ސިންގަޕޫރުގައި މިހާރު ކުރިޔަށްދާ ޑަބްލިއުޓީއޭ ފައިނަލްސްގެ ސެމީގެ ޖާގައެއް ކެރޮލައިން ވޮޒްނިއާކީ ކަށަވަރު ކުރިއިރު ކެރޮލައިން ގާސިއާ ފުރަތަމަ މޮޅު ހޯދައިފިއެވެ.

ޑަބްލިއުޓީއޭ ޓެނިސް ރޭންކިންގެ ގަދަ އަށެއްގައި ހިމެނޭ ކުޅުންތެރިންގެ މެދުގައި ސިންގަޕޫރުގައި މިހާރު ކުރިޔަށްދާ ފައިނަލްސް މުބާރާތުގައި މިވަގުތު ދުނިޔޭގެ ރޭންކިންގެ ހަ ވަނައިގައި އޮތް ޑެންމާކުގެ ކެރޮލައިން ވޮޒްނިއާކީ ވަނީ ދުނިޔޭގެ އެއްވަނައިގައި ރޭންކް ކުރެވިފައި އޮތް ރޯމޭނިއާގެ ސައިމޯނާ ހޭލެޕް ސީދާ ދެ ސެޓުން ބަލިކޮށްފައެވެ. މި މެޗުގެ ސެޓުތައް ވޮޒްނިއާކީ ގެންގޮސްފައިވަނީ 6-0 އަދި 6-2 އަކުންނެވެ.

މި މެޗު ނިންމާލުމަށް ފަހު ވާހަކަ ދައްކަމުން ވޮޒްނިއާކީ ބުނެފައި ވަނީ ފުރަތަމަ މެޗުން މޮޅުވި ނަމަވެސް އޭނާ މި މެޗަށް ވެސް ނުކުތީ ކޮންމެ މެޗަކީ ވެސް އުންދަގޫ މެޗެއްކަން އެނގިހުރެ ކަމަށާއި ދުނިޔޭގެ އެއްވަނަ ކުޅުންތެރިޔާ ބަލިކުރެވުމަކީ ވަރަށް ބޮޑު ހިތްހަމަޖެހުމެއް ކަމަށެވެ. އަދި މެޗުގައި އެއްވެސް ކަމެއް ގޯސްކޮށް ހިނގާފައި ނުވާ ކަމަށާއި ހުރިހާ ކަމެއް ވެސް ދިޔައީ އޭނާ އުއްމީދު ކުރި ގޮތަށް ކަމަށް ވޮޒްނިއާކީ ބުނެފައި ވެއެވެ.

މި މުބާރާތުގެ ފުރަތަމަ މެޗުގައި ވޮޒްނިއާކީ އަތުން ބަލިވި ސްވިޓްލޯނާ ވަނީ ފްރާންސްގެ ކެރޮލައިން ގާސިއާ އަތުން ދެ ސެޓު އެއް ސެޓުން ބަލިވެފައެވެ. މި މެޗުގެ ފުރަތަމަ ސެޓު 7-6 އަކުން ގާސިއާ ގެންދިޔަ ނަމަވެސް ސްވިޓްލޯނާ ވަނީ 6-3 އަކުން ދެވަނަ ސެޓު ގެންގޮސްފައެވެ. މެޗުގެ ނަތީޖާ ނެރެން ކުޅުނު ތިންވަނަ ސެޓު ގާސިއާ ގެންދިޔައީ 7-5 އަކުންނެވެ.

މި މެޗުތަކުގެ ނަތީޖާ ނުކުމެފައިވާ ގޮތުން ސެމީގެ ދެވަނަ ޖާގަ ހޯދުމުގެ ފުރުސަތު ހޭލެޕްއާ ގާސިއާ އަދި ސްވިޓްލޯނާއަށް ވެސް އެބައޮތެވެ. ސެމީގައި ވޮޒްނިއާކީ ވާދަކުރަން ޖެހޭނީ ވީނަސް ވިލިއަމްސް ނުވަތަ ގާބައިން މުގުރްޒާއާ ދެކޮޅަށެވެ. މި މުބާރާތް ވޮޒްނިއާކީ ކާމިޔާބު ކޮށްފި ނަމަ އޭނާއަށް މި އަހަރު ދުނިޔޭގެ ރޭންކިންގެ އެއްވަނަ ލިބިގެންދާނެއެވެ. ވޮޒްނިއާކީ ވަނީ މީގެ ހަތް އަހަރު ކުރިން ޑަބްލިއުޓީއޭ ފައިނަލްސްގެ ރަނަރަޕްކަން ހޯދާފައެވެ.

މި މުބާރާތް ކުރިޔަށް ދަނީ އަށް ކުޅުންތެރިން ދެ ގްރޫޕަކަށް ބަހާލައިގެން ރައުންޑް ރޮބިން ފޯމެޓަށެވެ. އެގޮތުން ކޮންމެ ގްރޫޕެއްގައި ވެސް ހަތަރު ކުޅުންތެރިން ހިމެނޭއިރު ސެމީ ފައިނަލުން ޖާގަ ލިބޭނީ ކޮންމެ ގްރޫޕަކުން ވެސް އެންމެ ރަނގަޅު ނަތީޖާ ހޯދާ ދެ ކުޅުންތެރިންނަށެވެ. އެގޮތުން ފުރަތަމަ ގްރޫޕުން ސެމީގެ ޖާގައެއް މިހާތަނަށް ކަށަވަރު ކޮށްފައިވަނީ ޗެކް ރިޕަބްލިކްގެ ކެރޮލައިނާ ޕްލިސްކޯވާއެވެ.

މި މުބާރާތުގެ ފުރަތަމަ ގްރޫޕުގައި ހިމެނެނީ ރޯމޭނިއާގެ ސައިމޯނާ ހޭލެޕް އާއި ޔޫކްރެއިންގެ އެލީނާ ސްވިޓްލޯނާއާ ޑެންމާކުގެ ކެރޮލައިން ވޮޒްނިއާކީގެ އިތުރުން ފްރާންސްގެ ކެރޮލައިން ގާސިއާއެވެ. ދެވަނަ ގްރޫޕުގައި ހިމެނެނީ ސްޕެއިންގެ ގާބައިން މުގުރްޒާއާ ޗެކް ރިޕަބްލިކްގެ ކެރޮލައިން ޕްލިސްކޯވާއާ ލެޓްވިއާގެ ޖެލޭނާ އޮސްޓަޕެންކޯގެ އިތުރުން އެމެރިކާގެ ވީނަސް ވިލިއަމްސްއެވެ.