ނިއުރޭޑިއަންޓް ސްޕޯޓްސް ކްލަބްގެ ކޯޗު އޮސްކާ ބުރޯޒް އިތުރު އަހަރަކަށް އެ ކްލަބުގައި މަޑުކުރަން ނިންމާ އެއްބަސްވުމުގައި ސޮއިކޮށްފިއެވެ.
ބުދަ ދުވަހު ބޭއްވި ރަސްމިއްޔާތެއްގައި ނިއުގެ ކޯޗު އެއްބަސްވުން އާކޮށްފައިވާއިރު، އޭނާގެ އިތުރުން އެ ކްލަބުގެ ސްޕެއިން މިޑްފިލްޑަރު ކަންޑޭލާވެސް ވަނީ އަންނަ އަހަރުގެ ނިޔަލަށް ކްލަބުގައި މަޑުކުރަން ނިންމާ އެއްބަސްވުން އާކޮށްފައެވެ.
އުރީދޫ ދިވެހި ޕްރިމިއާ ލީގުގައި ނިއު ރަނގަޅު ނަތީޖާތަކެއް ހޯދަމުން އަންނައިރު، ލީގުގެ ތަށި ހޯދުމާ ގާތަށް އެޓީމު ވަނީ ޖެހިލާފައެވެ. ލީގުގައި މިހާތަނަށް ނިއު ބަލިވީ އެންމެ މެޗަކުންނެވެ.
އޮސްކާ އަކީ މި ސީޒަނުގައި ނިއު އަށް ގެނައި ދެވަނަ ކޯޗެވެ. ފުރަތަމަ އެޓީމަށް ގެނައީ އެސްޓީއޯ މާލޭ ލީގަށް ޕޯޗުގަލްގެ ބެނާޑޯ ޓަވަރޭޒްއެވެ. އެހެންނަމަވެސް އެޓީމުން ހޯދަމުންދިޔަ ނަތީޖާގެ ސަބަބުން މާލޭ ލީގުގެ ފަހުކޮޅު ޓަވަރޭޒް ވަނީ މަގާމުން ދުރުކޮށް، އޮސްކާ ގެނެސްފައެވެ.
ޔުއެފާ ހެޑް ކޯޗިން ލައިސަންސް އޮންނަ އުމުރުން 40 އަހަރުގެ އޮސްކާ ވަނީ މި އަހަރުގެ މާޗް މަހު އިންޑިއާގެ މުމްބާއީ އެފްސީއާ ހަވާލުވެ އެޓީމަށް އިރުޝާދު ދީފައެވެ. އެހެންނަމަވެސް އޮސްކާ އަށް އެޓީމާއެކު އެކަށީގެންވާ ވަގުތު ނުލިބުމުގެ ސަބަބުން މާ އެދެވޭ ނަތީޖާތަކެއް ނެރެވިފައެއް ނުވެއެވެ. މުމްބާއީ އެފްސީއާ ހަވާލުވުމުގެ ކުރިން އޮސްކާ ކޯޗުކޮށްދިނީ ސްޕެއިންގެ މަޔޯކާގެ އެސިސްޓެންޓް ކޯޗުގެ މަގާމެވެ.
އޮސްކާގެ ކޯޗިން ކެރިޔަރު ފަށާފައިވަނީ 2009 ވަނަ އަހަރު ސްޕެއިންގެ ސެލްޓަވިގޯގެ ޔޫތް ޓީމުންނެވެ. އޭގެ ފަހުން 2011 އިން ފެށިގެން 2013 ވަނަ އަހަރުގެ ނިޔަލަށް އޭނާ މަސައްކަތްކޮށްފައިވަނީ އިންޑިއާގެ އެކަޑަމީއެއްކަމަށްވާ އެސްޕީޓީ ސްޕޯޓްސް އެޝިއާގެ ހެޑްކޯޗަކަށެވެ. އޭގެ ފަހުން އޭނާ ސީނިއާ ކޯޗިން ކެރިޔަރު ފެށީ އިންޑިއަން އައި ލީގުގެ ސްޕޯޓިން ކްލަބް ޑި ގޯއާއިންނެވެ. އެޓީމުގައި ދެ އަހަރު މަސައްކަތްކުރުމަށްފަހު، އޭނާ ބަދަލުވީ އިންޑިއަން ސުޕާ ލީގުގެ މުމްބާއީ ސިޓީ އެފްސީގެ އެސިސްޓެންޓް ކޯޗަކަށެވެ.
ނިއު މި ސީޒަނަށް ނިކުތީ ބޮޑު ހަރަދުތަކާއެކުގައެވެ. އެގޮތުން އެޓީމުގެ އަމާޒަކަށްވީ މި ސީޒަނުގައި ހުރިހާ ތަށްޓެއް ކާމިޔާބުކުރުމެވެ. އެހެންނަމަވެސް އެޓީމަށް މާލޭ ލީގެއް ނުލިބެއެވެ. މާލޭ ލީގު ހޯދީ މާޒިޔާއިންނެވެ.
