50 ވަނަ ޖުމްހޫރީ ދުވަސް ބައްދަލުކުރާއިރު އޮންނާނީ އުއްމީދުގެ ދޮރާށި ހުޅުވިފައި:ޝާހިދު
މިއޮތީ ފުރިހަމަ ޑިކްޓޭޓަރޝިޕެއް
ޝާހިދު ރާއްޖެ ޓީވީގެ ފަލަ ސުރުޚީ ޕްރޮގްރާމްގައި
ރާއްޖޭގައި މިހާރު މިއޮތީ ޖުމްހޫރީ ވެރިކަމެއް ނޫން ކަމަށާއި 50 ވަނަ ޖުމްހޫރީ ދުވަސް ފާހަގަ ކުރާނީ އަނެއްކާވެސް ހަގީގީ ޖުމްހޫރީ ވެރިކަމަކާ އެކުގައި ކަމަށް ރައްޔިތުންގެ މަޖިލީހުގެ ހެންވޭރު އުތުރު ދާއިރާގެ މެންބަރު އަދި ރައްޔިތުންގެ މަޖިލީހުގެ ކުރީގެ ރައީސް ޢަބްދުﷲ ޝާހިދު ވިދާޅުވެއްޖެއެވެ.
ރާއްޖެ ޓީވީގެ ފަލަ ސުރުޚީ ޕްރޮގްރާމްގައި ހޮނިހިރު ދުވަހުގެ ރޭ ވާހަކަ ދައްކަވަމުން ޝާހިދު ވިދާޅުވީ މިއަދު ދިވެހިން އަޅުވެތި ކޮށްފައިވީ ނަމަވެސް، އަންނަ އަހަރު 50 ވަނަ ޖުމްހޫރީ ދުވަސް ފާހަގަކުރާނީ ރާއްޖޭގެ ފުރިހަމަ ޖުމްހޫރީ ވެރިކަމާ އެކުގައި ކަމަށެވެ.
މީގެ ކުރިން ވެސް ޝާހިދު ވިދާޅުވެފައިވާ ފަދައިން ހޮނިހިރު ދުވަހުގެ ފަލަސުރުޚީ ޕްރޮގްރާމްގައި ވެސް ވިދާޅުވީ ރައީސް ޔާމީނަށް ވެރިކަން ލިބިވަޑައިގެންފި ނަމަ ވެރިކަން "ރަސްކަމަކަށް" ބަދަލުވެގެން ދާނެ ކަމަށާއި އެކަން މިހާރު ފެންނަ ކަމަށެވެ. ނަމަވެސް ގުޅިފައިވާ ޕާޓީތަކުން ކުރާ މަސައްކަތުން އެކަން ނިމުމަކަށް ގެނެސް 50 ވަނަ ޖުމްހޫރީ ދުވަސް ދިވެހިންނާ ބައްދަލުކުރާއިރު އޮންނާނީ އުއްމީދުގެ ދޮރާށި ހުޅުވިފައި ކަމަށް އޭނާ ވިދާޅުވި އެވެ.
"އަޅުގަނޑުމެންނަށް ވަރަށް ރީތި ބަގީޗާއެއް، ޖުމްހޫރީ ރީތި ބަގީޗާއެއް ފެންނަން އޮންނާނެ. އިރާދަކުރެއްވިއްޔާ އެބަގީޗާއަށް ރައީސް ނަޝީދުގެ ފަހަތްޕުޅުގައި ދިއުމުގެ ތައުފީގް މާތްﷲ މިންވަރު ކުރައްވާނެ" ޝާހިދު ވިދާޅުވިއެވެ.
ޝާހިދު ވިދާޅުވީ ޤާނޫނު އަސާސީގެ ދެ ވަނަ މާއްދާގައި ބުނަނީ ރާއްޖެއަކީ ޖުމްހޫރީ ވެރިކަމެއް ހިނގާ ޔުނިޓަރީ ދައުލަތެއް ކަމަށެވެ. އަދި 4 ވަނަ މާއްދާގައި، ރާއްޖޭގެ ވެރިކަން ހިނގަންވީ ގޮތް ވަރަށް ސާފުކޮށް ބުނާ ކަމަށާއި އެގޮތަކީ ވެރިކަން ހިންގަން ޖެހޭ ގޮތް ބުނާ ކަމަށެވެ. އެމާއްދާގައި ބުނެފައިވާ ގޮތުގައި ވެރިކަމުގެ އެންމެހާ ބާރުތައް ފެށިގެން އަންނަނީ ރައްޔިތުންގެ ކިބައިން ކަމަށާއި އެބާރުތައް ދެމިއޮންނާނީ ވެސް އެރައްޔިތުންގެ ކިބައިން ކަމަށެވެ.
ރާއްޖޭގެ ޤާނޫނު އަސާސީގައި ބުނާ ގޮތުން ދައުލަތް ހިންގާ ގޮތަށް ފާރަވެރިވެ އެކަން ބަލަހައްޓަންޖެހޭ ތަނަކީ ރައްޔިތުންގެ މަޖިލިސް ކަމަށާއި އެމަޖިލީހުގެ އެބާރު މިހާރު ވަނީ ކަނޑުވާލާފައި ކަމަށް ޝާހިދު ވިދާޅުވި އެވެ. އަދި މިއަހަރުގެ ޖުމްހޫރީ ދުވަސް އައިއރު ޖުމްހޫރީ ވެރިކަމެކޭ މިކިޔާ ވެރިކަމެއް ނެތް ކަމަށް އޭނާ ވިދާޅުވި އެވެ.
"ނޮވެމްބަރ 11، 2017 އައިއިރު ރާއްޖޭގެ ޖުމްހޫރީ ވެރިކަމެކޭ މިކިޔާ ވެރިކަމެއް ނެތް. ނަން ބޯޑެއް އަޅުވާފައި ހުރީ. ނަންބޯޑުގައި ޖުމްހޫރީއޭ ލިޔެފަ އޮންނަ އޮތުން އެއީ ބޮޑު ހަޖުލެއް. އޭގެ އެންމެ ފުރިހަމަ އިބާރާތަކަށް ވާނީ މިހާރު ރާއްޖޭގައި މިއޮތީ ފުރިހަމަ ޑިކްޓޭޓަރޝިޕެކޭ،" ޝާހިދު ވިދާޅުވިއެވެ.
މިހާރު މިއޮތް ޤާނޫނުއަސާސީ އެކަށައެޅި ރައްޔިތުންގެ ހާއްސަ މަޖިލީހުގައި ވެސް އިންނެވި އަބްދުﷲ ޝާހިދު ވިދާޅުވީ މިހެން ވާން ޖެހުނީ ރާއްޖޭގެ ގާނޫން އަސާސީ އޮތް ގޮތުން ނޫން ކަމަށާއި ދުނިޔޭގެ ބައެއް ތަންނަނުގައިވެސް ލިޔެވިފައި އޮތް ގާނޫނުއަސާސީއެއް ނެތް ކަމަށެވެ.
ޝާހިދު ވިދާޅުވީ މިހާލަތައް ގައުމު ވެއްޓުނީ ވެރިކަން ހިންގަން ތިބި ފަރާތްތަކުން ރާއްޖޭގެ ރައްޔިތުންނާމެދު ކުޑަނަމަވެސް އޯގާތެރިކަމެއް ނެތުމުން ކަމަށެވެ.
"ހަގީގަތުގައި ވެރިކަމުގައި މިއޮތް ހުދުމުޚްތާރު ސަރުކާރުގެ ނިޔަތާ، މަގުސަދާ، ކަންކުރަން ބޭނުންވާ ގޮތް ވިޔާނުދާކަމުން. ހިތް ނުބައިކަމުން. ރާއްޖޭގެ ރައްޔިތުންނާމެދު އެއްވެސް އޯގާތެރިކަމެއް ތެދުވެރިކަމެއް ނެތީމަ ހިނގަމުންދާ ކަމެއް މިއީ،" ޝާހިދު ވިދާޅުވިއެވެ.
