ޢަރަބް ސްޕްރިންގްގެ ފައިދާ ނަގަން އުސާމާ ބިން ލާދިން މަސައްކަތްކުރި

2010ވަނަ އަހަރުގެ ތެރޭގައި ފެށިގެން އައި ޢަރަބި ޤައުމުތަކުގައި ވެރިކަމާއި ދެކޮޅަށް އުފެދިގެން އައި ހަމަނުޖެހުންތަކުގެ ފައިދާނަގަން އަލްޤައިދާގެ ކުރީގެ ލީޑަރު އުސާމާ ބިން ލާދިން މަސައްކަތްކުރިކަން ހާމަވެއްޖެއެވެ.

އެމެރިކާގެ ކަނޑުގެ ސިފައިންގެ ޚާއްސަ ލަޝްކަރުން 2011ވަނަ އަހަރު އުސާމާ ބިން ލާދިން މަރާލުމަށްފަހު އެމެރިކާގެ ޖާސޫސީ އިދާރާއިން އެއްކޮށްފައިވާ ބިންލާދިންގެ ބައެއް ލިޔުންތައް އާއްމުކުރި އިރު ބިންލާދިން ގެންގުޅުނު ޖާނަލްއެއްވަނީ މިހާރު އާއްމުކޮށްފައެވެ. އުސާމާގެ އަންހެން ދަރިފުޅުގެ އަތުލިޔުމުން ލިޔެފައިވާ މި ޖާނަލްއިން ބިންލާދިންގެ އޭރުގެ ވިސްނުންތައް ހުރި ގޮތާއި ބައެއް ޕްލޭންތައް ހާމަވެފައިވެއެވެ. އެގޮތުން އޭރު ޢަރަބި ދުނިޔޭގައި ހިނގަމުންދިޔަ ހަމަނުޖެހުންތަކަށް ބިންލާދިންގެ ޝައުޤުވެރިކަން އާމަޒުވިކަން މި ލިޔެކިޔުންތަކުން ހާމަވެއެވެ. އެގޮތުން އަރަބް ސްޕްރިންގެ ނަމުން ނަންދެވިފައިވާ މިއިންޤިލާބުތަކުގެ ބޭނުން އަލްޤައިދާއިން ހިފާނެ ގޮތާއި، އެކަމުގައި އަލްޤައިދާގެ ބަސް ބުނާނެ ވަގުތުތަކާއި މެދު ބިން ލާދިން ޚިޔާލު ފާޅުކޮށްފައިވެއެވެ.

އެގޮތުން އާއިލާ މީހެއްގެ ކައިރީގައި "އަރަބި ދުނިޔޭގައި ވެރިޔަކު ނެތި ބައެއް ހިސާބުތަކުގައި އެދާ ވަގުތުކޮޅަކީ އަލްޤައިދާގެ ވިސްނުމާއި ފިކުރު އެޤައުމުތަކުގައި ފެތުރުމަށް އެންމެ ރަނގަޅު ވަގުތު"ކަމަށް ބުނެފައިވާކަން ހާމަވެފައިވެއެވެ. އަދި އަރަބި ދުނިޔޭގައި ހިނގަމުންދާ ހަމަނުޖެހުންތަކުގެ އަސްލަކީ އޭގެ 7 އަހަރު ކުރިން، އަރަބި ވެރިންނަކީ މަޤާމަށް ކުފޫހަމަނުވާ ބައެއްކަމަށް ބިން ލާދިން ބުނެފައިވާތީ އެކަމުގެ ނަތީޖާކަމަށް ބިންލާދިންގެ އެއް އަނބި، އުއްމު ހަމްޒާ ބުނެފައިވެއެވެ.

ބިން ލާދިން ވަނީ އޭރު އަރަބި ދުނިޔޭގައި އިންޤިލާބުތަކާއި ހަރަކާތްތައް ކުރިއަށްދާ ސްޕީޑް އަވަސްވުމުން އެކަމަށް ފާޑު ކިޔާފައެވެ. އަދި އެހާ އަވަސް ސްޕީޑެއް ކުރިއަށް ދިޔުމަކީ ރަނގަޅު ގޮތެއް ނޫންކަމަށްބުނެ، ހަރަކާތްތައް ލަސްކުރުމަށް އެންގިކަމަށް ބުނެފައިއެވެ. އެހެން ނަމަވެސް ބިން ލާދިން އިޝާރާތްކުރީ ސީދާ ކޮން ޤައުމަކަށްކަމެއް ނޭނގެއެވެ.

ބިން ލާދިންގެ ވާހަކަތަކުގައި ޔަމަނަށް ޚާއްސަ ސަމާލުކަމެއް ދީފައިވާކަން ފާހަގަކުރެވެއެވެ.

މި ޖާނަލްގައި ބިން ލާދިން އޭނަގެ އަންހެނުންގެ އިތުރުން އަންހެން ދަރިންކަމަށްވާ މަރިޔަމް އަދި ސުމައްޔާ އާއި ފިރިހެން ދަރިންކަމަށްވާ ޚާލިދު އާއި ހަމްޒާ އާއި އެކު ދެކެވިފައިވާ ވަރަށް ގިނަ ވާހަތަކުގެ ތަފްޞީލް ހާމަވެފައިވެއެވެ.

އުސާމާ ބިން ލާދިން، އަރަބި ދުނިޔޭގެ ހަމަނުޖެހުންތަކުގެ ފައިދާ ނަގަން މަސައްކަތްކުރި ދުވަސްވަރަކީ މިސްރާއި ތޫނިސްގެ ވެރިކަން ބަދަލުކޮށްލި ދުވަސްވަރެވެ. އަދި ލީބިޔާ، ޔަމަން، ބަހުރައިން އަދި ސޫރިޔާގައިވެސް އޭރު އޮތީ ހަމަނުޖެހުންތައް ފެށިފައެވެ. ލީބިޔާގެ ޒައީމް ކާނަލް މުއައްމަރުލް ޣައްޒާފީގެ ވެރިކަން އޭގެ ފަހުން ވެއްޓުނުއިރު، ޔަމަނުގައި އަލްޤައިދާގެ ބާރު ގަދަވިއެވެ. އަދި ބަހްރައިންގައި ބައިގިނަ ޝީޢީންނާއި ދެކޮޅަށް ވެރިކަމުގައި އޮތް ސުންނީ ޚާންދާނުން ބާރުވެރިކަން އިސްކުރިއެވެ.

ބިން ލާދިންވަނީ ޤަތަރުގެ އަލްޖަޒީރާ ޓީވީއަށްވެސް ފާޑުކިޔާފައެވެ. އެގޮތުން ޔަމަނުގައި ހިނގަމުންދިޔަ ކުރިމަތިލުންތަކުގެ މަންޒަރުތައް ދެއްކުމުގެ ކުރިން ކުޑަކުދިންވެސް ޓީވީ ބަލަން ތިބެދާނެކަމަށް ވިސްނައި، އެކަމަށް އިންޒާރެއް ދީފައިނުވާކަމަށް ބުނެ ފާޑުކިޔާފައިވެއެވެ. އެހެން ނަމަވެސް ވެރިކަންތައް ވައްޓާލުމަށް މަސައްކަތްކޮށްދޭކަމަށްބުނެ އަލްޖަޒީރާއަށް ތައުރީފްވެސްކޮށްފައިވެއެވެ.