މެންޗެސްޓާ ޔުނައިޓެޑަށް ކުޅެމުން އަންނަ އިނގިރޭސި ފޯވާޑް އެންތޮނީ މާޝިއާލް ހޯދުމަށް ރެއާލް މެޑްރިޑުން 80 މިލިއަން ޕައުންޑު ހުށަހަޅައިފި ކަމަށް ރިޕޯޓްތައް ބުނެފިއެވެ.

"ދަ މިރާ" އިން ބުނީ ކުރިޔަށް އޮތް ސީޒަނަށް އަމާޒުކޮށް މާޝިއާލް ހޯދުމަށް ރެއާލް އިން ބޭނުންވާ ކަމަށާއި، އެގޮތުން އެ ކްލަބުން އޭނާ ހޯދުމަށް 80 މިލިއަން ޕައުންޑު ހުށަހަޅަން ތައްޔާރުވަމުން އަންނަ ކަމަށެވެ.

ރެއާލް އަށް ލަނޑު ޖެހުމުގެ މައްސަލަ ދިމާވަމުން އަންނައިރު، އެޓީމުން ކަރިމް ބެންޒެމާ ވިއްކާލުމަށް ފަހު އާ ފޯވާޑެއް ގެނައުމަށް މަސައްކަތް ކުރަމުން އަންނަ ކަމަށް ރިޕޯޓްތައް ބުނެއެވެ. ރިޕޯޓްތައް ބުނާގޮތުން ރެއާލް އިން އަންނަނީ ޗެލްސީގެ އެޑެން ހަޒާޑް ވެސް ހޯދުމަށް މަސައްކަތް ކުރަމުންނެވެ.

މި ސީޒަނުގައި ޔުނައިޓެޑްގެ ފުރަތަމަ އެގާރައިން ޖާގަ ހޯދުމަށް މާޝިއާލްއަށް ވަނީ ދަތިވެފައެވެ. މި ސީޒަނުގައި މިހާތަނަށް މާޝިއާލް 19 މެޗު ކުޅެފައިވާއިރު، އޭގެ ތެރެއިން އޭނާ ފުރަތަމަ އެގާރައިގައި ހިމެނިގެން ކުޅެފައިވަނީ އެންމެ ފަސް މެޗުގައެވެ. އޭނާ ވަނީ މި ސީޒަނުގައި 19 މެޗުގައި ހަތް ލަނޑު ޖަހާފައެވެ.

ފްރާންސްގެ ލިޔޯން އިން 2012 ވަނަ އަހަރު ކެރިޔަރު ފެށި މާޝިއާލް އެޓީމުގައި ސީޒަނެއް ހޭދަކުރުމަށް ފަހު ދެން ބަދަލުވީ މޮނާކޯއަށެވެ. އޭނާ ވަނީ އެ ޓީމުގައި ހޭދަކުރި ތިން ސީޒަނުގައި ކުޅުނު 70 މެޗުގައި 15 ލަނޑު ކާމިޔާބުކޮށްފައެވެ.

މޮނާކޯ ދޫކޮށްލުމަށް ފަހު، މާޝިއާލް ޔުނައިޓެޑަށް ބަދަލުވީ 2015 ވަނަ އަހަރެވެ. އޭނާ ވަނީ މިހާތަނަށް އެޓީމަށް ކުޅުނު 110 މެޗުގައި 32 ލަނޑު ކާމިޔާބު ކޮށްފައެވެ. އޭނާ ވަނީ ޔުނައިޓެޑާއެކު އެފްއޭކަޕް، ލީގް ކަޕް، ޔުއެފާ ޔޫރޮޕާ ލީގް އަދި އެފްއޭ ކޮމިއުނިޓީ ޝިލްޑް ކާމިޔާބު ކޮށްފައެވެ.