ތަގްސް އޮފް ހިންދުސްތާނުގެ ޝޫޓިންއަށް އާމިރާއި ޓީމް ތައިލެންޑަށް

ތަގްސް އޮފް ހިންދުސްތާނުގެ ޝޫޓިންތައް ނެގުމަށް އާމިރާއި ޓީމް ތައިލެންޑަށް ފުރައިފިއެވެ. މިޓީމުގައި ހިމެނެނީ އާމިރުގެ އިތުރުން ފާތިމާ ސަނާ ޝައިޚް އަދި އަމީތާބް ބައްޗަންއެވެ.

މޯލްޓާއާއި މުމްބާއީގައި ނަގަންޖެހޭ މަންޒަރުތައް މިހާރު ވަނީ ނަގާފައެވެ. މި ފިލްމުގައި ކެޓްރީނާ ފެނިގެންދާއިރު އޭނާ ތައިލެންޑަށް ނުދާނެ ކަމަށާއި މޯލްޓާއާއި މުމްބާއީގައި އޭނާ ނަގަންޖެހޭ މަންޒަރުތައް ނަގާފައިވާ ކަމަށް ޚަބަރުތައް ބުނެއެވެ. ތައިލެންޑަށް މިޓީމާއިއެކު ކެޓްރީނާ ނުދާން ނިންމީ އޭނާއާއި ސަލްމާން ޚާން ލީޑް ރޯލުން ފެނިގެންދާ ފިލްމު ޓައިގާ ޒިންދާހޭ ޕްރޮމޯޓު ކުރުމުގެ މަސައްކަތުގައި މާ އަވަދިނެތި އުޅޭތީކަމަށް ވެސް ޚަބަރުތައް ވަނީ ބުނެފައެވެ. އެހެން ނަމަވެސް ޓައިގާ ޒިންދާހޭ ރިލީޒް ވުމާއިއެކު ކެޓްރީނާ ތައިލެންޑަށް ގޮސް ޝޫޓިންގައި ބައިވެރިވާނެއެވެ. ޓައިގާ ޒިންދާހޭ ސިނަމާތަކަށް އަންނާނީ މިމަހުގެ 22 ވަނަ ދުވަހުގައެވެ.

ތަގްސް އޮފް ހިންދުސްތާން ގައި ތަފާތުގޮތަކަށް ހުންނަ ފޮޓޯތަކެއް މީގެ ކުރިން ވަނީ ވައިރަލް ވެފައެވެ. އެ ފޮޓޯތަކުން ފެންނަ ގޮތުގައި އާމިރު ޚާންގެ ތުބުޅި ވަނީ އެއްކޮށް ދިގުކޮށްލާފައެވެ. އަދި އޭނާގެ އިސްތަށިގަނޑުވެސް ވަނީ ދިގުވެފައެވެ. މިފޮޓޯ އާންމު ވުމާއިއެކު އާމިރުޚާން މި ފިލްމުން ފެނިގެންދާނީ ކަނޑުފޭރޭ މީހެއްގެ ގޮތުގައި ކަމަށް އަޑުތައް ވަނީ ފެތުރިފައެވެ.

މި ފޮޓޯއާއި ގުޅިގެން އާމިރުޚާން ބުނެފައިވަނީ މީހުން އަމިއްލައަށް ހަދަހަދައިގެން ފުލޯކު ވާހަކަ ދައްކަނީ ކަމަށާއި އެއީ ހަގީގަތެއް ނެތް ވާހަކަ ކަމަށެވެ. ތަގްސް އޮފް ހިންދުސްތާން ސިނަމާތަކަށް އަންނާނީ އަންނަ އަހަރުގެ ނޮވެމްބަރު މަހުގެ 7 ވަނަ ދުވަހުގައެވެ.