ޔުނައިޓެޑުން އޮޒިލް އަށް ޝައުގުވެރިކަން ފާޅުކޮށްފި

މެންޗެސްޓާ ޔުނައިޓެޑުން އާސެނަލް އަށް ކުޅެމުން އަންނަ މެސުޓް އޮޒިލް އަށް ޝައުގުވެރިކަން ފާޅުކޮށްފި ކަމަށް ރިޕޯޓްތައް ބުނެފިއެވެ.

ޑެއިލީ މެއިލް އިން ބުނީ ޖެނުއަރީ ޓްރާންސްފާ އަށް އަމާޒުކޮށްގެން އޮޒިލް ހޯދުމަށް ޔުނައިޓެޑުން ޝައުގުވެރިވާ ކަމަށާއި، އެގޮތުން އޭނާ ހޯދުމަށް ޔުނައިޓެޑުން ބިޑެއް ތައްޔާރުކުރަމުން އަންނަ ކަމަށެވެ.

އާސެނަލްއާ އެކު އޮޒިލް ހަދާފައިވާ އެއްބަސްވުމުގެ މުއްދަތު މި ސީޒަނުގެ ނިޔަލަށް ހަމަވާއިރު، އޭނާ އެ ކްލަބާ އެކު ހަދާފައިވާ އެއްބަސްވުން އާކުރުމަށް އާސެނަލް އިން ދަނީ މަސައްކަތް ކުރަމުންނެވެ. އޮޒިލްގެ އެއްބަސްވުން އާނުކޮށް ސީޒަން ނިމިއްޖެ ނަމަ، އޭނާ އެހެން ކްލަބަކަށް ބަދަލުވާން ޖެހޭނީ ފްރީ އެޖެންޓެއް ގޮތުގައެވެ.

އޮޒިލް ހޯދުމަށް ގިނަ ކްލަބްތަކުން އަންނަނީ މަސައްކަތްކުރަމުންނެވެ. އޭގެ ތެރޭގައި ސްޕެއިން އަދި ޖަރުމަންގެ ކްލަބްތައް ވެސް ހިމެނެއެވެ. އެހެން ނަމަވެސް ޓްރާންސްފާއާ ގުޅިގެން އޮޒިލް އަދި އެއްވެސް އެއްޗެއް ބުނެފައެއް ނުވެއެވެ.

ޖަރުމަނުގެ ޝާލްކޭ އިން 2006 ވަނަ އަހަރު ކެރިއަރު ފެށި އޮޒިލް ވިދާލީ 2010 ވަނަ އަހަރު ސްޕެއިންގެ ރެއާލް މެޑްރިޑަށް ބަދަލުވި ހިސާބުންނެވެ. އެގޮތުން އޭނާ ވަނީ އެ ކްލަބަށް ކުޅުނު ހަތަރު ސީޒަނުގައި 159 މެޗު ކުޅެ، 27 ލަނޑު ކާމިޔާބުކޮށްފައެވެ. އޭނާ ވަނީ އެ ކްލަބާއެކު ސްޕެނިޝް ލަލީގާ، ކޮޕަ ޑެލްރޭ އަދި ސްޕެނިޝް ސުޕަރ ކަޕް ވެސް ކާމިޔާބުކޮށްފައެވެ.

ރެއާލް ދޫކޮށްލުމަށް ފަހު އޮޒިލް އާސެނަލް އަށް ބަދަލުވީ 2013 ވަނަ އަހަރެވެ. އެގޮތުން އޭނާ ވަނީ މިހާތަނަށް އެ ކްލަބަށް ކުޅުނު ހަތަރު ސީޒަނުގައި 168 މެޗު ކުޅެ، 33 ލަނޑު ކާމިޔާބުކޮށްފައެވެ. މީގެ އިތުރުން އޭނާ ވަނީ އެ ކްލަބާއެކު އެފްއޭ ކަޕް ދެފަހަރު އަދި އެފްއޭ ކޮމިއުނިޓީ ޝީލްޑް އެއް ފަހަރު ކާމިޔާބުކޮށްފައެވެ.