ބާސާގެއާ އެއްބަސްވުމުގައި މެސީ ސޮއިކޮށްފި: ލަލީގާ ރައީސް
15 ނޮވެމްބަރު 2017 | ބުދަ 13:19މެސީ ވަނީ 2021 ވަނަ އަހަރުގެ ނިޔަލަށް ބާސާގެ އެއްބަސްވުން އާކޮށްފައި
ބާސާ އަށް ކުޅެމުން އަންނަ ލިއޮނެލް މެސީ
އާޖެންޓީނާގެ ކެޕްޓަން ލިއޮނެލް މެސީ، ބާސެލޯނާގެ އާ އެއްބަސްވުމުގައި ސޮއިކޮށްފައިވާ ކަމަށް ލަލީގާގެ ރައީސް ހާވިއާ ޓީބަސް ވިދާޅުވެއްޖެއެވެ.
އަންގާރަ ދުވަހު ނޫސްވެރިންނަށް މައުލޫމާތު ދެމުން ޓީބަސް ވިދާޅުވީ، އެއްބަސްވުމެއްގައި ސޮއިކުރުމުން އެކަން ރަސްމީވީ ކަމަށާއި، އެކަން ރަސްމީ ވަނީ ހާމަކުރުމުން ނޫން ކަމަށެވެ.
އެގޮތުން ޓީބަސް ވިދާޅުވީ، އޭނާ މެސީގެ އެއްބަސްވުމާ ގުޅޭގޮތުން ދޮގު ނަހަދާ ކަމަށާއި، މެސީ އެއްބަސްވުން އާކޮށްފައިވާކަން ކަށަވަރު ކޮށްދޭކަމަށެވެ.
މެސީގެ އެއްބަސްވުމާ ގުޅޭގޮތުން ބާސާގެ ރައީސް ޖޯސެފް ބާޓެމިއު މިދިޔަ ސެޕްޓެމްބަރު މަހު ވިދާޅުވީ، 2021 ވަނަ އަހަރު ނިޔަލަށް ބާސާގައި މަޑުކުރަން މެސީ އެއްބަސްވެފައިވާ ކަމަށާއި، އެ އެއްބަސްވުމުގައި ސޮއިކުރީ މެސީގެ ބައްޕަ ޖޯޖް ހޮރަސިއޯ މެސީކަމަށެވެ.
ދާދި ފަހުން މެސީ ދިން އިންޓަވިއުއެއްގައި އޭނާ ބުނީ ކެރިޔަރު ނިންމާލަން ބޭނުންވަނީ ބާސާގައި ކަމަށާއި، އެއީ އަބަދުވެސް އޭނާ ދެކެމުން އަންނަ ހުވަފެނެއް ކަމަށެވެ.
އެހެން ނަމަވެސް މެސީ އާއި ބާސާއާ ދެމެދު މައްސަލަތަކެއް އުފެދިފައިވާ ކަމަށް ރިޕޯޓްތައް ބުނެއެވެ. މިކަމާ ގުޅިގެން މެސީ އެއްޗެއް ބުނެފައިނުވާއިރު، ބާސާ އިން މިކަން ދޮގުކުރެއެވެ.
ލަލީގާގެ އޯލްޓައިމް ޓޮޕް ސްކޯރާގެ މަގާމު ހޯދާފައިވާ މެސީ ވަނީ ބާސާއާއެކު ސްޕެނިޝް ލީގު 8 ފަހަރު، ސްޕެނިޝް ކަޕް ފަސް ފަހަރު އަދި ޔުއެފާ ޗެމްޕިއަންސް ލީގު ހަތަރު ފަހަރު ކާމިޔާބު ކޮށްފައެވެ.
