިޓީއަށް ކުޅެމުން އަންނަ އައިވޮރީ ކޯސްޓްގެ މިޑްފީލްޑަރު ޔާޔާ ޓޫރޭ ނިންމައިފިއެވެ.

އުމުރުން 34 އަހަރުގެ ތަޖުރިބާކާރު މިޑްފީލްޑަރު ގައުމީ ޓީމަށް ކުޅުން ހުއްޓާލިކަން އިއުލާނު ކުރީ މިދިޔަ އަހަރުގެ ސެޕްޓެމްބަރު މަހުގެ ތެރޭގައެވެ. އޭރު އޭނާއަކީ އައިވަރީ ކޯސްޓުގެ ޓީމުގެ ކެޕްޓަންވެސްމެއެވެ. އެހެން ނަމަވެސް އޭނާ ވަނީ މި ނިންމުން އަނބުރާ ގެންދިޔަކަން ކަށަވަރު ކޮށްދީފައެވެ.

ޓޫރޭ ކުރި ޓްވީޓެއްގައި ވަނީ އޭނާގެ ގައުމު ދެކެ ވަރަށް ލޯބިވާ ކަމަށާއި ގައުމީ ޓީމަށް އޭނާ އަލުން އަނބުރާ ކުޅެން ބޭނުންވާ ކަމަށް ބުނެފައެވެ. އަދި އޭނާގެ ތަޖުރިބާގެ އަލީގައި ޒުވާން ކުޅުންތެރިންނަށް އެހީތެރިވާން ބޭނުންވާ ކަމަށް ވެސް ޓޫރޭގެ މި ޓްވީޓުގައިވެއެވެ. އެހެންކަމުން އައިވަރީ ކޯސްޓުން ދެން ކުޅުމަށް ހަމަޖެހިފައިވާ ރަހުމަތްތެރިކަމުގެ މެޗުތަކަށް އޭނާ ނެގުމަކީ އެކަށީގެންވާ ކަމެކެވެ.

މިކަމާއި ގުޅިގެން އޭނާގެ އޭޖެންޓު ޑިމިޓްރީ ސެލުކް ކުރި ޓްވީޓެއްގައި ވަނީ ގައުމީ ޓީމަށް އޭނާ ކުޅެން ނިންމީ އަނެއްކާ ވެސް އެ ގައުމަށް ތައްޓެއް ހޯދައިދިނުމުގެ އުއްމީދުގައި ކަމަށެވެ.

އަންނަ އަހަރު ރަޝިއާގައި އޮންނަ ވޯލްޑް ކަޕުން އެ ގައުމަށް ފުރުސަތު ގެއްލުނު ނަމަވެސް 2019 ވަނަ އަހަރު އޮންނަ އެފްރިކަން ކަޕް އޮފް ނޭޝަންސްގެ ކޮލިފައިންއަށް އެ ގައުމުގެ ގައުމީ ޓީމު އަންނަނީ ތައްޔާރު ވަމުންނެވެ. ކޮލިފައިން ފެށުމަށް ހަމަޖެހިފައިވަނީ އަންނަ އަހަރުގެ މާޗު މަހުގައެވެ.

މެންޗެސްޓާ ސިޓީ ދޫކޮށް އެހެން ޓީމަކަށް ޓޫރޭ ބަދަލުވާން އުޅޭ ކަމަށް ވެސް ބައެއް މީޑިއާތަކުން ވަނީ ރިޕޯޓު ކޮށްފައެވެ. ބާސެލޯނާ ދޫކޮށް ޓޫރޭ ސިޓީއާ ގުޅިފައިވަނީ 2010 ވަނަ އަހަރުއެވެ. އޭނާގެ ލީޑާޝިޕުގެ ދަށުން އެ ޓީމުން ގިނަ ކާމިޔާބުތަކެއް ހޯދާފައިވާއިރު އޭނާގެ އޭޖެންޓު ވަނީ މިވާހަކަތައް ދޮގުކޮށްފައެވެ.

މި ވާހަކަތައް ދޮގު ކުރަމުން ސެލުކް ބުނެފައިވަނީ ޓޫރޭ ސިޓީގައި ހުރީ ވަރަށް ހިތްހަމަޖެހިގެން ކަމަށާއި ފިނި މޫސުމުގެ ޓްރާންސްފާގައި އޭނާ އެހެން ޓީމަކަށް ބަދަލުނުވާނެ ކަމަށެވެ. އޭނާ ބޭނުން ވަނީ ތިން ފަހަރެއްގެ މަތިން ޕްރިމިއާ ލީގުގެ ތަށި އުފުލާލަން ކަމަށާއި އަދި އޭނާގެ ތަޖުރިބާގެ ބޭނުން ކޮށްގެން ޒުވާން ކުޅުންތެރިންނަށް އެހީވުމަށް ވެސް ޓޫރޭ ބޭނުންވާ ކަމަށް އޭނާގެ އޭޖެންޓް ހާމަކޮށްފައިވެއެވެ.

ޓޫރޭ އެންމެފަހުން ގައުމީ ޓީމަށް މެޗެއް ކުޅެދީފައި ވަނީ 2015 ވަނަ އަހަރު އެފްރިކަން ކަޕް އޮފް ނޭޝަންސްގެ ފައިނަލުގައެވެ. އޭނާ ވަނީ އައިވޮރީ ކޯސްޓުގެ ގައުމީ ޓީމަށް 100 މެޗު ކުޅެދީ 19 ލަނޑު ޖަހައިދީފައެވެ. އޭނާގެ ކެޕްޓަންކަމުގެ ދަށުން 2015 ވަނަ އަހަރުގެ އެފްރިކަން ކަޕް އޮފް ނޭޝަންސް އެ ގައުމުން ކާމިޔާބު ކުރިއެވެ. ޓޫރޭގެ ކާމިޔާބު ކެރިއަރުގައި އޭނާ ވަނީ ހަތަރު ފަހަރެއްގެ މަތިން އެފްރިކާގެ އެންމެ މޮޅު ކުޅުންތެރިޔާގެ މަގާމު ހޯދާފައެވެ.