ޕްރިޔާންކާ ޗޯޕްރާ އަށް "މަދާ ޓެރީސާ މެމޯރިއަލް އެވޯޑް" ލިބިއްޖެ

އދ.ގެ ގްލޯބަލް އެންބެސެޑަރު އަދި ބޮލީވުޑްގެ އެންމެ ކާމިޔާބު އެއް ބަތަލާ ޕްރިޔާންކާ ޗޯޕްރާއަށް "މަދާ ޓެރީސާ މެމޯރިއަލް އެވޯޑް" ލިބިއްޖެއެވެ.

ޕްރިޔާންކާ އަށް މަދާ ޓެރީސާ އެވޯޑް ލިބިފައި ވަނީ ރެފިޔުޖީންނާއި ގެއްލިފައިވާ މީހުންނާ އަދި އިންސާނީ ހައްގުތައް ހިމާޔަތްކޮށް ރައްކާތެރިކުރުމަށް ކުރާ މަސައްކަތުގެ ތެރެއިންނެވެ. އެގޮތުން ޕްރިޔާންކާ އަށް ލިބިފައި ވަނީ "މަދާ ޓެރީސާ މެމޯރިއަލް އެވޯޑް ފޯ ސޯޝަލް ޖަސްޓިސް އެވޯޑްއެވެ.

ޕްރިޔާންކާކުރާ އިޖުތިމާއީ މަސައްކަތްތައް ފާހަގަކޮށް އޭނާ އަށް މަދާ ޓެރީސާ މެމޯރިއަލް އެވޯޑް ފޯ ސޯޝަލް ޖަސްޓިސްގެ އެވޯޑްއާ ހަވާލުވުމުގެ ދައުވަތު ދީފައި ވަނީ ދަ ހާމަނީ ފައުންޑޭޝަން އިންނެވެ. އަދި ޕްރިޔާންކާގެ ފަރާތުން އެ އެވޯޑާ ހަވާލުވީ އޭނާގެ މަންމަ މަދޫ ޗޯޕްރާއެވެ.

އެވޯޑާ ހަވާލުވުމަށް ފަހު ޕްރިޔާންކާގެ މަންމަ ބުނީ މިފަދަ އެވޯޑެއް ޕްރިޔާންކާ އަށް ލިބުނީތީ ފަހުރުވެރިވާ ކަމަށެވެ. އަދި ޕްރިޔާންކާ ކުރާ މަސައްކަތްކާ މެދު ވަރަށް ބޮޑަށް ފަހުރުވެރިވާ ކަމަށް ވެސް ޕްރިޔާންކާގެ މަންމަ ބުންޏެވެ.

މީގެއިތުރުން ޕްރިޔާންކާގެ މަންމަ ބުނީ ޕްރިޔާންކާ އަސް މިފަދަ އެވޯޑެއް ލިބުމުން ސާބިތުކޮށްދެނީ ޕްރިޔާންކާ ކުރާ މަސައްކަތް ބަލައިގެފައިވާ ކަންކަމަށެވެ.

ޕްރިޔާންކާ އަށް މަދާ ޓެރީސާ މެމޯރިއަލް އެވޯޑް ފޯ ސޯޝަލް ޖަސްޓިަސް ލިބުނުއިރު އޭނާ ހުރީ މިވަގުތު އެމެރިކާގައެވެ. އަދި ޕްރިޔާންކާ ވަަރަށް އަވަހަށް މުމްބާއީ އަށް އަންނާނެ ކަމަށް މީޑިއާ ރިޕޯޓްތައް ބުނެއެވެ. އަދި މިވަގުތު ޕްރިޔާންކާ ބޮލީވޫޑްގެ ފިލްމްތަކުގައި މަސައްކަތް ކުރުމުގެ ބަދަލުގައި މިހާރު މަސައްކަތް ކުރަމުންދަނީ ހޮލީވުޑްގެ ފިލްމްތަކާ ސީރީޒްތަކުގައެވެ.