ޓެކްސަސް ގައި ދިން ބަޑީގެ ހަމަލާއެއްގައި 27 މީހުން މަރާލައިފި

އެމެރިކާގެ ޓެކްސަސްގެ ފައްޅިއަކަށް ދިން ބަޑީގެ ހަމަލާއެއްގައި 27 މީހުން މަރާލައިފިއެވެ.

ފުލުހުންގެ އޮފިޝަލުންނާއި ހަވާލާދީ ބީބީސީގައި ބުނެފައިވަނީ މަރުވި މީހުންގެ އިތުރުން މަދުވެގެން 25 މީހުން މި ހަމަލާގައި ޒަޚަމްވެފައިވާކަމަށެވެ. މަރުވި މީހުންގެ ތެރޭގައި ކުޑަކުދިންވެސް ހިމެނެއެވެ. ހަމަލާ ދިން މީހާ ފިލަން މަސައްކަތްކުރަނިކޮށް މަރާލާފައިވާއިރު، އޭނާ މަރާލީ ސީދާ ފުލުހުންކަމެއް ނުވަތަ އަމިއްލައަށް މަރުވީކަމެއް އަދި ކަށަވަރެއް ނުވެއެވެ.

ޓެކްސަސްގެ ކުޑަ އަވަށެއްކަމަށްވާ ސަދަރލޭންޑްގައި ދިން މި ހަމަލާގެ ފަހަތުގައިވަނީ ކޮންކަމެއްކަން އަދި ވަނީ ސާފުވާގޮތް ނުވެފައެވެ.

މި ހަމަލާއާއި ގުޅިގެން އޭޝިޔާއަށް މިހާރު ފައްޓަވާފައިވާ ދަތުރުފުޅެއްގައި އުޅުއްވާ އެމެރިކާގެ ރައީސް ޑޮނަލްޑް ޓްރަމްޕް ޖަޕާނުގައި ހުންނަވައި، ކުރައްވާފައިވާ ޓްވީޓެއްގައި މި ހަމަލާ ކުއްވެރިކުރައްވައި ވިދާޅުވީ، ހަމަލާގައި މަރުވި، އަދި ޒަޚަމްވި މީހުންގެ އާއިލާތަކަށް ތައުޒިޔާ ފޮނުއްވާކަމަށެެވެ. އަދި އެފްބީއައިއިން އެ ސަރަހައްދުގައި ހަރަކާތްެރިވަމުންދާއިރު، ވަރަށްގާތުން މި ހަމަލާގެ މައުލޫމާތު ހޯއްދަވަމުންދާކަމަށް ޓްރަމްޕް ވިދާޅުވިއެވެ.