ސަންޖޭ ލީލާ ބަންސާލީގެ "ޕަދްމަވަތީ" އެޅުވުން މަނާކޮށްދިނުމަށް އެދި އިންޑިއާގެ ރާޖްޕޫތު ގްރޫޕްތަކުން ހުށަހެޅި މައްސަލައިގައި ގޮތް ނިންމާނީ ސެންސަރު ބޯޑުން ކަމަށް އެގައުމުގެ ސުޕްރީމް ކޯޓުން ބުނެފިއެވެ.
ހޮނިހިރު ދުވަހު އިންޑިއާގެ ސުޕްރީމް ކޯޓުން ނިންމާފައިވާ ނިންމުމުގައި ބުނެފައިވަނީ އެކޯޓަށް ހުށަހެޅި މައްސަލައިގައި ގޮތެއް ނިންމާނީ ފިލްމު ސެންސަރު ބޯޑުން ކަމަށެވެ.
ރާޖްޕޫތު ގްރޫޕްތަކުން ހުށަހެޅި މައްސަލައިގައި ބުނެފައިވަނީ ދީޕިކާ ޕަދުކޯން އަދި ރަންވީރު ސިންހްގެ ސެންސަރު ކުރަންޖެހޭ މަންޒަރުތައް މިފިލްމުގައި ހިމަނާފައިވާ ކަމަށެވެ. އެހެން ނަމަވެސް މި ފިލްމުގެ ޑައިރެކްޓަރ ސަންޖޭ ލީލާ ބަންސާލީ ބުނެފައިވަނީ މި ފިލްމުގައި އޭގެ މަންޒަރުތަކެއް ނުހިމެނޭނެ ކަމަށާއި ފިލްމު ބެލުމުން އެކަން އެނގިގެން ދާނެ ކަމަށެވެ. ރާޖްޕޫތު ގްރޫޕްތަކަށް ބަންސާލީ ވަނީ ފިލްމު ބެލުމަށް ދައުވަތުވެސް ދީފައެވެ. އެހެން ނަމަވެސް ރާޖްޕޫތު ގްރޫޕްތަކުން އެ ދައުވަތު ގަބޫލު ކޮށްފައެއް ނުވެއެވެ.
"ޕާދްމަވަތީ" ސިނަމާތަކަށް އަންނާނީ އަންނަ ޑިސެމްބަރު މަހުގެ 1 ގައެވެ. އެހެން ނަމަވެސް ސްޕްރީމް ކޯޓުން މި ނިންމި ނިންމުމާއި ގުޅިގެން ރާޖްޕޫތު ގްރޫޕްތަކުން ސެންސަރުބޯޑަށް މައްސަލަ ހުށަހަޅައި އެމައްސަލަ ސެންސަރު ބޯޑުން ބަލަން ފަށައިފިނަމަ ކަނޑައެޅިފައިވާ ދުވަހަށް ފިލްމު ސިނަމާތަކަށް އައުން ލަސްވެދާނެކަމަށް ވަނީ ބެލެވިފައެވެ.
އެހެން ނަމަވެސް މީގެ ކުރިން އިންޑިއާގެ ހޯމް މިނިސްޓަރ އޮފް ސްޓޭޓުން ވަނީ އެ ތާރީޚަށް ފިލްމު އެޅުވޭނެ ކަމުގެ ފުރިހަމަ ޔަގީންކަން ބަންސާލީގެ ޓީމަށް ދީފައެވެ.
"ޕާދްމަވަތީ" ޝޫޓް ކުރަމުންދިޔައިރުވެސް އެތަކެއް ދަތި ހުރަސްތަކާއި ކުރިމަތިލާން ޖެހުނެވެ. މި ފިލްމުގެ ޝޫޓިންގައި ފިލްމްގެ ކުރޫއާއެކު ޖެއިޕޫރުގައި ހަރަކާތްތެރިވަމުން ދަނިކޮށް ޖެއިޕޫރަށް ނިސްބަތްވާ ޕާޓީ "ކާނި ސެނާގެ" ބައެއް ސަޕޯޓަރުންނާއި މެމްބަރުން ފިލްމުގެ ސެޓް ހަދާފައި ހުރި ޖައިގާ ފޯޓަށް ގޮސް ހަޑި ހުތުރު ބަހުން މުއާމަލާތްކޮށް ހަމަނުޖެހުން ހިންގާފައިވެއެވެ.
އަފި ފިލްމް ޝޫޓިންގައި ބޭނުން ކުރަމުންދިޔަ ކެމެރާތަކާއި އެހެނިހެން އަގުބޮޑަތި ސާމާނުތައް ހަލާކުކޮށްލާފައިވެއެވެ. އެ ގޮންޖެހުންތަކާއެކު ބަންސާލީ "ޕަދްމަވަތީ" ގެ ޝޫޓިން ނިންމާލާފައި ވަނީ އޮގަސްޓުމަހުގެ ތެރޭގައެވެ.
