ދިވެހިރާއްޖެއަށް ގަހާއި ގަހުގެ ބައިތައް އެތެރެކުރެވޭނީ ފިޝަރީޒް މިނިސްޓްރީގެ ޚާއްސަ ހުއްދައެއް ނަގައިގެން ކަމަށް އެ މިނިސްޓްރީން ބުނެފިއެވެ.
ފިޝަރީޒް މިނިސްޓްރީން އާންމު ކޮށްފައިވާ އިއުލާނެއްގައި ބުނެފައި ވަނީ ރާއްޖެއަށް ގަހާއި ގަހުގެ ބައިތައް އެތެރެކުރާއިރު މިނިސްޓްރީން ނަގަންޖެހޭ ހުއްދަ ނެގަންޖެހޭނެ ކަމަށާއި ހުއްދަ ނުނަގައި އެތެރެކުރާ ގަހާއި ގަހުގެ ބައިތައް ނައްތާލާނެ ކަމަށެވެ. ހުއްދައިގައި ބަޔާންކޮށްފައިވާ ލިޔެކިޔުންތަކާ އެކު، ވެލާނާ އިންޓަނޭޝަނަލް އެއާޕޯޓުގައި ހުންނަ ޕްލާންޓް އެންޑް އެނިމަލް ކަރަންޓީނު ޔުނިޓަށް އިލްތިމާސް ކުރާ ކަމަށް އިއުލާނުގައި ވެއެވެ. ކަރަންޓީން އޮފިސަރަށް ގުޅުމަށް ހޮޓްލައިން ނަންބަރުތަކެއް ވަނީ ގާއިމުކޮށްފައެވެ. އެ ގޮތުން 7503161 ނުވަތަ 3303742 އިން ގުޅޭނެ ކަމަށް އެ އިއުލާނުގައި ވަނީ ބުނެފައެވެ.
ގަހާއި ގަހުގެ ބާވަތްތައް އެތެރެ ކުރެވޭނީ ހަމަ އެކަނި ވެލާނާ އިންޓަނޭޝަނަލް އެއާޕޯޓުންނާއި މާލޭ ކޮމާޝަލް ހާބަރުން އެކަންޏެވެ. އަދި މިގޮތަށް އެތެރެކުރާ ތަކެތީގައި އެއްވެސް ވަރަކަށް ވެލި ނުވަތަ ކާދު ހުރެގެން ނުވާނެ ކަމަށް ފިޝަރީޒް މިނިސްޓްރީގެ އިއުލާނުގައި ވަނީ ބުނެފައެވެ.
ފިޝަރީޒް މިނިސްޓްރީން މިކަން ހަނދާންކޮށްދީފައި މި ވަނީ ސްކޫލް ބަންދާ ދިމާކޮށް ގިނަ ބަޔަކު ރާއްޖެ އިން ބޭރަށް ދަތުރުކޮށް އެނބުރި އަންނަ އިރު މިފަދަ ތަކެތި އެތެރެކުރަމުން ގެންދާތީއެވެ.
