ވޯލްޑްކަޕް ފެށުމުގެ ކުރިން މުބާރާތުގެ ތަށި ރާއްޖެއަށް

އަންނަ އަހަރު ރަޝިއާގައި ބާއްވާ ވޯލްޑްކަޕް ފުޓުބޯޅަ މުބާރާތުގެ ކުރިން އެ މުބާރާތުގެ ތަށި ރާއްޖެ ގެންނަ ގޮތަށް ހަމަޖެހިއްޖެއެވެ.

ސްރީ ލަންކާގެ ނޫހަކުން ބުނީ ވޯލްޑްކަޕް ފެށުމުގެ ކުރިން މިފަހަރު ޖުމްލަ 54 ގައުމަކަށް މުބާރާތުގެ ތަށި ގެންދިޔުމަށް ހަމަޖެހިފައިވާ ކަމަށެވެ. އެގޮތުން އަންނަ އަހަރުގެ ޖެނުއަރީ މަހުގެ 23 ވަނަ ދުވަހު ތަށި ސްރީ ލަންކާ އަށް ގެންދާނެ ކަމަށާއި، އެ ތަށި ދައްކާލާނީ ކޮލަމްބޯގައި ކަމަށެވެ.

މި ނޫހުގައި ބުނެފައި ވަނީ ތަށި ރާއްޖެ އަށް ވެސް ގެނައުމަށް ހަމަޖެހިފައިވާ ކަމަށާއި، ރާއްޖެއަށް ތަށި ގެންނާނީ އަންނަ އަހަރުގެ ޖެނުއަރީ މަހުގެ 24 ވަނަ ދުވަހު ކަމަށެވެ.

މިކަމާ ގުޅިގެން އެފްއޭއެމްގެ ޖެނެރަލް ސެކެޓްރީ ހުސެއިން ޖަވާޒް (ޖަވާ) ވިދާޅުވީ، ވޯލްޑްކަޕްގެ ތަށި އަންނަ އަހަރުގެ ޖެނުއަރީ މަހުގެ 24 ވަނަ ދުވަހު ރާއްޖެ ގެނައުމަށް މަސައްކަތްކުރަމުން އަންނަ ކަމަށާއި، އެކަން އަދި ކަށަވަރުނުވާ ކަމަށެވެ.

ވޯލްޑްކަޕް ތަށި އެކި ގައުމުތަކަށް ގެންދިޔުމަށް ޓުއާ ފަށާނީ އަންނަ އަހަރުގެ ޖެނުއަރީ މަހުގެ 22 ވަނަ ދުވަހު އިނގިރޭސި ވިލާތުގެ ލަންޑަނުންނެވެ.

ރާއްޖެ ގެންނަ ވޯލްޑްކަޕް ތަށްޓަކީ 18 ކެރެޓު ރަނުން ހަދާ، 1974 ވަނަ އަހަރު އުފެއްދި ތަށްޓެކެވެ. މި ތަށި އެންމެ ފަހުން ކާމިޔާބުކޮށްފައި ވަނީ 2014 ވަނަ އަހަރު ޖަރުމަނެވެ. މި ތަށީގެ އަގު ގާތްގަނޑަކަށް އެއްލައްކަ ފަންސާސްހާސް ޑޮލަރަށް އަރައެވެ.